ރައްޔިތުންގެ މަޖިލީހުގެ މެންބަރެއް ޕާޓީން ވަކިކޮށްގެން ގޮނޑި ގެއްލޭ ގޮތަށް ގާނޫނު އަސާސީއަށް ގެނައި ބަދަލު ދެމި އޮންނަ މުއްދަތުގައި، ރައްޔިތުންގެ ހައްގުގައި ވަކާލާތުކޮށްގެން ނުވަތަ އެމްޑީޕީއަށް ސޮއިކުރުމުގެ ސަބަބުން ގޮނޑި ގެއްލިއްޖެ ނަމަ އެ މެންބަރަކު ތަމްސީލުކުރި ދާއިރާއަށް އަލުން އިންތިހާބު ކުރަން އެހީތެރިވުމަށް އެމްޑީޕީގެ ގައުމީ މަޖިލީހުން މިރޭ އިގުރާރުވެއްޖެ އެވެ.

ކާނިވާ ސަރަހައްދުގައި ކުރިއަށްދާ އެމްޑީޕީގެ ގައުމީ މަޖިލީހަށް ކޮލަމާފުށި ދާއިރާގެ ރައީސް މަހުފޫޒު ސައީދު ހުށަހަޅުއްވައި މެންބަރުންގެ އިއްތިފާގުން ފާސްވި އެ ގަރާރުގައިވާ ގޮތުން ރައްޔިތުންގެ މަސްލަހަތުގައި އެމްޑީޕީން ކުރަމުންދާ މަސައްކަތުގައި ބައިވެރިވުމުގެ ގޮތުން، އެ މެންބަރު ނިސްބަތްވާ ޕާޓީން ވަކިވެ އެމްޑީޕީއާ ގުޅުމުން ގޮނޑި ގެއްލުމުން ވެސް އެ މެންބަރަކު އަލުން އިންތިހާބު ކުރުމަށް އެހީވާންޖެހޭނެ އެވެ.

"އެ މެންބަރަކު ތަމްސީލުކުރި ދާއިރާއިން ރައްޔިތުންގެ މަޖިލީހަށް މެންބަރަކު އިންތިހާބު ކުރުމަށް ބާއްވާ ބައި އިލެކްޝަނުގައި، ރައްޔިތުންގެ މަޖިލީހުން ވަކިކުރެވުނު މެންބަރު ވާދަކުރާނަމަ މި ޕާޓީއިން އެ މެންބަރަކަށް ތާއީދުކުރުމަށާއި، އެ މެންބަރަކު އަލުން ރައްޔިތުންގެ މަޖިލީހަށް އިންތިހާބުކުރުމަށް ދިވެހިރައްޔިތުންގެ ޕާޓީގެ ފަރާތުން އެ މެންބަރަކާއެކު މަސައްކަތްކޮށްދިނުމަށް އެއްބަސްވަން،" އެ ގަރާރު ހުށަހަޅުއްވަމުން މަހްފޫޒް ވިދާޅުވި އެވެ.

ގާނޫނުއަސާސީއަށް ގެނައި ބަދަލަކީ ރައްޔިތުންގެ ބާރުވެރިކަން ނިގުޅައިނަގެ، ރައްޔިތުންގެ މަޖިލީހުގެ މެންބަރުން ރައްޔިތުންގެ މަސްލަހަތުގައި މަސައްކަތްކުރުމަށް އޮތް މިނިވަން އިހުތިޔާރު ވެސް ނިގުޅައިގަންނަ، އަދި ގާނޫނުއަސާސީގެ އަސާސީ އޮނިގަނޑާ ވެސް ހިލާފު ބަދަލެއް ކަމަށް ވެސް ގަރާރުގައި ބުންޏެވެ.

މީގެ އިތުރުން، ގާނޫނު އަސާސީއަށް ގެނައި ބަދަލު ގާނޫނު އަސާސީގެ 75 ވަނަ މާއްދާއާ ހިލާފު ކަމަށާއި ގާނޫނުއަސާސީގެ ހަތަރު ވަނަ މާއްދާއިން ރައްޔިތުންނަށް ލިބިދީފައި އޮތް ބާރުވެރިކަން ގެނައި ބަދަލުތަކުން ނިގުޅިގެންދާކަން ވެސް ގަރާރުގައި ވަނީ ފާހަގަކޮށްފަ އެވެ.

ގާނޫނުއަސާސީއަށް ގެނައި ބަދަލު އިހު އޮތް ގޮތަށް ރުޖޫއަ ކުރުމަށް ރައްޔިތުންގެ މަޖިލީހަށާއި، ސަރުކާރަށް ވެސް ގަރާރުގައި ވަނީ ގޮވައިލާފަ އެވެ.

ގާނޫނުއަސާސީއަށް މި ގެނައި ބަދަލު އިހު އޮތް ގޮތަށް ރުޖޫއަކުރުމާ ހަމައަށް، މުޅި ރާއްޖޭގެ އެކި ކަންކޮޅުތަކުގައި އިހުތިޖާޖު ކުރުމުގެ ގޮތުން އެކިއެކި ސިޔާސީ ހަރަކާތްތައް ހިންގައި، މި ބަދަލުގެ ސަބަބުން ނުކުންނަ ނަތީޖާތަކާމެދު ރައްޔިތުން ހޭލުންތެރިކުރުވުމަށް ފުޅާ ދާއިރާއެއްގައި ކެމްޕޭނު ހިންގުމަށް ވެސް ވަނީ އިގުރާރުވެފަ އެވެ.

އެގޮތުން އެ ގަރާރުގެ ދަށުން އެމްޑީޕީން ހިންގާ ހަރަކާތްތަކުގައި ބައިވެރިވުމަށް ރާއްޖޭގައި ރަޖިސްޓްރީކޮށްފައިވާ ސިޔާސީ ޕާޓީތަކަށާއި، މަދަނީ ޖަމިއްޔާތަކަށާއި، ފަންނީ ދާއިރާތަކުގެ ބޭފުޅުންނަށް ދައުވަތުދީ، ދޭ ދައުވަތު ގަބޫލުކުރާ އެންމެން ގުޅިގެން މުޅި ރާއްޖެއަށް ސިޔާސީ ހަރަކާތްތައް ފުޅާކޮށް، ރާއްޖޭގެ ކަންކޮޅުތަކުގައި އެކިއެކި އިހުތިޖާޖުތައް ރާވައި ހިންގުމަށް ވަނީ އިގުރާރުވެފަ އެވެ.