ދިރާގުގެ ސީއެސްއާރްގެ ދަށުން ކުޅުއްދުފުށި ސިޓީގައި ހުންނަ ހދ. އަތޮޅު ތައުލީމީ މަރުކަޒުގެ ސްޕެޝަލް އެޑިއުކޭޝަން ނީޑްސް (ސެން) ޔުނިޓްކަމަށްވާ ސަންޝައިން ކްލާހަށް ވަސީލަތްތައް ފޯރުކޮށްދީ އެހީތެރިކަން ފޯރުކޮށްދީފި އެވެ.

ދިރާގުން ހދ. އަތޮޅު ތައުލީމީ މަރުކަޒަށް ފޯރުކޮށްދިން ވަސީލަތްތަކުގައި އޮޓޮމެޓިކް ގޮނޑިއާއި ލޮކިންގް ގޮނޑީގެ އިތުރުން ކުލާހުގެ ސެންސަރީ އަދި އެކްޓިވިޓީ ޔުނިޓަށް ބޭނުންވާ ވަސީލަތް ހިމެނެ އެވެ.

ދިރާގުން ބުނީ އެ އެހީތެރިކަމުގެ ސަބަބުން ތަފާތު ނުކުޅެދުންތެރިކަން ހުންނަ ކުދިންނަށް ހާއްސަކޮށްގެން ހދ. އަތޮޅު ތައުލީމީ މަރުކަޒުގެ ސްޕެޝަލް އެޑިއުކޭޝަން ޔުނިޓްގެ ކްލާސްރޫމް ސެޓަޕް އިތުރަށް ފުރިހަމަވެގެންދާނެ ކަމަށެވެ.

ދިރާގުގެ ކުޅުދުއްފުށި އޮޕަރޭޝަންސް ސެންޓާގެ އެސިސްޓަންޓް މެނޭޖާ އޮޕަރޭޝަންސް، މުހައްމަދު އަލީ ވަނީ އެއްވެސް ކުއްޖަކު ބާކީނުވާނޭހެން މުޖުތަމަޢުގައި ޝާމިލުކުރުމަށް އެއްބާރުލުން ދިނުމަކީ ދިރާގުން ހާއްސަ އަހަންމިއްޔަތުކަމެއް ދޭ ކަމެކަމަށް ވިދާޅުވެފަ އެވެ.

އަދި އުއްމީދަކީ އެ ވަސީލަތްތަކުގެ ސަބަބުން ސްކޫލުގެ ތީޗަރުން ކުރަމުން އަންނަ މިންނެތް މަސައްކަތަށް އިތުރު އެހީތެރިކަމެއް ލިބި، ހުރިހާ ކުދިންނަށް ވެސް ކުރިއެރުމާއި އުނގެނުމުގެ ފުރުސަތުތައް ތަނަވަސްވެގެން ދިޔުން ކަމަށް ވެސް އޭނާ ވަނީ ވިދާޅުވެފައެވެ.

ހދ. އަތޮޅު ތައުލީމީ މަރުކަޒުގެ ޕްރިންސިޕަލް، މުހައްމަދު މަތީން ވަނީ ސަންޝައިން ކުލާހަށް ލިބިގެން މިދިޔަ ވަސީލްތްތަކުގެ ސަބަބުން، އިންކްލޫސިވް އެޑިއުކޭޝަން ފޯރުކޮށްދިނުމަށް ސްކޫލުން ކުރަމުންދާ މަސައްކަތަށް ބޮޑު ކުރިއެރުމެއް ލިބިގެންދާނެކަމަށް ވެސް ޕްރިންސިޕަލް މަތީން ފާހަގަކުރެއްވި އެވެ.

ދިރާގުން އަބަދުވެސް މަސައްކަތް ކުރަމުންދަނީ މުވާސަލާތީ ގުޅުމުގެ އިތުރުން މުޖުތަމަޢުއަށް ބޭނުންވާ ކަންކަމުގައި އެހީތެރިކަން ފޯރުކޮށްދިނުމަށެވެ. މިގޮތުން ދިރާގުން މިހާރުވެސް ދަނީ ކުޑަކުދިންނަށް އެހީތެރިވުމާއި މުޖުތަމަޢުގެ ޒުވާނުން ބާރުވެރިކުރުވުމުގެ ގިނަ މަސައްކަތްތަކެއް ކުރަމުންނެވެ.