ޓޫރިސްޓު ފެސިލިޓީތަކުން ރާއްޖޭގެ ބޭންކުތަކަށް ޑޮލަރު މާރު ކުރަން މަޖުބޫރުކޮށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އެކުލަވާލި ގަވާއިދު ގާނޫނަކަށް ބަދަލުކުރުމަށް ޑްރާފްޓުކޮށް އާންމުކުރި ބިލު ގާނޫނަކަށް ވުމުން، ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރުކުރަން ޖެހޭނެ ކަމަށް ވިދާޅުވެ ރައީސް ޑރ. މުހައްމަދު މުއިއްޒު ދޮގުހައްދަވައިފި އެވެ.

އެމްއެމްއޭއިން މި ބިލުގެ ޑްރާފްޓު އާންމުކުރީ އާންމުންނާއި ޓޫރިޒަމް ދާއިރާގެ ފަރާތްތަކުގެ މަޝްވަރާއާއި ހިޔާލު ހޯދުމަށެވެ. އެއާއެކު ރައީސް ތަކުރާރުކޮށް ބަދަލުނުކުރައްވާނެ ކަމަށް ވިދާޅުވި ޑޮލަރު މާރުކުރުމުގެ ގަވާއިދަށް ބަދަލުތަކެއް އައި ކަމަށް ބުނެ އިދިކޮޅު ސިޔާސީންނާއި އާންމުން ދަނީ ސޯޝަލް މީޑިއާގައި ރައީސަށާއި ސަރުކާރަށް ފާޑުކިޔަމުންނެވެ.

މިކަމާ ގުޅިގެން، ނުރަސްމީ ދަތުރެއްގައި އިނގިރޭސިވިލާތުގައި ހުންނަވާ ރައީސް ސޯޝަލް މީޑިއާގައި ކުރެއްވި ޕޯސްޓެއްގައި ވަނީ ގާނޫނު ބާރުވެރިކުރުމަށް އެމްއެމްއޭއިން ގާނޫނެއް ހެދުމުގެ މަސައްކަތް ފެށުމަކީ މުހިންމު ކަމެއް ކަމަށް ވިދާޅުވެ، މިކަމުން ލިބޭނެ ކަމަށް އެމަނިކުފާނު ތަސައްވަރުކުރައްވާ ފައިދާތައް ހާމަކުރައްވާފަ އެވެ. އަދި، މި ގާނޫނުގެ ދަށުން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރުކުރަން ޖެހޭނެ ކަމަށްވެސް ރައީސް ވިދާޅުވި އެވެ.

"މި ގާނޫނުގެ ސަބަބުން ރިސޯޓު ތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރު ކުރެވިގެންދާނެ،" ރައީސްގެ ޕޯސްޓުގައި ލިޔުއްވާފައިވާ އިބާރާތަކީ މިއީ އެވެ.

ނަމަވެސް، އަލަށް އެކުލަވާލާ ބޭރު ފައިސާގެ ގާނޫނަށް ޑްރާފްޓުކުރި ބިލުގައިވާ ގޮތުން، ރިސޯޓުތަކަށް އަންނަ ޓޫރިސްޓުންގެ ތެރެއިން "ކޮންމެ ޓޫރިސްޓަކަށް" 500 ޑޮލަރުގެ ރޭޓުގައި މާރުކުރާކަށް ނުޖެހެ އެވެ. މިހާރު އާންމުކޮށްފައިވާ ގަވާއިދުގައި ނުހިމެނޭ އާ އިސްތިސްނާތަކެއްވެސް ބިލުގައި ހިމަނާފައި ވެ އެވެ.

އެ ގޮތުން ރިސޯޓެއްގައި 24 ގަޑިއިރު ހޭދަ ނުކުރާ ފަރާތްތަކާއި ހިލޭ ނުވަތަ ކޮމްޕްލިމެންޓަރީކޮށް ތިބޭ ފަރާތްތަކުގެ އިތުރުން އުމުރުން ދެ އަހަރު ނުވާ ކުޑަކުދިންނަށް ވެސް ޑޮލަރު މާރުކުރާކަށް ނުޖެހެ އެވެ. މީގެ ތެރެއިން ދެ އަހަރު ނުފުރޭ ކުޑަކުދިން ފިޔަވާ އެހެން އެންމެނަށް މިހާރު ގަވާއިދު އޮތް ގޮތުން ޑޮލަރު މާރުކުރަން ޖެހޭނެ އެވެ.

މި ލުއީގެ އިތުރުން، ރަށްރަށުގައި ހިންގާ ބޮޑެތި ހޮޓާތަކާއި ސަފާރީތަކުން 500 ޑޮލަރުގެ ބަދަލުގައި 25 ޑޮލަރު މާރުކުރަން ޖެހޭ ގޮތަށް ވަނީ ހިމަނާފަ އެވެ.

އޮކްޓޯބަރު 1، ގައި އާންމުކޮށް އަންނަ އަހަރު އަމަލުކުރަން ފަށާ ގޮތަށް އޮތް އެމްއެމްއޭގެ ބޭރު ފައިސާގެ ގަވާއިދުގައި އޮތް ގޮތުން މީހުން ދިރިއުޅޭ ރަށްރަށުގައި 50 ކޮޓަރިއަށް ވުރެ ގިނައިން ހުންނަ ހޮޓާތަކާއި ސަފާރިތަކުން އަންނަ ކޮންމެ ޓޫރިސްޓެއްގެ ބޮލަށް 500 މާރުކުރަން ޖެހޭނެ އެވެ.

ނަމަވެސް އާންމުންގެ ހިޔާލު ހޯދުމަށް މިރޭ ހުޅުވާލި ބިލުގެ ޑްރާފްޓުގައި ރަށްރަށުގައި ހިންގާ ހޮޓާތަކާއި ސަފާރީތައް ވަނީ 500 ޑޮލަރު މާރުކުރަން ޖެހޭ އޭ ކެޓަގަރީގެ ތަންތަނުން، 25 ޑޮލަރު މާރުކުރަން ޖެހޭ ބީ ކެޓަގަރީއަށް ބަދަލުކޮށްފަ އެވެ.

މިހާރު އެކުލަވާލާފައިވާ ބިލަށް އާންމުންނާއި ޓޫރިޒަމް ދާއިރާގެ ފަރާތްތަކުގެ ހިޔާލު ހޯދުމަށް ވަނީ ހުޅުވާލާފަ އެވެ. އެމްއެމްއޭ އިން ބުނި ގޮތުގައި މި ބިލުގެ ޑްރާފްޓު މިހާރު ވަނީ ޓޫރިޒަމް ދާއިރާގައި ހަރަކާތްތެރިވާ ވިޔަފާރިތަކަށް ވެސް ފޮނުވާފަ އެވެ.