މެންޗެސްޓާ (ޑިސެމްބަރު 21) - މެންޗެސްޓާ ޔުނައިޓެޑަށް ކުޅެމުން އަންނަ އިނގިރޭސި ފޯވާޑް، މާކަސް ރެޝްފޯޑަށް ސައުދީ އަރަބިއްޔާގެ ޕްރޮފެޝަނަލް ލީގުގެ ތިން ކްލަބަކުން އޮފާއެއް ތައްޔާރުކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.

ޔުނައިޓެޑުން އެންމެ ފަހުން އިނގިރޭސި ޕްރިމިއާ ލީގުގައި މެންޗެސްޓާ ސިޓީއާ ދެކޮޅަށް ކުޅުނު މެޗާއި ލީގު ކަޕް ކުއާޓާ ފައިނަލުގައި ޓޮޓެންހަމް ހޮޓްސްޕާސްއާ ދެކޮޅަށް ކުޅުނު މެޗުގެ ސްކޮޑުގައި ރެޝްފޯޑް ނުހިމެނެ އެވެ. ސިޓީ މެޗުގެ ސްކޮޑުން ރެޝްފޯޑަށް ޖާގަ ނުލިބުނުއިރު، އެ މެޗަށް ފަހު ދިން އިންޓަވިއުއެއްގައި ރެޝްފޯޑް ވަނީ ޔުނައިޓެޑް ދޫކޮށްލުމަކީ އޭނާގެ ވިސްނުން ކަމަށް ބުނެފަ އެވެ. އޭގެ ފަހުން، ޓޮޓެންހަމް މެޗުގެ ސްކޮޑުން ރެޝްފޯޑަށް ޖާގަ ނުލިބުނުއިރު،، އެ މެޗުގައި ޔުނައިޓެޑްގެ ބައެއް ސަޕޯޓަރުން ވަނީ ރެޝްފޯޑަށް އަމާޒުކޮށް ބެނާއެއް ދަނޑުގައި ދަމައިފަ އެވެ.

ރިޕޯޓްތައް ބުނާގޮތުން ސައުދީ އަރަބިއްޔާގެ ތިން ކްލަބަކުން ރެޝްފޯޑް، 27، އަށް ކޮންޓްރެކްޓް ހުށަހަޅަން ތައްޔާރުވާއިރު، އޭނާގެ ވިސްނުމަކީ، ޔޫރަޕްގެ ވަރުގަދަ ލީގަކަށް ކުޅުމެވެ. އެ ގޮތުން، އިނގިރޭސި މީޑިއާގެ ބައެއް ރިޕޯޓްތަކުގައިވާ ގޮތުން، ރެޝްފޯޑް، ޔުނައިޓެޑް ދޫކޮށްލާނަމަ އިހުތިޔާރުކުރަނީ ސްޕެއިނުގެ ކްލަބަކާ ގުޅުމަށެވެ.

ޔުނައިޓެޑްގެ ޔޫތު ޓީމުތަކަށް ކުޅެ، ރެޝްފޯޑް އެންމެ ފުރަތަމަ ސީނިއާ ޓީމަށް މެޗެއް ކުޅެދިނީ، 2016 ވަނަ އަހަރު އެވެ. އޭގެ ފަހުން، ސީނިއާ ޓީމުގައި މި ހޭދަވީ އަށް އަހަރު ތެރޭ އޭނާ ވަނީ އެ ޓީމަށް 426 މެޗުން 138 ގޯލު ޖަހައިފަ އެވެ.

އިނގިރޭސި މީޑިއާތަކުން ރިޕޯޓްކުރާގޮތުގައި، ރެޝްފޯޑް ދޫކޮށްލުމާ މެދު ޔުނައިޓެޑުން ވަނީ މަޝްވަރާތައް ފަށައިފަ އެވެ. އެ ގޮތުން، ކުރިއަށް އޮތް ދެ ޓްރާންސްފާ މާކެޓްގެ ތެރޭގައި، ރެޝްފޯޑް ގަންނަން 40-60 މިލިއަން ޑޮލަރުގެ ބިޑެއް ލިބިއްޖެނަމަ، އޭނާ ވިއްކާލަން ޔުނައިޓެޑުން އޮތީ ތައްޔާރަށެެވެ.

ޔުނައިޓެޑްގެ މެޗު ސްކޮޑަށް ރެޝްފޯޑް ނޭރުމާ ބެހޭގޮތުން، ނޫސްވެރިން ކުރާ ސުވާލުތަކަށް ޔުނައިޓެޑްގެ ކޯޗު ރުބެން އަމޮރިމް ދެނީ އެއް ޖަވާބުތަކެކެވެ. އެއީ، ޓްރެއިނިންގައި ކުރާ މަސައްކަތާއި ހުރިހާ ކަމަކަށް ބެލުމަށް ފަހު، ޓީމު މޮޅުވާން އެހީތެރިވެވޭނެ ހުރިހާ ކުޅުންތެރިއަކު ސްކޮޑުގައި ހިމެނޭނެ ކަމަށާއި ފުރުސަތު ނުލިބޭ ކުޅުންތެރިން ޖެހޭނީ ރަނގަޅަށް މަސައްކަތް ކުރަން ކަމަށެވެ.