ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ހިންގަން އިމާރާތެއް ކުއްޔަށް ހިފި ގޮތާ ގުޅިގެން ސުވާލުތަކެއް އުފެދުމުން، އެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފަށައިފި އެވެ.

އޭސީސީގެ މީޑިއާ އޮފިޝަލް އައިޝަތު ސަމާ "އަދަދު" އަށް ވިދާޅުވީ އެންސްޕާއިން އިމާރާތް ކުއްޔަށް ހިފީ އުސޫލުގެ ތެރެއިންތޯ ބެލުމަށް އެދި އެ އިދާރާއިން ހުށަހަޅާފައިވާ މައްސަލަ ރަޖިސްޓާކޮށް ބަލަން ފަށާފައިވާ ކަމަށެވެ.

"މައްސަލަ މިހާރު ރަޖިސްޓާކޮށްފައި ވަނީ. ތަހުގީގު ވެސް ފެށިފައި ވަނީ. ތަފްސީލް ލިބޭ ވަރަކުން ހާމަކުރަމުން ދާނަން،" ސަމާ ވިދާޅުވި އެވެ.

އެންސްޕާއިން އެ އިމާރާތް ކުއްޔަށް ހިފީ ރައީސް ޑރ. މުހައްމަދު މުއިއްޒުގެ މަސްލަހަތު އޮތް އެމްއެމްޓީވީ ހިންގާ ކުންފުނި "މޯލްޑިވްސް މީޑިއާ ހައުސް" މެދުވެރިކޮށް ކަމަށް ބުނެ ތުހުމަތުތަކެއް ވަނީ އަމާޒުވެފަ އެވެ.

ނަމަވެސް އެންސްޕާއިން ބުނީ އޮފީސް އިމާރާތެއް ހޯދާފައި ވަނީ "އޮންނަ އުސޫލުގެ ތެރެއިން" ކަމަށެވެ.

"މި އޭޖެންސީ ހިންގަން އިމާރާތެއް ހޯދުމުގެ މުއާމަލަތަކީ މާލީ ވުޒާރާ އާއި މި އޭޖެންސީ އާ ދެމެދު އެކަން ކުރުމަށް ކަނޑައެޅިފައިވާ ގަވާއިދާއި އުސޫލުގެ ތެރެއިން ކުރެވިފައިވާ މުއާމަލާތެއް. އެއީ މި އޭޖެންސީ އާއި އެހެން އެއްވެސް ފަރާތަކާ ދެމެދު ކުރެވިފައިވާ މުއާމަލާތެއް ނޫން،" އެންސްޕާއިން ނެރުނު ބަޔާނެއްގައި ބުންޏެވެ.

އެންސްޕާއިން ބުނީ އެ އޭޖެންސީ ހިންގަން މުވައްޒަފުން ހޯދުމާއި އެ މުވައްޒަފުންގެ ޒިންމާތައް ހަވާލު ކުރުމަކީ ވެސް އެކަމަށް ކަނޑައެޅިފައިވާ އުސޫލުގެ ތެރެއިން ކުރަމުންދާ ކަންތައްތައް ކަމަށެވެ.

އެންސްޕާއިން އެފަދަ ބަޔާނެއް ނެރުނީ "އެމްއެމް ޓީވީ" ޗެނަލް ހިންގުމަށް، އެންސްޕާ މެދުވެރިކޮށް ދައުލަތުގެ ބަޖެޓުން މަހަކު ބައި މިލިއަނަށްވުރެ ގިނަ ރުފިޔާ ދޭން އެއްބަސްވެފައިވާކަމުގެ ތުހުމަތުތަކެއް އަމާޒުވެފައި ވަނިކޮށެވެ.

ފިނޭންސް މިނިސްޓްރީގެ ވެބްސައިޓުގައި ހުރި މައުލޫމާތުން އެނގޭ ގޮތުގައި އެންސްޕާގެ އޮފީސް އިމާރާތް ބަދަލުކުރަން، 12،000 އަކަފޫޓުގެ ތަނެއް، ހޯދަން ކުރި އިއުލާނުކުރީ ޓެންޑަ ބޯޑު މެދުވެރިކޮށެވެ. އެ އިއުލާނާ ގުޅިގެން އިމާރާތް ކުއްޔަށް ދޭން ހުށަހެޅީ ވެސް ހަމައެކަނި މޯލްޑިވްސް މީޑިއާ ހައުސިންނެވެ.

ފަނަރަ ބުރިއަށް ހަދާފައިވާ މއ. ސީރާޒީގެއިން ހަތަރު ފަންގިފިލާއެއް އެމްއެމްޓީވީ އަށް ކުއްޔަށް ނަގާފައިވާ ކަމަށް މައުލޫމާތު ލިބެ އެވެ. އޭގެތެރެއިން އެންސްޕާއަށް ކުއްޔަށް ދިނީ ދެ ފަންގިފިލާ ކަމަށް އިތުބާރުކުރެވޭ މަސްދަރުތަކުން މައުލޫމާތު ދީފައިވެ އެވެ. ސީރާޒީގޭގެ ޖުމުލަ ބޮޑުމިނަކީ 4365 އަކަފޫޓެވެ.

އެންސްޕާއިން ބޭނުންވާ 12،000 އަކަފޫޓުގެ ޖާގަ ލިބޭނީ ސީރާޒީގޭގެ ތިން ފަންގިފިލާއިންނެވެ. ދެ ފަންގިފިލާ ކުއްޔަށް ނަގާފައި ވާނަމަ އެއީ 8730 އަކަފޫޓެވެ.

އެންސްޕާގެ އޮފީސް ހިންގަން، ރައީސް މުއިއްޒުގެ މަސްލަހަތު އޮތް މޯލްޑިވްސް މީޑިއާ ހައުސިން އޮފީސް އިމާރާތެއް ކުއްޔަށް ދީފައި ވަނީ މަހަކަށް 580،000ރ. އަށެވެ. އެއީ ފަސް އަހަރަށް 34.8 މިލިއަން ރުފިޔާ އެވެ.

އޮފީސް އިމާރާތް ކުއްޔަށް ހިފުމުގެ މުއާމަލާތަކީ، އެ އޭޖެންސީ އާއި އެހެން އެއްވެސް ފަރާތަކާ ދެމެދު ކުރެވިފައިވާ މުއާމަލާތެއް ނޫން ނަމަށް ބުނެފައި ވިޔަސް، ޓެންޑަ ބޯޑު މެދުވެރުކޮށް އިއުލާނުކުރީ އެންސްޕާއިން އެކަމަށް އެދިގެންނެވެ.