މިއާމީ، ޔުނައިޓެޑް ސްޓޭޓްސް (ޑިސެމްބަރު 6) - އަންނަ އަހަރު މުޅިން އާ ފޯމެޓަކަށް ފަށާ ފީފާ ކްލަބް ވޯލްޑް ކަޕުގައި އިނގިރޭސި ޗެމްޕިއަން، މެންޗެސްޓާ ސިޓީ އާއި އިޓަލީގެ ގަދަބާރު ޔުވެންޓަސް އެއް ގްރޫޕެއްގައި ލައްވާލައިފި އެވެ.

އަންނަ އަހަރު އެމެރިކާގައި ކްލަބް ވޯލްޑް ކަޕް ކުރިއަށްދާނީ 32 ކްލަބާ އެކު މުޅިން އާ ފޯމެޓަކަށް، ކޮންމެ ހަތަރު އަހަރަކުން އެއް ފަހަރު ކުޅޭ ގޮތަށެވެ.

ބައްރުތަކުގެ ޗެމްޕިއަންތަކަށް ހާއްސަކޮށް ގައުމީ ޓީމުތަކަށް ބޭއްވި ފީފާ ކޮންފަޑެރޭޝަން ކަޕްގެ ބަދަލުގައި ކްލަބްތަކަށް ކުރިއަށްގެންދާ މުބާރާތެއް ގޮތަށް ކްލަބް ވޯލްޑް ކަޕް ފޯމެޓް ރޭވީ 24 ޓީމު ކުޅޭގޮތަށް 2021 ގައި ޗައިނާގައި ފުރަތަމަ މުބާރާތް ބާއްވާށެވެ. އެކަމަކު، އޭރު ކޮވިޑް-19ގެ ދުވަސްވަރު ކަމަށްވާތީ ފީފާ އަށް ޖެހުނީ މުބާރާތް ފަސްކުރާށެވެ.

އޭގެ ފަހުން ގިނަ އަހަރުތަކެއް މަޝްވަރާ ކުރުމަށްފަހު ފީފާ އިން އެންމެ ފަހުން ނިންމީ 32 ޓީމާއެކު މުބާރާތް ކުރިއަށް ގެންދާށެވެ.

މި ފަހަރުގެ މުބާރާތުގައި ގްރޫޕް އޭގައި ވާދަކުރާނީ ބްރެޒިލްގެ ޕަލްމަރަސް, ޕޯޗުގަލްގެ އެފްސީ ޕޯޓޯ, މިސްރުގެ އަލް އަހުލީ އަދި އެމެރިކާގެ އިންޓަ މިއާމީ އެވެ.

ގްރޫޕް ބީގައި ލައްވާލީ, ފްރާންސްގެ ޕީއެސްޖީ, ސްޕެއިންގެ އެތުލެޓިކޯ މެޑްރިޑް, ބްރެޒިލްގެ ބޮޓޮފޯގޯ އަދި އެމެރިކާގެ ސިއޭޓަލް ސައުންޑާސް އެފްސީ އެވެ.

ގްރޫޕް ސީގައި ހިމެނެނީ, ޖަރުމަނުގެ ބަޔާން މިއުނިކް, ނިއުޒިލަންޑްގެ އޯކްލަންޑް ސިޓީ އެފްސީ, އާޖެންޓީނާގެ ބޮކަ ޖޫނިއާސް އަދި ޕޯޗުގަލްގެ ބެންފީކާ އެވެ.

ގްރޫޕް ޑީގައި ލައްވާލީ, ބްރެޒިލްގެ ފްލެމިންގޯ, ޓިއުނީޝިއާގެ އެސްޕަރާންސް ޑެޕޯޓިވޯ, އިންގްލެންޑްގެ ޗެލްސީ އަދި މެކްސިކޯގެ ކްލަބް ލިއޯން އެވެ.

ގްރޫޕް އީގައި ހިމެނެނީ, އާޖެންޓީނާގެ ސީއޭ ރިވާ ޕްލޭޓް, ޖަޕާނުގެ އުރާވާ ރެޑް ޑައިމަންޑްސް, މެކްސިކޯގެ މޮންޓޭރޯ އަދި އިޓަލީގެ އިންޓަ މިލާން އެވެ.

ޖަރުމަނުގެ ބްރޫޝިއާ ޑޯޓްމަންޑް ގްރޫޕް އެފްގައި ލައްވާލިއިރު, މި ގްރޫޕްގައި ދެން ހިމެނެނީ, ބްރެޒިލްގެ ފްލުމިނެންސޭ, ކޮރެއާގެ އުލްސަން އެޗްޑީ އަދި ސައުތު އެފްރިކާގެ މަމެލޮޑީ ސަންޑައުންސް އެވެ.

މި ފަހަރުގެ ގުރުއަތުލުން ކުރިއަށްދިޔަ ގިނަ ބަޔެއްގެ އަމާޒު ހުއްޓުނީ ގްރޫޕް ޖީ އަށެވެ. އެއީ އެ ގްރޫޕުގައި ސިޓީއާ އެކު އިޓަލީގެ ގަދަ ބާރު ޔުވެންޓަސް ހިމެނުމުންނެވެ. ސިޓީއާ ޔުވެންޓަސްގެ އިތުރުން މި ގްރޫޕުގައި ދެން ހިމެނެނީ, ދުބާއީގެ އަލް އައިން އަދި މޮރޮކޯގެ ވީދާދް އޭސީ އެވެ.

ފީފާ ކްލަބް ވޯލްޑް ކަޕުގެ އެންމެ ކާމިޔާބު ކްލަބް ރެއާލް ހިމެނުނީ ގްރޫޕް އެޗްގަ އެވެ. މި ގްރޫޕުގައި ދެން ލައްވާލީ, ސައުދީ ޕްރޯ ލީގުގެ ކްލަބް އަލް ހިލާލް އަދި ޕަޗޫކާގެ އިތުރުން ރެޑްބުލް ސަލްޒްބާގް އެވެ.