ރާއްޖެ ސަރަހައްދަށް ވަދެ އުޅުނު މަސް ބޯޓަކުން މަސްތުވާތަކެތި އަތުލައިގަތް ދުވަހާއި އެއާ ޖެހިގެން އައި ދުވަހު އިންޑިއާ އާއި ސްރީލަންކާގެ ނޭވީ ގުޅިގެން އަރަބި ކަނޑުން ވެސް 500 ކިލޯގެ މަސްތުވާތަކެތި އަތުލައިގެންފައިވާކަން އިންޑިއަން ނޭވީން ހާމަކޮށްފި އެވެ.

އިންޑިއާ ނޭވީގެ ތަރުޖަމާނު، އެޑްމިރަލް ދިނޭޝް ކުމާރު ޓްރިޕާތީ އެކްސްގައި ކުރެއްވި ޕޯސްޓެއްގައި ވިދާޅުވީ އެ އޮޕަރޭޝަން ހިންގީ މިދިޔަ އާދީއްތަ ދުވަހާއި ހޯމަ ދުވަހު ކަމަށެވެ. އެ އޮޕަރޭޝަނުގައި ސްރީލަންކާގެ ދިދައިގައި ދަތުރު ކުރި ދެ ބޯޓު އަތުލައިގަތް ކަމަށާއި އެ ދެ ބޯޓުގައި 500 ކިލޯގެ ކްރިސްޓަލް މެތު ހުރި ކަމަށް ޓްރީޕާތީ ބުންޏެވެ.

އެ އޮޕަރޭޝަން ކުރިއަށް ގެންދިޔައީ ސްރީލަންކާގެ ދެ މަސް ބޯޓުގައި މަސްތުވާތަކެތި އުފުލާކަމަށް ބުނެ ސްރީލަންކާގެ ނޭވީން ދިން އިންޓެލިޖެންސް މައުލޫމާތުތަކެއްގެ މައްޗަށް ބިނާކޮށް ކަމަށް ވެސް ޓްރިޕާތީ ބުންޏެވެ.

އެ ދެ ބޯޓުގައި ތިބި ފަޅުވެރިންނާއި އަތުލައިގަތް މަސްތުވާތަކެތި ސްރީލަންކާއާ ހަވާލު ކުރުމުގެ މަސައްކަތް ކުރަމުންދާ ކަމަށް ޓްރިޕާތީ ބުންޏެވެ.

މިދިޔަ އާދީއްތަ ދުވަހު ރާއްޖެ ސަރަހައްދަށް ގަވާއިދާ ހިލާފަށް ވަދެ އުޅުނު މަސް ބޯޓެއްގައި މަސްތުވާތަކެތި އުފުލާ ކަމުގެ މައުލޫމާތު ސްރީލަންކާގެ ނޭވީން ފޯރުކޮށްދިނުމުން، ދިވެހި ކޯސްޓު ގާޑުން ވެސް ވަނީ އެ ބޯޓު އަތުލައިގެންފަ އެވެ. ކޯސްޓުގާޑުން ބުނީ އެ ބޯޓުގައި 468 މަސްތުވާތަކެތި ހުރި ކަމަށެވެ. އޭގެތެރޭގައި ހިމެނެނީ 344 ކިލޯގެ މެތު ކްރިސްޓަލް އާއި 124 ކިލޯގެ ކޮކެއިން އެވެ.