ގޭންގުތައް ހުއްޓުވަން ފުލުހުން ކުރިއަށް ގެންދާ އޮޕަރޭޝަންތަކުގެ ތެރެއިން ބުރާސްފަތި ދުވަހުގެ ރޭ ހައްޔަރުކުރި އެންމެން ބަންދުން ދޫކޮށްލައިފި އެވެ.

ހޯމްލޭންޑް ސެކިއުރިޓީ މިނިސްޓަރު އަލީ އިހުސާން "އަދަދު" ނޫހާ ވާހަކަ ދައްކަމުން ވިދާޅުވީ، ހުޅުމާލެ ދެވަނަ ފިޔަވަހިން އެ ރޭ ފުލުހުން ހައްޔަރުކުރީ ޖުމްލަ 16 މީހުންނާއި ތިން ކުޑަކުދިން ކަމަށެވެ. މި މީހުން ހައްޔަރުކުރީ އޭގެތެރެއިން ފަސް މީހަކު ހައްޔަރުކުރަން ނެރުނު ކޯޓު އަމުރެއްގެ ދަށުން ހިންގުނު ރެއިޑެއްގައި ކަމަށެވެ.

އޭގެ ތެރެއިން 11 މީހުންނާއި ތިން ކުދިން ދޫކޮށްލީ ކޯޓަށް ނުގެންގޮހެވެ. ކޯޓަށް ނުގެންދިޔަ ނަމަވެސް މި މީހުން 24 ގަޑިއިރަށް ފުލުހުންގެ ބެލުމުގެ ދަށުގައި ބޭތިއްބީ ކަމަށާއި އެކަން އެ ގޮތަށް ކުރީ މުޖުތަމައުގެ މަސްލަހަތު ދެމެހެއްޓުމަށް ކަމަށް އިހުސާން ވިދާޅުވި އެވެ.

ކޯޓު އަމުރުގެ ދަށުން ހައްޔަރުކުރި ފަސް މީހުން ދޫކޮށްލީ އެ މީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ކޯޓުންނެވެ. ކޯޓުގެ ނިންމުމުގެ ބުނެފައިވަނީ، ސިލްސިލާކޮށް މާރާމާރީ ހިންގުމުގެ ތުހުމަތާއި ތޫނު ހަތިޔާރު ގެންގުޅުމުގެ ތުހުމަތު ކުރި ނަމަވެސް އެކަމަށް ބާރުދޭ ހެއްކެއް ފުލުހުން ހުށަހަޅާފައި ނުވާ ކަމަށެވެ.

އޭގެއިތުރުން، ގޭންގު ކުށްތައް މަނާކުރުމުގެ ގާނޫނުގެ ދަށުން މި މީހުންގެ މައްޗަށް ތުހުމަތު ކޮށްފައި ނުވާ ކަމަށާއި އެގޮތަށް ތުހުމަތު ނުކުރީ އެ ގާނޫނު ތަންފީޒުކުރުމުގައި ހުރި ގޮންޖެހުންތަކުގެ ސަބަބުން ކަމަށް ފުލުހުން ކޯޓުގައި ބުނެފައިވާ ކަމަށްވެސް ކޯޓު އަމުރުގައި ބުނެފައިވެ އެވެ.

އެކަމާ ގުޅިގެން މިނިސްޓަރު އިހުސާން ވިދާޅުވީ ކުރިއަށް އޮތް ދެ ހަފުތާގެ ތެރޭ ސަރުކާރުން މަޖިލީހަށް ހުށަހަޅާނެކަން އިއުލާނުކޮށްފައިވާ ގޭންގު ބިލާއެކުު ގޭންގު ކުށްތައް ހުއްޓުވަން ދިމާވާ ގާނޫނީ ހުރަސްތަކަށް ހައްލު ލިބިގެންދާނެ ކަމަށެވެ.