ފަލަސްތީނުގެ ބިންތައް އިޒްރޭލުން ފޭރެމުންދާ ދިޔުމާއި އިޒްރޭލުން ހިންގަމުންދާ ނަސްލުހޭދު ކުރުމާއި ގަތުލުއާއްމުތަކާ ދެކޮޅަށް ބައިނަލްއަގުވާމީ މުޖުތަމައު އެތިގަނޑަކަށްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގޮވާލައްވައިފި އެވެ.

ފަލަސްތީނުގެ ރައްޔިތުންނާއެކު ތިބިކަން ހާމަ ކުރުމުގެ ގޮތުން ބައިނަލްއަގުވާމީ ފެންވަރުގައި ފާހަގަކުރާ ދުވަހާ ގުޅުވައި އެކްސްގައި ރައީސް މިއަދު ކުރެއްވި ޕޯސްޓެއްގައި ވިދާޅުވީ އިންސާފު ހޯދައި އަމާން، ސުލްހަވެރި ދިރިއުޅުމެއް ހޯދުމަށް ފަލަސްތީނުގެ ރައްޔިތުން ކުރަމުންދާ މަސައްކަތުގެ ބައިވެރިއެއްގެ ގޮތުގައި ރާއްޖެ އަބަދުވެސް ދެމި އޮންނާނެ ކަމުގެ ޔަގީންކަން އަރުވާ ކަމަށެވެ.

އެމަނިކުފާނުގެ ޕޯސްޓުގައި ވަނީ، އިޒްރޭލާ ދެކޮޅަށް މުޅި ބައިނަލްއަގުވާމީ މުޖުތަމައު އެކަތިގަނޑަކަށްވުމަށް ގޮވާލައްވައިފަ އެވެ.

"ފަލަސްތީނުގެ ބިންތައް އިޒްރޭލުން ފޭރިގަނެ، ހިންގަމުންދާ ގަތުލުއާއްމުތަކާއި ނަސްލުހޭދު ކުރުން ހުއްޓުވުމަށް މުޅި ބައިނަލްއަގުވާމީ މުޖުތަމައުގެ ސިޔާސީ ނިޔަތާއި މާލީ ބާރުވެރިކަން ބޭނުންކޮށް އެކަތިގަނޑަކަށްވުމަށް އަޅުގަނޑުމެން ގޮވައިލަން،" ރައީސްގެ ޕޯސްޓުގައި ވިދާޅުވި އެވެ.

ފަލަސްތީނުގެ މައްސަލައަށް ދާއިމީ ހައްލެއް ލިބޭނީ 1967 ގެ ކުރިން އޮތް ބޯޑަރުތަކަށް ރުޖޫއަވެ، އިރުމަތީ ގުދުސް އެއީ ފަލަސްތީނުގެ ވެރި ރަށް ގޮތުގައި ކަނޑައަޅައި އެއީ މިނިވަން މުސްތަގިއްލު ދައުލަތެއްގެ ގޮތުގައި ބަލައިގަނެގެން ކަމަށް ވެސް ރައީސްގެ ޕޯސްޓުގައި ވިދާޅުވި އެވެ.