މެޑްރިޑް (ނޮވެމްބަރު 28) - މިދިޔަ ސީޒަން އަދި މި ސީޒަނުގައި ރެއާލް މެޑްރިޑް ކުޅުންތެރިންނަށް މަދުވެގެން 80 އަށް ވުރެ ގިނަ މެޗު ކުޅެން ޖެހުމުގެ އަސަރު ކުޅުންތެރިންގެ ފަރާތުން ފެންނަ ކަމަށާއި, ފީފާ އާއި ޔުއެފާ އިން އުސޫލު ބަދަލުކުރަން ޖެހޭ ކަމަށް ރެއާލްގެ ރައީސް ފްލޮރެންޓީނޯ ޕެރޭޒް ބުނެފި އެވެ.

ސީޒަން ދެބައި ނުވެ، ރެއާލްގެ ގިނަ ކުޅުންތެރިންނަށް އަނިޔާގެ މައްސަލަ ވަނީ ކުރިމަތިވެފަ އެވެ. އޭގެ ސަބަބުން އެ ކްލަބަށް މި ސީޒަނުގައި ބޮޑެތި ގެއްލުންތަކެއް ކުރިމަތިވެފައިވާއިރު, ރެއާލްގެ ކޯޗު ކާލޯ އަންޗެލޮޓީ ވެސް ވަނީ މީގެ ކުރިން, ކޮންމެ ސީޒަނަކު ގިނަ މެޗުތަކެއް ކުޅުންތެރިންނަށް ކުޅެން ޖެހޭތީ އެކަމުގެ ޝަކުވާ ކޮށްފަ އެވެ.

މީޑިއާ އަކަށް ދިން އިންޓަވިއުއެއްގައި ރެއާލްގެ ރައީސް ޕެރޭޒް ބުނީ 82 މެޗު ރެއާލްގެ ކުޅުންތެރިން މި ސީޒަނުގައި ވެސް ކުޅެން ޖެހޭނެ ކަމަށާއި, މިހާރު ވެސް 22 އަށްވުރެ ގިނަ އަނިޔާގެ މައްސަލަ ޓީމުގައި އުޅޭ ކަމަށެވެ.

"މި ސީޒަނުގައި ވެސް ރެއާލްގެ ކުޅުންތެރިންނަށް 82 މެޗު ކުޅެން (ކްލަބް/ގައުމީ ޓީމަށް) އެބަ ޖެހޭ. މިހާރުވެސް ރެއާލްގެ ގިނަ ކުޅުންތެރިން އެތިބީ އަނިޔާގެ އެކު ޖުމްލަ 22 އަށް ވުރެ އަނިޔާގެ މައްސަލަ ގިނަ" ޕެރޭޒް ބުންޏެވެ.

ޕެރޭޒް ބުނީ މިހާރުގެ ކުޅުންތެރިންނަށް ގިނަ މެޗު ކުޅެން ޖެހުމުން ވަރުބަލިކަން އިހުސާސްވާ ކަމަށެވެ. އެގޮތުން ރެއާލްގެ ތަރި ޖޫޑް ބެލިންގްހަމް އުމުރުން 21 އަހަރުގަ 200 އަށްވުރެ ގިނަ މެޗު ކުޅެފައިވާ ކަމަށް ޕެރޭޒް ބުންޏެވެ.

ޕެރޭޒް ބުނީ ސީޒަން ދިގުވުމުގެ މައްސަލަ ހައްލުކުރަން ފީފާ އަދި ޔުއެފާ އިން ވެސް މަސައްކަތް ނުކުރާ ކަމަށެވެ. އަދި އޭގެ ގެއްލުން ވަނީ ކުޅުންތެރިންނާ ކްލަބްތަކަށް ކަމަށް ޕެރޭޒް ބުންޏެވެ.