މެންޗެސްޓާ (ނޮވެމްބަރު 30) - މެންޗެސްޓާ ސިޓީ މި ވަގުތު އޮތީ މީގެ ކުރިން އޭނާގެ ކޯޗިން ކެރިއަރުގައި ވެސް ކުރިމަތިލާންޖެހިފައިވާ ހާލަތެއްގައި ނޫން ކަމަށާއި އެހެންކަމުން، އޭނާ ބޭނުންވަނީ ފިލައިގެން އުޅުމުގެ ބަދަލުގައި އަމިއްލަ ނަފްސުގެ ފެންވަރު ސާބިތުކުރަން ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.

ސިޓީން ޖެހިޖެހިގެން ފަސް މެޗުން ބަލިވިއިރު، އެންމެ ފަހުން ކުޅުނު މެޗުގައި، ޗެމްޕިއަންސް ލީގުގައި ފެޔަނޫޑާ ދެކޮޅަށް، 3-0 އިން ކުރީގައި އޮއްވައި، ފަހު ވަގުތު ވަން ގޯލުތަކާ އެކު ސިޓީ ވަނީ އެއްވަރުވެފަ އެވެ. އެންމެ ފަހުން ކުޅުނު ހަ މެޗުގައި ވެސް ސިޓީ އަށް މޮޅެއް ލިބިފައިނުވާއިރު، ވިއްސަކަށް އަހަރުވާން ގާތްވެފައިވާ ގާޑިއޯލާގެ ކޯޗިން ކެރިއަރުގައި އޭނާ ހަވާލުވެހުރި ޓީމެއް، މޮޅެއް ނުލިބި ހަތް މެޗު ނިންމާލަން ޖެހިފައި ނުވެ އެވެ.

ލީގުގައި މާދަމާރޭ ލިވަޕޫލާ ދެކޮޅަށް ރަށުންބޭރުގައި ކުޅޭ މެޗަށް ނުކުތުމުގެ ކުރިން ގާޑިއޯލާ ބުނީ، މިއީ އޭނާ އަށް ވެސް އުނދަގޫ ވަގުތުތަކެއް ކަމަށެވެ.

"މިއި ފަސޭހަ ވަގުތެއް ނޫން. އަހަރެމެން އުންމީދުކޮށްގެން ވެސް ނުވާނެ އަބަދު ރަތް ކާޕެޓުގައޭ އަހަރެމެން . އުޅެން ޖެހޭނީ، ތެދެއް، ވަރަށް ރަނގަޅަށް ކަންކަން ދާނީ 12 ނޫނީ 13 މެޗުން ޖެހިޖެހިގެން މޮޅުވާއިރު، އެންމެން ފިޓްކޮށް ތިބެ، އެންމެން ފޯމުގައި ތިބެ، 26، 27، 28 ގައި ކުޅެލާއިރު، އެކަމަކު މިއީ ޗެލެންޖަކީ، އަހަރެން ފިލާކަށް ނޫޅެން ހަގީގަތާ ކުރިމަތިލައި އަމިއްލަ ނަފްސު ސާބިތުކޮށްދޭން ބޭނުމީ" ދާދި ފަހުން ސިޓީއާ އެކު، ހެދި ކޮންޓްރެކްޓް ދެ އަަހަރަށް އާ ކުރި ގާޑިއޯލާ ބުންޏެވެ.

ސިޓީއާ އެކު ކޮންޓްރެކްޓް އާ ކުރުމަކީ ގޯސްކޮށް ނިންމުނު ނިންމުމެއްގެ ގޮތުގައި ނުދެކޭ ކަމަށާއި ހާލަތު ބަދަލުކުރެވޭނެ ކަމުގެ ޔަގީންކަން އެބައޮތް ކަމަށް ގާޑިއޯލާ ވަނީ ބުނެފަ އެވެ.

ލިވަޕޫލް އަތުން ބަލިވެއްޖެނަމަ، މި ދެ ޓީމުގެ ޕޮއިންޓުގެ ފަރަގު 11 ޕޮއިންޓަށް ބޮޑުވާނެ އެވެ. ގާޑިއޯލާ ބުނީ، މި ވަގުތު ނެގެޓިވް ވިސްނުންތަކަށް ވުރެ ވިސްނަނީ ކަންކަން ރަނގަޅުކުރުމަށް ކަމަށާއި ހާލަތު ބަދަލުކުރުމުގެ ގޮތުން ކުރަން ޖެހޭ ކަންކަން ސިޓީ އަށް އެނގޭ ކަމަށް ވަނީ ބުނެފަ އެވެ.