ނުވަ ވަނަ އިސްލާމިކް ފައިނޭންސް ފޯރަމް އޮފް ސައުތު އޭޝިއާ އެވޯޑްސް 2024 ގައި ދެކުނު އޭޝިއާގެ އިސްލާމިކް ފައިނޭންސް އެންޓިޓީގެ އެވޯޑް މޯލްޑިވްސް އިސްލާމިކް ބޭންކް (އެމްއައިބީ) އަށް ލިބިއްޖެ އެވެ.

ސްރީލަންކާގައި ބޭއްވި އެ ހަފްލާގައި އެމްއައިބީގެ ފަރާތުން އެވޯޑާ ހަވާލުވެލެއްވީ އެ ބޭންކުގެ ހެޑް އޮފް މާކެޓިން އެންޑް ކޯޕަރޭޓް ކޮމިއުނިކޭޝަންސް އަހުމަދު ނީރައިން ޖަލީލު އެވެ.

ރާއްޖޭގެ ފުރަތަމަ އަދި ހަމައެކަނި އިސްލާމިކް ބޭންކް، އެމްއައިބީން ހިދުމަތް ފެށި ފަހުން ރާއްޖޭގައި އިސްލާމިކް ފައިނޭންސިން ކުރިއެރުވުމަށް ގިނަ މަސައްކަތްތަކެއް ވަނީ ކޮށްފަ އެވެ.

އެ ދާއިރާއިން ދަރިވަރުންނަށް މައުލޫމާތު ދިނުމާއި، ދާއިރާއިން ކިޔެވުމަށް ސްކޮލަޝިޕް ދިނުމުގެ އިތުރުން އެމްއައިބީން ވަނީ ރާއްޖޭގެ މާހައުލަށް ހާއްސަކޮށް އިސްލާމީ މާލީ ނިޒާމުގެ ތެރެއިން ގިނަ ހިދުމަތްތަކެއް ފަރުމާކޮށް ތައާރަފް ކޮށްފަ އެވެ.

އެމްއައިބީން އަންނަނީ މިވަގުތު ރާއްޖޭގެ ބޮޑެތި ހުރިހާ އާބާދީތަކެއްގައި ހިދުމަތް ދެމުންނެވެ. އޭގެ ތެރޭގައި 12 އަތޮޅެއްގެ 18 ރަށެއްގައި ޒަމާނީ ވަސީލަތްތަކުގެ އެހީގައި ރައްކާތެރި ބޭންކިން ހިދުމަތް އެ ބޭންކުން އަންނަނީ ފޯރުކޮށް ދެމުންނެވެ.

އެމްއައިބީގެ އީޖާދުތަކާއި އެ ބޭންކުން ދޭ ޒަމާނީ ހިދުމަތްތަކުގެ ސަބަބުން އެމްއައިބީ މިއަދު ވެފައިވަނީ ރައްޔިތުން ބަލައިގަންނަ އިތުބާރު ކުރެވޭ ބޭންކަކަށެވެ.