ދިރާގު އޮރެންޖް ބޮކްސް މެޝް ވައިފައި މެދުވެރިކޮށް، ގޭގެ ހުރިހާ ދިމާލަކަށް ފަސޭހަކަމާ އެކު އިތުބާރު ހިފޭ ކަނެކްޓިވިޓީ ލިބޭނެ ކަމަށް އެ ކުންފުނިން ބުނެފި އެވެ.

ދިރާގުން ބުނީ އޮރެންޖް ބޮކްސް މެޝް ވައިފައި މެދުވެރިކޮށް ހަލުވި، މެދުކެނޑުމެއް ނެތް އިންޓަނެޓް ގޭގައި ތަޖުރިބާކޮށްލުމަށް މަގުފަހިވެގެންދާނެ ކަމަށާއި އެ ޑިވައިސްއިން ގޭގެ އިންޓަނެޓް ކަވަރޭޖާއި ސިގްނަލް ވަރުގަދަކޮށް، އެކި ކޮޓަރިތަކާއި ފަންގިފިލާތަކަށް ހަލުވި ސްޕީޑްގެ ކަނެކްޓިވިޓީ ފޯރުކޮށްދޭ ކަމަށެވެ.

ދިރާގުގެ ކަސްޓަމާ ވެލިއު މެނޭޖާ ބްރޯޑްބޭންޑް އެންޑް ޑިވައިސްސް، އަހުމަދު އިޝާން ވިދާޅުވީ އެ ޑިވައިސްއާ އެކު ދިރާގުގެ ފައިބާ ބްރޯޑްބޭންޑް ކަސްޓަމަރުންނަށް އެންމެ ބަލާހިތްވާ ޝޯތައް ސްޓްރީމްކޮށްގެން ބެލަން ނުވަތަ ގޭމް ކުޅުމަށް ވެސް ގޭގެ ކޮންމެ ތަނެއް ހިޔާރު ކުރެވޭނެ ކަމަށެވެ.

އިންސްޓޯލްމަންޓް ޕްލޭންތަކާ އެކު މަހަކު އެންމެ 70ރ. އަށް ދިރާގު އޮރެންޖް ބޮކްސް މެދުވެރިކޮށް ކަސްޓަމަރުންނަށް މެދުކެނޑުމެއް ނެތި ގޭގައި އިންޓަނެޓް ކަނެކްޓިވިޓީ ތަޖުރިބާ ކޮށްލެވޭނެ އެވެ.

އެގޮތުން ދިރާގުގެ ފައިބާ ބްރޯޑްބޭންޑް ހިދުމަތް މިހާރު ބޭނުންކުރަމުންދާ ހުރިހާ ކަސްޓަމަރުންނަށްވެސް ދިރާގު މައިއެކައުންޓް މެދުވެރިކޮށް އެ އޮފަރއަށް އެޕްލައިކުރެވެ އެވެ.

އަދި އެ ކަސްޓަމަރުންނާ އެންމެ ކައިރީގައި ހުންނަ ކަސްޓަމާ ސާވިސް ސެންޓަރަކަށް ގޮސްގެން އޮރެންޖް ބޮކްސް ޑިވައިސް ލިބޭނެ އެވެ.

ދިރާގުން އަބަދުވެސް މަސައްކަތްކުރަނީ ރާއްޖޭގައި ދިރިއުޅޭ ރައްޔިތުންގެ ދިރިއުޅުން އިތުރަށް މުއްސަނދިކޮށް، އެ ފަރާތްތަކަށް އައު، ހިތްގައިމު އޮފަތަކެއް ފޯރުކޮށްދިނުމަށް ކަމަށް އެ ކުންފުނިން ބުންޏެވެ.