ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ, ކުރީގެ ރައީސް މުހައްމަދު ނަޝީދުއާ މިއަދު ބައްދަލުކުރައްވައިފި އެވެ.

އެ ބައްދަލުވުމުގެ ވާހަކަ ރައްޔިތުންގެ މަޖިލީހުން އަދި ނަޝީދުގެ ފަރާތުން ރަސްމީކޮށް ހާމައެއް ނުކުރެ އެވެ. ނަމަވެސް އަބްދުއްރަހީމް އާއި ނަޝީދު މިއަދު ހެނދުނު، ނަޝީދު ދިރިއުޅުއްވާ ގ. ކެނެރީގޭގައި ބައްދަލުކުރެއްވިކަން، އެ މައުލޫމާތު އެނގޭ ބައެއް މީހުން "އަދަދު" ނޫހަށް ކަށަވަރުކޮށް ދެއްވި އެވެ.

Advertisement

މިކަމާ ގުޅޭ ގޮތުން ރައްޔިތުންގެ މަޖިލީހުގެ މީޑިއާ އޮފިޝަލްއާ ސުވާލުކުރުމުން ޖަވާބެއް ނުދެ އެވެ.

އަބްދުއްރަހީމް އާއި ނަޝީދު ބައްދަލު ކުރެއްވީ ކޮން ބޭނުމެއްގައި ކަމެއް ނޭނގެ އެވެ. މި ދެ ބޭފުޅުން ބައްދަލު ކުރެއްވިއިރު، ރައީސް ޑރ. މުހައްމަދު މުއިއްޒު ހުންނެވީ ނުރަސްމީ ދަތުރެއްގައި އިނގިރޭސިވިލާތުގަ އެވެ.

ރައްޔިތުންގެ މަޖިލީހުގެ ރައީސްގެ މަގާމުން މި އަހަރު ކުރީކޮޅު އިސްތިއުފާ ދެއްވުމަށްފަހު ނަޝީދު މިހާރު ދިރިއުޅުއްވަނީ ގާނާގަ އެވެ. ގާނާއަށް ވަޑައިގެންނެވީ އެމަނިކުފާނު އިސްވެ އުފެއްދެވި ކްލައިމެޓް ވަލްނެރިބިލިޓީ ފަންޑު (ސީވީއެފް) ގެ ސެކްރެޓަރީ ޖެނެރަލް މަގާމު އަދާކުރެއްވުމަށެވެ.

Advertisement

ނަމަވެސް މީގެ ދުވަސްކޮޅެއް ކުރިން ނަޝީދު ވަނީ މާލެ ވަޑައިގެންފަ އެވެ. ގާނާއަށް ދިރިއުޅުން ބަދަލު ކުރެއްވިފަހުން މީގެ ކުރިން ވެސް ނަޝީދު ވަނީ މާލެ ވަޑައިގެންފަ އެވެ.

ރައީސް މުއިއްޒު ވެރިކަމަށް ގެނައުމަށް ނަޝީދުގެ ދަ ޑެމޮކްރެޓްސް ޕާޓީގެ ގިނަ މެންބަރުން ނުރަސްމީކޮށް ތާއިދު ކުރެއްވި އެވެ. ނަމަވެސް ރައީސް މުއިއްޒުގެ ސަރުކާރަށް ޑިމޮކްރެޓުންގެ އިސްވެރިން ދަނީ ފާޑުކިޔަމުންނެވެ.

ނަޝީދު އާއި ކުރީގެ ރައީސް އިބްރާހިމް މުހައްމަދު ސޯލިހުއާ ދެމެދު އުފެދުނު މައްސަލަތަކުގައި ނަޝީދު ބޭނުންވެވަޑައިގެންނެވީ ސޯލިހުގެ ވެރިކަން ނިމުމަކަށް ގެނައުމަށެވެ.