ނިއު ދިއްލީ، އިންޑިއާ (ޑިސެމްބަރު 1) - އިންޓަނޭޝަނަލް ކްރިކެޓް ކައުންސިލް (އައިސީސީ)ގެ އާ ޗެއާމަން، ކްރިކެޓް ބޯޑް އޮފް އިންޑިއާ (ބީސީސީއައި)ގެ ސެކްރެޓަރީ ޖޭ ޝާހު، އާ ވިސްނުންތަކާ އެކު ހުރިހާ ގޮތަކުން ކްރިކެޓް ކުރިއެރުވުމަށް މަސައްކަތް ކުރާނެ ކަމަށް ވިދާޅުވެއްޖެ އެވެ.

ޖޭ ޝާހު، 36، އައިސީސީގެ ތާރީހުގައި ވެސް ޗެއާމަންގެ މަގާމާ ހަވާލުވި އެންމެ އުމުރުން ހަގު ފަރާތުުގެ ގޮތުގައި މިއަދު ވަނީ ޒިންމާއާ ރަސްމީކޮށް ހަވާލުވެފަ އެވެ.

އައިސީސީ އެންމެ ފަހުގެ ޗެއާމަން، އޮސްޓްރޭލިއާގެ ގްރެގް ބާކްލޭ ވަނީ މިދިޔަ މަހުގެ ނިޔަލަށް އޭނާގެ ދެ ވަނަ ދައުރު ހަމަވުމުން އިތުރަށް ކުރިއަށް ނުދާން ނިންމައިފަ އެވެ. އޭނާ ފުރަތަމަ މަގާމަށް އައީ 2020 ވަނަ އަހަރުގެ ނޮވެމްބަރުގަ އެވެ. އަދި 2022 ވަނަ އަހަރު ދެ ވަނަ ދައުރަކަށް އިންތިހާބުވި އެވެ.

ސަތޭކަ އަށް ވުރެ ގިނަ މެމްބަރު ގައުމު ހިމެނޭ އައިސީސީގެ ޗެއާމަން މަގާމާ ހަވާލުވުމަށް ފަހު، ޖޭ ޝާހު ވިދާޅުވީ، ކްރިކެޓް އާ އުސްމިންތަކަކަށް ގެންދަން ވިސްނުންތަކެއް އެބަހުރި ކަމަށާއި އެންމެ ބޮޑު އެއް ހިތްހަަމަޖެހުމަކީ، 2028 ވަނަ އަހަރުގެ އޮލިމްޕިކްސްގައި ކްރިކެޓް ހިމެނޭއިރު، އޭގެ މަސައްކަތްތައް ނިންމުމާއި އަންހެން ކްރިކެޓްގެ ޑިވެލޮޮޕްމަންޓަށް ގިނަ ކަންކަން ރޭވުން ކަަމަށެވެ.

ޖޭ ޝާހު އަކީ، އިންޑިއާގެ ހޯމް މިނިސްޓަރު، އަމިތު ޝާހުގެ ދަރިއެކެވެ. މީގެ ކުރިން، އިންޑިއާގެ ހަތަރު ފަރާތެއް ވަނީ، އައިސީސީ އިސް މަގާމުތައް ފުރުއްވައިފަ އެވެ. އެއީ، އައިސީސީގެ ރައީސަކަށް 1997-2000 އަށް ޖަގްމޯހަން ދަލްމިޔާ، 2010-2012 އަށް ހުންނެވި ޝަރަދު ޕަވަރުގެ އިތުރުން، ޗެއާމަނަކަށް 2014-2015 އަށް ހުރި ސްރިނިވާސަން އާއި 2015-2020 އަށް ހުންނެވި ޝަޝާން މަނޯހަރު އެވެ.

މަގާމުގެ ޒިންމާއާ ޖޭ ޝާހު ހަވާލުވިއިރު ވެސް މިއީ އުނދަގޫ ޗެލެންޖެކެވެ. އެއީ، އަންނަ އަހަރު ޕާކިސްތާންގައި ބާއްވަން ނިންމާފައި އޮތް އައިސީސީ ޗެލެންޖް ޓްރޮފީ މުބާރާތަށް އިންޑިއާ އިން ޕާކިސްތާނަށް ނުދާން ނިންމާފައި އޮތުމުން މުބާރާތުގެ ފޯމެޓާއި ސްޓޭޑިއަމްތަކާ ގުޅޭގޮތުން ނުނިންމި ހުރި ކަންކަން ގޮތަކަށް ނިންމުމެވެ.