ވެރިކަމުގައި ހުރި މީހަކީ ދޮގުވެރިޔެއް ކަމަށް ރައްޔިތުން ނިންމުމުން އެ ވެރިޔަކު ވެރިކަމުން ބާލަންޖެހޭނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފު ޒާކިރު ވިދާޅުވެއްޖެ އެވެ.

އެމްޑީޕީން މިރޭ ކާނިވާ ސަރަހައްދުގައި ބޭއްވި ޖަލްސާގައި ވާހަކަ ދައްކަވަމުން، މައުރޫފު ވަނީ މިހާތަނަށް ރައީސް ޑރ. މުހައްމަދު މުއިއްޒު ހެއްދެވި ކަމަށްވާ ދޮގުތަކުގެ ލިސްޓު ކުރައްވައިފަ އެވެ. އެއަށްފަހު އޭނާ ވަނީ އެތަނަށް އެއްވެ ތިބި އާންމުންގެ އަރިހުން ރައީސް މުއިއްޒު އަކީ ދޮގުވެރިޔެއްތޯ އައްސަވާފަ އެވެ.

"ދެން އަޅުގަނޑުމެން ކުރަން ޖެހޭ ކަމަކީ އެއީ ދޮގުވެރިޔެއް ކަމަށް ރައްޔިތުން ނިންމީމާ އޭނާ ވެރިކަމުން ބާލަންޖެހޭނީ،" މައުރޫފު ވިދާޅުވި އެވެ.

ދައުރު ހަމަވުމުން ވޯޓުލައިގެން ވެރިކަން ބަދަލުކުރުމަކީ އޮންނަ އުސޫލެއް ކަމަށާއި އެހެން ނަމަވެސް ދޮގާއި މަކަރު ހެދުން އިންތިހާއަށް ދިޔައީމާ ވެރިކަން ބަދަލުކުރުން ވެސް އެއީ އޮންނަ ގޮތެއް ކަމަށް މައުރޫފް ފާހަގަކުރެއްވި އެވެ. އެގޮތުން ރައްޔިތުން ނުކުމެ އަވައްޓެރި ސްރީލަންކާ އަދި ބަންގްލަދޭޝް ގެ ވެރިކަން ބަދަލުކުރި ގޮތުން އޭނާ މިސާލު ނެންގެވި އެވެ.

"ދައުރު ހަމަވާކަށް ނުޖެހޭ. ގާނޫނުއަސާސީ ފުނޑާލީމާ ރައްޔިތުން ނުކުމެ ވެރިކަން ވައްޓާލަން ޖެހޭ. ބަދަލުކުރަން ޖެހޭ. ނުކުންނަންވީ،" އޭނާ ވިދާޅުވި އެވެ.

މިއީ ނިމުމެއް ނޫން ކަމަށާއި ދިގުދެމިގެންވާ މުޒާހަރާއެއް އެބައޮތް ކަމަށާއި ރައްޔިތުން އެކަމަށް ތައްޔާރުވާން ޖެހޭ ކަމަށާއި އެފަހަރު ހުއްޓާލާނީ ވެރިކަން ބަދަލުކުރުމަށްފަހު ކަމަށް ވެސް މައުރޫފު ވިދާޅުވި އެވެ.

އެމްޑީޕީގެ މިރޭގެ ޖަލްސާ ފެށުމުގެ ކުރިން ވަނީ ގައުމީ މަޖިލީހުގެ ބައްދަލުވުމެއް ބާއްވައިފަ އެވެ. އެމްޑީޕީއަށް ސޮއިކޮށްގެން ނުވަތަ ރައްޔިތުންގެ ހައްގުގައި ވަކާލާތުކޮށްގެން މަޖިލިސް މެންބަރެއްގެ ގޮނޑި ގެއްލިއްޖެ ނަމަ އެ މެންބަރަކު އަލުން އިންތިހާބު ކުރަން އެހީތެރިވެދިނުމަށް އެ ބައްދަލުވުމުގައި ވަނީ ފާސްކޮށްފަ އެވެ.

އޭގެ އިތުރުން، ގާނޫނުއަސާސީއަށް ގެނައި ބަދަލުތައް އަނބުރާ ނުގެންދާހާ ހިނދަކު، އެކަމާ ދެކޮޅަށް މުޅި ރާއްޖޭގައި އިހުތިޖާޖު ކުރުމަށް ވެސް ވަނީ ގައުމީ މަޖިލީހުން ފާސްކޮށްފަ އެވެ. އަދި އަސާސީއަށް ގެނައި ބަދަލުތަކާ ދެކޮޅަށް ޕެޓިޝަނެއް ހަދައި ސޮއި ކުރަން ފަށަން ވެސް އެ ބައްދަލުވުމުގައި ފާސް ކުރި އެވެ.