ލަންޑަން (ޑިސެމްބަރު 6) - އިނގިރޭސި ޕްރިމިއާ ލީގުގައި ރޭ ބޯންމައުތު އަތުން 1-0 އިން ޓޮޓެންހަމް ހޮޓްސްޕާސް ބަލިވިއިރު، އެ ޓީމުގެ ފަރާތުން ތަކުރާރުވަނީ އެއް މައްސަލަތަކެއް ކަމަށް ޓޮޓެންހަމްގެ ކޯޗު އަންގޭ ޕޮސްޓެކޮގްލޫ ބުނެފި އެެވެ.

މި ފަހަރުގެ ޕްރިމިއާ ލީގުގައި މިހާތަނަށް ޓޮޓެންހަމް އިން ކުޅުނު 14 މެޗުގެ ތެެރެއިން ހަ މެޗުން މޮޅުވިއިރު، ހަ މެޗުން ވަނީ ބަލިވެ، ދެ މެޗުން އެއްވަރުވެފަ އެވެ. ރޭގެ މޮޅާ އެކު، ބޯންމައުތުން ވަނީ ޓޮޓެންހަމް ފަހަތަށް ޖައްސާލައި، ނުވަ ވަނަ އަށް އަރައިފަ އެވެ. ބޯންމައުތަށް 14 މެޗުން 21 ޕޮއިންޓް ލިބިފައިވާއިރު، ޓޮޓެންހަމް 10 ވަނައިގައި އޮތީ 14 މެޗުން 20 ޕޮއިންޓާ އެކު އެވެ.

ބޯންމައުތުގެ ވައިޓާލިޓީ ސްޓޭޑިއަމްގައި ކުޅުނު މެޗުގައި އެ ޓީމުން މޮޅުވީ، 17 ވަނަ މިނިޓްގައި، ޑީން ހުއިޖްސަން ޖެހި ގޯލުންނެވެ. މިއީ މާކަސް ޓަވެނިއާ ނެގި ކޯނަރަކުން 19 އަހަރުގެ ހުއިޖްސަން ބޮލުން ޖެހި ގޯލެެެކެވެ.

މި ސީޒަނުގައި ޓޮޓެންހަމް ކޮޅަށް ގިނަ ގޯލު ވަދެފައިވަނީ ސެޓްޕީސް (ޖެހުން/ކޯނަރު) ތަކުންނެވެ. ޕޮސްޓެކޮގްލޫ ބުނެފައިވަނީ އެ ކަންކަން ރަނގަޅުުކުރަން ޓްރެއިނިންގައި ކެނޑިނޭޅި މަސައްކަތް ކުރަމުން އަންނަ ކަމަށެވެ.

"މީގެ އެއް މައްސަލަތަކެއް މި ފެންނަނީ، ސެޓްޕީސްތަކުގައި އަހަރެމެންގެ ފަރުވާ ބެހެއްޓުމުގެ ކަންކަން ދަށްކޮށް މި ދިޔައީ،" ޕޮސްޓެކޮގްލޫ ބުންޏެވެ.

ލީގުގައި ރޭ ފުލަމް އިން ވަނީ އަމިއްލަ ދަނޑުގައި ކުޅުނު މެޗުން ބްރައިޓަން އަތުން 3-1 އިން މޮޅުވެފަ އެވެ. މި ނަތީޖާއާ އެކު، ފުލަމް އިން ވަނީ ފަސް ވަނައިގައި އޮތް ބްރައިޓަންއާ އެއް ޕޮއިންޓަށް ގާތަށް ޖެހިލައިފަ އެވެ. އެ ގޮތުން، ބްރައިޓަން އަށް 14 މެޗުން 23 ޕޮއިންޓް ލިބިފައިވާއިރު، ފުލަމް އަށް 14 މެޗުން ވަނީ 22 ޕޮއިންޓް ލިބިފަ އެވެ.