ދިވެހި ރައްޔިތުންނަށް މިހާރު މި ތިބެވެނީ 2008 ގައި ތަސްދީގުކުރި ފެހި ގާނޫނުއަސާސީ އެކުލަވާލި އިރު މި ގައުމު އޮތް ހާލަތުގައި ކަމަށް، ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު (ފިއްޓޭ) ވިދާޅުވެއްޖެ އެވެ.

އޭނާ ނިސްބަތްވާ އިދިކޮޅު އެމްޑީޕީން ރޭ ބޭއްވި ޖަގަހަ ޖަލްސާއެއްގައި ވާހަކަ ދައްކަވަމުން ޒިޔާދު ވަނީ، މިހާރުގެ ހާލަތާ ފެހި ގާނޫނު އަސާސީގެ ކުރިން ކުރީގެ ރައީސް މައުމޫން އަބްދުލްގައްޔޫމުގެ ދިގު 30 އަހަރާ ހުރި އެއްގޮތް ކަންތައްތައް ފާހަގަކުރައްވާފަ އެވެ.

އެގޮތުން މިނިވަން މުއައްސަސާތަކަށާއި މަޖިލީހަށް އަދި މީހުން ހައްޔަރުކޮށް އަދަބު ދިނުމަށް ރައީސް ޑރ. މުހައްމަދު މުއިއްޒު ކުރައްވަމުން ގެންދަވާ މަސައްކަތްތައް އޭނާ ވަނީ މިރޭ ލިސްޓުކުރައްވާފަ އެވެ.

އޭސީސީ އަދި އީސީގެ ވެރިން އައްޔަންކުރުމުގެ ބާރު ރައީސަށް ދިނުމަށް ގާނޫނު ބަދަލުކުުރުމާއި ސިޔާސީ ޕާޓީތަކުން ވަކިކުރުމުން މަޖިލިސް މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި ބަދަލުގެ އިތުރުން ދެ ހަފުތާ ތެރޭ ހުށަހަޅަން ނިންމާފައިވާ ގޭންގު ބިލު އޭނާ ވަނީ ފާހަގަކުރައްވާފަ އެވެ.

"މިބުނާ ދުވަސްވަރު ރައްޔިތުންގެ މަޖިލީހުގަ ތިއްބަވާނީ 50 މެންބަރުން. އެއީ ރާއްޖޭގެ ކޮންމެ އަތޮޅަކުން ދެ މެންބަރުންނާއި މާލޭގެ ދެ މެންބަރުންނާއި ރައީސުލްޖުމްހުރިއްޔާ އައްޔަންކުރައްވާ އަށް މެންބަރުން. އެ އަށް މެންބަރުންނަށް އޭރުގަ މި އިސްލާހީ މަސައްކަތުގަ އުޅުނު ބޭފުޅުން ކިޔާނީ ވަލު ދޮރޮއަށިން ވެއްދި މެންބަރުންނޭ. މިހާރު ރައްޔިތުން މަޖިލީހުގަ ތިއްބަވާނެ ރައީސުލްޖުމްހުރިއްޔާ އައްޔަންކުރައްވާފަ ތިއްބަވާ 78 މެންބަރުން،" އެމްޑީޕީގެ ޕީޖީގެ ޑެޕިއުޓީ ލީޑަރުކަން ވެސް ކުރައްވާ ފިއްޓޭ ވިދާޅުވި އެވެ.

ގާނޫނުއަސާސީއަށް ގެނައި ބަދަލާއެކު ޕީއެންސީގެ މެންބަރުންނަކީ ރައީސްގެ މެންބަރުންގެ ގޮތުގައި ސިފަ ކުރައްވައި ޒިޔާދު ވިދާޅުވީ، ރައީސަކު އަޒުލުކުރުމަށް ގާނޫނުއަސާސީން ލިބިދޭ ބާރު ވެސް މިހާރު ނިގުޅައިގަނެފައިވާ ކަމަށެވެ.

"ދެން ރައީސުލްޖުމްހުރިއްޔާ ނިންމަވަނީ އެ 78 މެންބަރުންނާއެކު. އަދި ފަސް މެންވަރުންގެ ކޮމިޓީއެއް ރައީސުލްޖުމްހުރިއްޔާ އޭސީސީއަށްވެސް ލައްވަނީ. އަދި ފަސް މެންބަރުންގެ ކޮމިޓީއަކުން ގޭންގުތައްވެސް ކަނޑައަޅަނީ، ކުށްތައްވެސް ކަނޑައަޅަނީ."

ޒިޔާދު ވިދާޅުވި ގޮތުގައި މިއީ ކޯޓުތަކުގެ ބާރު ކަނޑުވާލުމަށް ކުރެވޭ ކަމެއް ކަމަށާއި މިވަގުތު އޮތް ގޮތުން މަޖިލީހުގެ ރައީސާއި ރައީސުލްޖުމްހުރިއްޔާގެ ނައިބު ކަނޑައެޅުމުގެ ބާރުވެސް ރައީސް މުއިއްޒުއަށް ލިބިވަޑައިގެންފައިވާ ކަމަށެވެ.

"އަޅުގަނޑު ބުނެދޭން މިއުޅެނީ މި ގާނޫނު އަސާސީ ގެނައި އިރު އޮތް ހާލަތުގައޭ މިއަދު އަޅުގަނޑުމެންނަށް މި ތިބެވެނީ. ނޭނގި ނަމަވެސް. އެ ހިސާބަށް ފަހަތަށް އަޅުގަނޑުމެން ހިނގައްޖެޔޭ،" ޒިޔާދު ވިދާޅުވި އެވެ.

މަޖިލިސް މެންބަރުން ވަކިކުރުމުގެ ބާރު ސިޔާސީ ޕާޓީތަކަށް ދީ ގާނޫނުއަސާސީ ބަދަލުކުރަން އެންމެ ހަ ގަޑީރުގެ ތެރޭގައި މަޖިލީހުން ނިންމީ މިދިޔަ ހަފުތާ އެވެ. އޭސީސީ އަދި އީސީގެ ވެރިން އައްޔަންކުރުމުގެ ބާރު ރައީސަށް ދެއްވާ ގާނޫނުތައް ބަދަލުކުރީ މި ހަފުތާގެ ތެރޭގަ އެވެ.

ގޭންގުތައް ކަނޑައެޅުމުގެ ބާރު ހޯމް މިނިސްޓަރު ލީޑުކުރައްވާ ފަސް މެންބަރުންގެ ކޮމިޓީތަކަށް ލިބޭ ގޮތަށް އޮތް ގޭންގު ބިލު ދެ ހަފުތާ ތެރޭ މަޖިލީހަށް ވައްދާނެކަން ރައީސް އިއުލާނުކުރެއްވީ ނުރަސްމީ ދަތުރެއްގައި ޔޫރަޕުގައި ހުންނަވައިގެން އަންގާރަ ދުވަހު އެވެ.