ލަންޑަން (ނޮވެމްބަރު 30) - މެންޗެސްޓާ ޔުނައިޓެޑްގެ ވަގުތީ ކޯޗަކަށް ދާދި ފަހުން މަސައްކަތް ކުރި ނެދަލެންޑްސްގެ ކޯޗު ރޫޑް ވޭން ނިސްޓަލްރޫއީ، ލެސްޓާ ސިޓީގެ ކޯޗުކަމާ ހަވާލުވީ ޗެެލެންޖެއް ނެގުމުގެ ގޮތުން ކަމަށް ބުނެފި އެވެ.

ނިސްޓެލްރޫއީ، 48، ލެސްޓާއާ އެކު ސޮއިކުރީ، 2027 ވަނަ އަހަރުގެ ޖޫން މަހުގެ ނިޔަލަށް އޮތް ކޮންޓްރެކްޓެއްގަ އެވެ.

ޔުނައިޓެޑްގެ ކުރީގެ ކޯޗު އެރިކް ޓެން ހާގްގެ އެސިސްޓަންޓް ކޯޗަކަށް މިދިޔަ ޖޫން މަހު، ނިސްޓެލްރޫއީ، ސޮއިކުރީ ދެ އަހަރުގެ ކޮންޓްރެކްޓެއްގަ އެވެ. އެކަމަކު، އޮކްޓޫބަރު މަސް ތެރޭ ޓެން ހާގް ވަކިކުރުމާ ގުޅިގެން، ނިސްޓެލްރޫއީ ވަނީ 18 ދުވަހު ޔުނައިޓެޑްގެ ވަގުތީ ކޯޗެއްގެ ޒިންމާ އަދާކޮށްފަ އެވެ. އެ ދުވަސްތަކުގައި، ނިސްޓެލްރޫއީ ވަނީ ލެސްޓާ އަތުން ދެ ފަހަރު މޮޅުވެފަ އެވެ. އެއީ، ލީގު ކަޕްގައި 5-2 އިންނާއި ލީގުގައި 3-0 އިންނެވެ.

ޔުނައިޓެޑްގެ އާ ކޯޗު، ރުބެން އަމޮރިމްގެ ކޯޗިން ސްޓާފުންގެ ތެރެއިން ފުރުސަތު ނެތުމާ އެކު، ނިސްޓެލްރޫއީ އެކްލަބް ދޫކޮށް ލެސްޓާއާ ހަވާލުވީ، އެ ޓީމުގެ ކޯޗަކަށް ހުރި ސްޓީވް ކޫޕާ މަގާމުން ވަކިކުރިތާ ފަސް ދުވަސް ފަހުންނެވެ.

ޕީއެސްވީ އައިންދޯވަން އަށް ކުރިން ކޯޗުކޮށްދިން ނިސްޓެލްރޫއީ ބުނީ، ލެސްޓާ އަކީ ޕްރިމިއާ ލީގުގައި ކާމިޔާބު ހޯދާފައި އޮތް ރަނގަޅު ޓީމެއް ކަމަށާއި އެ ކްލަބާ ހަވާލުވީ ޗެލެންޖް ނެގުމުގެ ޝައުގުވެރިކަމުގެ ތެރެއިން ވަރުގަދަ ލީގެއްގައި މަސައްކަތް ކުރުމުގެ ބޭނުމުގައި ކަމަށެވެ.

ނިސްޓެލްރޫއީގެ ކޯޗުކަމުގައި ލެސްޓާ ކުޅޭ ފުރަތަމަ މެޗަކީ މިރޭ ބްރެންޓްފޯޑާ ދެކޮޅަށް ލީގުގައި އެ ޓީމުން ކުޅޭ މެޗެވެ.