ރައްޔިތުންގެ މަޖިލީހުގައި ޕީއެންސީއަށް ނިސްބަތްވާ މެންބަރުން އެދިވަޑައިގެންނެވި ހުރިހާ ވަޒީފާއެއް ހަމަޖައްސާ ދެއްވާފައިވާކަން ދޭހަވާ ގޮތަށް ރައީސް ޑރ. މުހައްމަދު މުއިއްޒު މެމްބަރުންނަށް މެސެޖެއް ފޮނުއްވައިފި އެވެ.

ބައެއް މެންބަރުން ހުށަހެޅުއްވި ވަޒީފާތައް ރައްޔިތުންގެ މަޖިލީހުގެ ކެމްޕޭނުން ފެށިގެން ހަމަނުޖެހި ދިގު ދެމިގެންދާތީ، އެ މެންބަރުންގެ ހިތްހަމަނުޖެހުން ބޮޑުވަމުން ދަނިކޮށް، ވަޒީފާތައް ހަމަޖައްސައި މިިދިނި އަންނަ އަންގާރަ ދުވަހުގެ ރޭ އެމްޑީޕީން މާލޭގައި ބޮޑު އެއްވުމެއް ބާއްވަން ނިންމައި، ރަށްރަށުން ވެސް މީހުން އަންނަ އިއުލާނުކޮށްފައި ވަނިކޮށެވެ.

ޑިސެންބަރު 2 ގައި، ރައީސް އޮފީހުގެ ދެ މިނިސްޓަރުން ކަމުގައިވާ އަލީ އާރިފް އާއި އަބްދުﷲ ނާސިރު ބައިވެރިވެވަޑައިގެންނެވި ޕީއެންސީގެ ޕީޖީ ގުރޫޕު ބައްދަލުވުމުގައި މަޖިލީހުގެ މެންބަރުން ދެއްކެވި ވާހަކަތަކުގެ ޔައުމިއްޔާ ލިބިވަޑައިގެންފައިވާ ކަމަށް ރައީސް މުއިއްޒު ވިދާޅުވި އެވެ.

"ތަފްސީލު ޔައުމިއްޔާއެއް ކޮންމެ އެމްޕީއެއް ދެއްކެވި ވާހަކަފުޅު ޕޮއިންޓު ފޯމް އަށް ތައްޔާރުކޮށް މިނިސްޓަރު އާރިފު ވަނީ ދެއްވާފައި. ރޭގައި މި ޔައުމިއްޔާ އަޅުގަނޑު އެއްކޮށް ކިޔައިފިން،" ޕީއެންސީ ޕާލިމެންޓަރީ ގްރޫޕްގެ ވަޓްސްއަޕް ގްރޫޕަށް ރައީސް މިއަދު ފޮނުއްވި މެސެޖުގައިވެ އެވެ.

"ވަޒީފާގެ ކަންތަކުގައި ދަންނަވަން. އަޅުގަނޑާ ހަމައަށް ފޮނުވި ހުރިހާ ރިކްއެސްޓުތަކަށް ހުންނާނީ ޑައިރެކްޝަންސް ދީފައި. އަޅުގަނޑުގެ މޭޒުމަތީ އެއްވެސް އެމްޕީއެއްގެ ވަޒީފާ ރިކްއެސްޓެއް މިހާރު ނޯންނާނެ."

އެކަން ކަށަވަރު ކުރެއްވުމަށް މިނިސްޓަރު ނާސިރު، އަދި މިނިސްޓަރު އަލީ އާރިފުއާ ކޯޑިނޭޓު ކުރެއްވުމަށް ރައީސް އެދިވަޑައިގެންނެވި އެވެ. އަދި މެންބަރުންނާ ވަރަށް އަވަހަށް ބައްދަލު ވާނެ ކަމަށް އުއްމީދު ކުރައްވާ ކަމަށް ވެސް އެ މަނިކުފާނު ވިދާޅުވި އެވެ.

މެންބަރުން އެދިވަޑައިގެންނެވި ހުރިހާ ވަޒީފާއެއް ހަމަޖައްސައި ދެއްވައިފިކަން ދޭހަވާ ގޮތަށް ރައީސް މުއިއްޒު މި ވިދާޅުވީ، މާލީ ދަތިކަން ބޮޑުވެ، ސިޔާސީ މަގާމުތަކުގައި ތިއްބެވި 228 މީހަކު ވަޒީފާއިން ވަކިކޮށްފައިވާ ކަމަށް ރައީސް އޮފީހުން ބުނެފައި ވަނިކޮށެވެ.

ނަމަވެސް ވަކިކުރީ ކޮން ބައެެއްކަން ސަރުކާރުން ހާމައެއް ނުކުރެ އެވެ.

ރައްޔިތުންގެ މަޖިލީހުގައި ބޭއްވި ޕީއެންސީގެ ޕީޖީ ގްރޫޕްގެ ބައްދަލުވުމުގައި ދައުލަތުގެ ތިން މިނިސްޓަރަކު ވަކިކުރުމަށާއި ޕާޓީ ހިންގުމުގެ ބާރު މަޖިލީހުގެ ރައީސް، އަބްދުއްރަހީމް އަބްދުﷲއަށް ދިނުން ހިމެނޭހެން ގިނަ ޑިމާންޑުތަކެއްކޮށް، އެކަންކަން ނުކުރާނަމަ ޕާޓީ ދޫކޮށްލަން ފަސްނުޖެހޭނެ ކަމުގެ އިންޒާރު ބައެއް މެންބަރުން ދެެއްވި އެވެ.

"ގިނަ މެންބަރުން ޑިމާންޑު ކުރީ ހޯމް މިނިސްޓަރު އިހުސާން އާއި އެޑިއުކޭޝަން މިނިސްޓަރާއި އޭޖީ ވަކި ކުރަން އަދި ސިޔާސީ ބާރުތަކާއި ޕާޓީ ހިންގުމުގެ ބާރުތައް އަދުރޭއަށް ދޭން، އަދުރޭއާ މަޝްވަރާ ކޮށްގެން ކަންކަން ކުރިއަށް ގެންދަން،" ޑިސެންބަރު 2 ގައި، ޕީއެންސީގެ މަޖިލިސް މެންބަރަކު އަދަދު ނޫހަށް ވިދާޅުވި އެވެ.

މަޖިލީހުގައި އޮތް ޕީއެންސީގެ ޕީޖީ ގުރޫޕުގެ ބައްދަލުވުމެއްގައި ރައީސް އޮފީހުގެ ދެ މިނިސްޓަރަކު ބައިވެރިވެވަޑައިގެންނެވި މިއީ ފުރަތަމަ ފަހަރެވެ. ޕީޖީ ގުރޫޕުގެ ބައްދަލުވުމުގައި ބައިވެރިވެވަޑައިގެންނެވި ދެ ބޭފުުންގެ ތެރެއިން، އަލީ އާރިފް އަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ އާއިލީ ގުޅުން އޮންނަ ބޭފުޅެކެވެ. އަބްދުﷲ ނާސިރުއަކީ މާލެ ސިޓީ މޭޔަރުކަމުގައި ރައީސް މުއިއްޒު ހުންނެވިއިރު ވެސް ވަރަށް އަރިސް ބޭފުޅެކެވެ.