ރައީސުލްޖުމްހޫރިއްޔާގެ މަގާމު އަދާކުރައްވާ ބޭފުޅުންނަށް ހާއްސަކޮށްފައި އޮންނަ ދައުލަތުން ހަރަދުކުރާ ކ. އާރަށަށް ރައީސް ޑރ. މުހައްމަދު މުއިއްޒު އާއި އަނބިކަނބަލުން ސާޖިދާ މުހައްމަދު ކުރެއްވި ދަތުރުތަކުގެ އަދަދާއި ތަފުސީލު ނޭނގޭ ކަމަށް ރައީސް އޮފީހުން ބުނެފި އެވެ.

ރައީސް މުއިއްޒުގެ ވެރިކަމަށް މި ވީ އަހަރުގެ ތެރޭގައި، ރައީސްގެ ދެކަނބަލުން އާރަށަށް ވަޑައިގެންނެވީ ކިތައް ފަހަރުތޯ ސާފުކުރުމަށް މި ނޫހުން ރައީސް އޮފީހުގައި އެދުނީ ނޮވެމްބަރު 18، ގަ އެވެ. މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން ހުށަހެޅުމުން ރައީސް އޮފީހުން ޖަވާބު ދީފައިވަނީ މިއަދު އެވެ.

އެ އޮފީހުން ބުނީ، ރައީސް އަދި އަނބިކަނބަލުން ސާޖީދާ އާރަށަށް ކުރައްވާ ދަތުރުގެ މައުލޫމާތަކީ އެ އޮފީހުން ބަލަހައްޓާ މައުލޫމާތެއް ނޫން ކަމަށެވެ. އަދި، އެ މައުލޫމާތު އެ އޮފީހުގައި ނެތް ކަމަށް ވެސް ބުނެފައިވެ އެވެ.

މީގެއިތުރުން، މި ވެރިކަމުގައި ދައުލަތުގެ ބަޖެޓުން އާރަށަށް ކޮށްފައިވާ ހަރަދުގެ ތަފުސީލަށް ވެސް މި ނޫހުން ވާނީ އެދިފަ އެވެ. ނަމަވެސް, ރައީސް އޮފީހުން ވަނީ އެ މައުލޫމާތު ބަލަހައްޓަނީ ޑިފެންސް މިނިސްޓްރީން ކަމަށް ބުނެ އާރުޓީއައި ގެ އެ ބައި ޑިފެންސަށް ޓްރާންސްފާ ކޮށްފަ އެވެ.

ރައީސްގެ ދެކަނބަލުން އާރަށަށް ގިނަ އަދަދަކަށް ދަތުރުކުރާ ކަމަށާއި އެ ރަށަށް ދައުލަތުން ބޮޑެތި ހަރަދުތަކެއް ކުރާ ކަމަށް މި ފަހުން އަޑުފެތުރުނެވެ.

މި އަޑުތަކާ ގުޅިގެން އޮކްޓޯބަރު 30، ގައި ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ ތަރުޖަމާނު ހީނާ ވަލީދުއާ ނޫސްވެރިޔަކު ވަނީ ސުވާލު ވެސް ކޮށްފަ އެވެ. ނަމަވެސް އެ ސުވާލަށް ހީނާ ސީދާ ޖަވާބެއް ނުދެއްވަ އެވެ.

އެގޮތުން ވިދާޅުވީ، އާރަށަށް ވަޑައިގަތުމަކީ ރައީސުންނަށާއި ރައީސުންގެ އަނބިކަނބަލުންނަށް ލިބިދޭ އިހުތިޔާރެއް ކަމަށެވެ. އަދި އެ ރަށުގައި ވަޒީރުންނާ އެކު ބައްދަލުވުންތައް ބޭއްވުމަކީ ވެސް ލިބިފައި އޮތް އިހުތިޔާރެއް ކަމުގައި ހީނާ އެދުވަހު ވިދާޅުވި އެވެ.