މިހާރު ރޯވެގެން އުޅޭ އަލިފާންގަނޑާއެކީ އެއް މިނިސްޓްރީއެއްގެ އިމާރާތް އަނދާ ހުލިވެ، ކައިރީގައި ހުރި އެހެން އިމާރާތްތަކުގައި ވެސް ރޯވުމާ ގުޅިގެން ސަރުކާރުގެ ތިން މިނިސްޓްރީއެއްގެ މަސައްކަތް ހުއްޓުމަކަށް އަތުވެއްޖެ އެވެ.

މި އަލިފާންގަނޑު ރޯވާން މެދުވެރިވީ ސަބަބެއް އަދި ނޭނގެ އެވެ. އަލިފާން ނިއްވާ ސިފައިންނާއި ފުލުހުން މި ސަރަހައްދުގައި ހަރަކާތްތެރިވަމުންދާއިރު، އަދިވެސް ހުޅުގަނޑު ހުރީ ވަރަށް ބޮޑަށް ހިފާފަ އެވެ.

ހޯމް މިނިސްޓަރު އަލީ އިހުސާން "އަދަދު" ނޫހަށް މައުލޫމާތު ދެއްވަމުން ވިދާޅުވީ އަލިފާންގަނޑުގެ ސަބަބުން އިންފްރާސްޓްރަކްޗާ މިނިސްޓްރީ އާއި ހައުސިން މިނިސްޓްރީ އަދި އެންވާރަމަންޓު މިނިސްޓްރީ ހިންގަމުންދިޔަ އިމާރާތްތައް އަނދައި ހުލިވެ މަސައްކަތްތައް އެއްކޮށް ހުއްޓުމަކަށް އައިސްފައިވާ ކަމަށެވެ.

ސަރުކާރުގެ މުހިންމު ތިން މިނިސްޓްރީގެ މަސައްކަތްތައް އަލުން ފަށާނެ ގޮތްތަކާއި ތާރީހުތައް މިހާތަނަށް ހާމަކޮށްފައި ނުވެ އެވެ. ބެލެވޭ ގޮތުގައި ކުރިއަށް އޮތް ވަގުތުތަކުގެ ތެރޭގައި ލިބުނު ގެއްލުންތަކާއި އަދި ކުރިއަށް އޮތް ތަނުގައި މިނިސްޓްރީތަކުން އަމަލުކުރާނެ ގޮތުގެ މައުލޫމާތު ސަރުކާރުން ހާމަކުރާނެ އެވެ.

މި ހާދިސާގެ އެއްވެސް މީހަަކަށް ހާނިއްކައެއްވީ ކަމުގެ މައުލޫމާތެއް އަދި ނުލިބޭ ކަމަށް ވެސް އިހުސާން ވިދާޅުވެފައިވެ އެވެ.