ލަންޑަން (ޑިސެމްބަރު 8) - އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑުން ކުޅުނު މެޗުގައި ނޮޓިންހަމް ފޮރެސްޓް އަތުން 3-2 އިން ބަލިވިއިރު، ކްރިސްޓަލް ޕެލަސްއާ ދެކޮޅަށް މެންޗެސްޓާ ސިޓީ ނުކުތް މެޗު 2-2 އިން އެއްވަރުވެއްޖެ އެވެ.

މިއީ، ގާތްގަނޑަކަށް 30 އަހަރު ތެރޭ ޔުނައިޓެޑް ދަނޑުގައި އެ ޓީމު އަތުން ފޮރެސްޓް މޮޅުވި ފުރަތަމަ ފަހަރެވެ. އަނެއްކޮޅުން، 1992 ވަނަ އަހަރަށް ފަހު، ފޮރެސްޓުން މި ވަނީ ފުރަތަމަ ފަހަރަށް ޖެހިޖެހިގެން ދެ މެޗުން ޔުނައިޓެޑް ބަލިކޮށްފަ އެވެ. އަދި ޕެލަސް އާއި ސިޓީން ކުޅުނު މެޗު އެއްވަރުވެ، ހާލަތު ބަދަލުކުރަން ސިޓީން އިތުރު މަސައްކަތްތަކެއް ވަނީ ކުރަންޖެހިފަ އެވެ.

ލީގުގެ އެއް ވަނައިގައި އޮތް ލިވަޕޫލުން ރޭ ރަށުންބޭރުގައި އެވަޓަންއާ ކުޅެން އޮތް މެޗު ވަނީ ވައިގެ ތޫފާނުގެ އަސަރުކުރާނެ ކަމަށް ބެލެވޭތީ ފަސްކޮށްފަ އެވެ. ލިވަޕޫލް އެއް ވަނައިގައި އޮތީ 14 މެޗުން 35 ޕޮއިންޓާ އެކު އެވެ. ދެ ވަނައިގައި އޮތް ޗެލްސީ އާއި ތިން ވަނައިގައި އޮތް އާސެނަލަށް 14 މެޗުން ވަނީ 28 ޕޮއިންޓް ލިބިފަ އެވެ. ސިޓީ ހަތަރެއްގައި އޮތީ 15 މެޗުން 27 ޕޮއިންޓް ހޯދައިގެންނެވެ.

ޔުނައިޓެޑް ދަނޑުގައި ރޭ ކޯނަރަކުން އައި ބޯޅައެއްގައި، ފޮރެސްޓަށް ލީޑުނަގައިދިނީ، ނިކޮލަ މިލެންކޮވިޗް ބޮލުން ޖެހި ގޯލުންނެވެ. ޔުނައިޓެޑުން ވަނީ ރަސްމުސް ހޮއިލުންޑް ރީބައުންސަކުން ޖެހި ގޯލުން އެއްވަރުކޮށްފަ އެވެ. ފޮރެސްޓުން ވަނީ އޭގެ ފަހުން، ދެ ވަނަ ހާފުގައި ކުޅެން އަރަައި ދެ ގޯލު ޖަހައިފަ އެވެ. އެ ގޮތުން އެ ޓީމަށް އަލުން ލީޑުނަގައިދިނީ އޭރިއާބޭރުން، މޯގަން ގިބްސް-ވައިޓް ވައްދާލި ގޯލުންނެވެ. އަދި ކްރިސް ވުޑް ބޮލުން ގޯލެއް ޖަހައި، ޕެލަސް އަށް ލީޑުފުޅާކޮށްދީފައިވަނިކޮށް، ޔުނައިޓެޑްގެ ކެޕްޓަން، ބްރޫނޯ ފެނާންޑޭސް އޭރިއާ ރޮނގުމަތިން ގޯލަށް ބޯޅަ ފޮނުވާލައިގެން އެ ޓީމުގެ ދެ ވަނަ ގޯލު ޖެހި އެވެ.

މި މެޗުން ބަލިވެ، ޔުނައިޓެޑް ލީގުގެ 13 ވަނައިގައި އޮތީ، 15 މެޗުން 19 ޕޮއިންޓް ހޯދައިގެންނެވެ.

ސިޓީއާ ދެކޮޅަށް ރޭ ޕެލަސް އިން ލީޑުނެގީ، ޑެނިއަލް މުނޯޒް ޖެހި ގޯލުންނެވެ. ސިޓީން ވަނީ އާލިން ބްރައުޓް ހާލަންޑް ޖެހި ގޯލުން އެއްވަރުކޮށްފަ އެވެ. އެކަމަކު، ޕެލަސް އިން ލިބުނު ކޯނަރެއްގައި، މެކްސެންސް ލަކްރޯޝް ބޮލުން ގޯލެއް ޖަހައި އަލުން އެ ޓީމަށް ލީޑުނަގައިދިނެވެ. އެކަމަކު، ރީކޯ ލެވިސް ވަނީ ގޯލެއް ޖަހައި ސޓީ އަށް އެއްވަރުކޮށްދީފަ އެވެ. މެޗުގެ 84 ވަނަ މިނިޓްގައި ލެވިސް އަށް ވަނީ ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ.

އަންނަ ހަފްތާގައި ސިޓީން ޔުނައިޓެޑާ ދެކޮޅަށް ކުޅޭ މެޗަށް ލެވިސް ސަސްޕެންޑްވާނެ އެވެ.