ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ ސީއީއޯ އަދި ރައީސް އޮފީހުގެ ތަރުޖަމާން ހީނާ ވަލީދުގެ މައްޗަށް މަނީ ލޯންޑަރިންގެ ދައުވާ އުފުލަން ޖެހޭ ކަމަށް ކުރީގެ ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.

ޕީއެންއެފްގެ ޖަލްސާގައި ޔާމީން ވިދާޅުވީ ރައީސް ޑރ. މުހައްމަދު މުއިއްޒުގެ މަސްލަހަތު އޮތް މޯލްޑިވްސް މީޑިއާ ހައުސްގެ މައްސަލައަކީ މަނީލޯންޑްރިން އެކުލެވޭ ކަމަކަށްވާއިރު، އެކަމުގައި ޝާމިލުވާ މީހުން ނަޒާހަތްތެރި ކަމަށް ވިސްނުމަށްފަހު މަގާމުން ދުރަށް ދާން ޖެހޭ ކަމަށް ގަބޫލު ކުރައްވާ ކަމަށެވެ.

"މިއޮތީ މަނީލޯންޑާ ކޮށްފައި އެނގޭތޯ. މިހާ ހިސާބުން މުއިއްޒު ވިދާޅުވެދެއްވަން ޖެހޭ ރައްޔިތުން ކައިރީ މޯލްޑިވްސް މީޑިއާ ހައުސްއަކީ ތިމަންނާގެ ތަނެއް ނޫނޭ އެނގޭތޯ. އެހެން ނުވާ ކަމަށްވަންޏާ މުޅި ރައްޔިތުން ގަބޫލު ކުރަނީ މިއީ މުއިއްޒުގެ ޓީވީ ކަމަށް. ހީނާ އެބަޖެހޭ މަގާމުން ދުރަށް ދާން. ހީނާއަށް އެބަޖެހޭ މަނީ ލޯންޑަރިންގެ ދައުވާ އުފުލެން،" ޔާމީން ވިދާޅުވި އެވެ.

މޯލްޑިވްސް މީޑިއާ ހައުސްގެ ނަމުގައި ހިންގާ ކުންފުންޏެއް މެދުވެރިކޮށް އެންސްޕާ ހިންގާނެ އިމާރާތެއް ހޯދުމަށް އެއްބަސްވުމެއް އެކުލަވާލި އެވެ. ނަމަވެސް އާންމުންގެ ފާޑު ކިޔުން އަމާޒުވުމުން އެ އެއްބަސްވުން އުވައިލަން ނިންމާފައިވާކަން އެންސްޕާއިން އިއްޔެ އިއުލާން ކުރި އެވެ.

ސަރުކާރުގެ މަގާމެއްގައި ހުންނަ މީހެއްގެ ނަޒާހަތްތެރިކަމާ ގުޅޭ ގޮތުން އެއްވެސް ތުހުމަތެއް އައިސްފިނަމަ އެންމެ ރަނގަޅު ގޮތަކީ މަގާމާ ދުރަށް ދިއުންކަން ފާހަގަކުރައްވާ ޔާމީން ވިދާޅުވީ ބަޔާންތައް ނެރުނު ނަމަވެސް ގޯސްކޮށް ހިނގާފައި އޮތް ކަންތައްތައް ރަނގަޅު ނުވާނެ ކަމަށެވެ.

އޭގެއިތުރުން ޔާމީން ވިދާޅުވީ ޝަރީއަތުގައި ސާބިތު ނުވާތީ ކަމަށް ބުނެ ރައްޔިތުންގެ މަޖިލީހުގައި އެ މައްސަލައަށް ވާހަކަ ދައްކަން ފުރުސަތު ނުދިނުމުން ވެސް ސުވާލު އުފެދޭ ކަމަށެވެ.

ފިނޭންސް މިނިސްޓްރީގެ ވެބްސައިޓުގައި ހުރި މައުލޫމާތުން އެނގޭ ގޮތުގައި އެންސްޕާގެ އޮފީސް އިމާރާތް ބަދަލުކުރަން، 12،000 އަކަފޫޓުގެ ތަނެއް، ހޯދަން ކުރި އިއުލާނުކުރީ ޓެންޑަ ބޯޑު މެދުވެރިކޮށެވެ. އެ އިއުލާނާ ގުޅިގެން އިމާރާތް ކުއްޔަށް ދޭން ހުށަހެޅީ ވެސް ހަމައެކަނި މޯލްޑިވްސް މީޑިއާ ހައުސިންނެވެ.

ފަނަރަ ބުރިއަށް ހަދާފައިވާ މއ. ސީރާޒީގެއިން ހަތަރު ފަންގިފިލާއެއް އެމްއެމްޓީވީ އަށް ކުއްޔަށް ނަގާފައިވާ ކަމަށް މައުލޫމާތު ލިބެ އެވެ. އޭގެތެރެއިން އެންސްޕާއަށް ކުއްޔަށް ދިނީ ދެ ފަންގިފިލާ ކަމަށް އިތުބާރުކުރެވޭ މަސްދަރުތަކުން މައުލޫމާތު ދީފައިވެ އެވެ. ސީރާޒީގޭގެ ޖުމުލަ ބޮޑުމިނަކީ 4365 އަކަފޫޓެވެ.

އެންސްޕާއިން ބޭނުންވާ 12،000 އަކަފޫޓުގެ ޖާގަ ލިބޭނީ ސީރާޒީގޭގެ ތިން ފަންގިފިލާއިންނެވެ. ދެ ފަންގިފިލާ ކުއްޔަށް ނަގާފައި ވާނަމަ އެއީ 8730 އަކަފޫޓެވެ.

އެންސްޕާގެ އޮފީސް ހިންގަން، މޯލްޑިވްސް މީޑިއާ ހައުސިން އޮފީސް އިމާރާތެއް ކުއްޔަށް ދީފައި ވަނީ މަހަކަށް 580،000ރ. އަށެވެ. އެއީ ފަސް އަހަރަށް 34.8 މިލިއަން ރުފިޔާ އެވެ.