އަލް ހޯރް، ގަތަރު (ނޮވެމްބަރު 26) - އޭޝިއާގެ އެންމެ ބޮޑު ކްލަބް ފުޓްބޯޅަ މުބާރާތް، އޭއެފްސީ ޗެމްޕިއަންސް ލީގު އެލީޓްގައި ކްރިސްޓިއާނޯ ރޮނާލްޑޯގެ ދެ ގޯލާ އެކު، ސައުދީ އަރަބިއްޔާގެ އަލް ނަސްރުން ގަަތަރުގެ އަލް ގަރާފާ އަތުން 3-1 އިން މޮޅުވެއްޖެ އެވެ.

މިއީ، ރޮނާލްޑޯ، 39، އޭއެފްސީ ޗެމްޕިއަންސް ލީގުގައި މި ފަހަރުގެ މުބާރާުތުގައި ހަތަރު ވަަނަ މެޗެވެ. އޭނާ ވަނީ މި މުބާރާތުގައި ކުޅުނު ހަތަރު މެޗުން ހަތަރު ލަނޑު ޖަހައިފަ އެވެ. އަލް ނަސްރުގެ މެޗުތަކުގައި، މި ސީޒަނުގައި ރޮނާލްޑޯ ވަނީ 17 މެޗުން 13 ގޯލު ޖަހައިފަ އެވެ.

ޗެމްޕިއަންސް ލީގު އެލީޓްގެ ވެސްޓް ޒޯން ލީގު ތާވަލަށް ބަލާއިރު، އެއް ވަނައިގައި ސައުދީގެ އަލް އަހްލީ އޮތީ ފަސް މެޗުން 15 ޕޮއިންޓާ އެކު އެވެ. ދެ ވަނައިގައި އޮތް އަލް ނަސްރަށް ވަނީ ފަސް މެޗުން 13 ޕޮއިންޓް ލިބިފަ އެވެ.

ތިން ވަނައިގައި އޮތް އަލް ހިލާލަށް ހަތަރު މެޗުން 12 ޕޮއިންޓް ލިބިފައިވާއިރު، މެޗު ހަމަކޮށް އެ ޓީމަށް އެއް ވަނަ އަށް އެރޭނެ އެވެ. އަލް ހިލާލް އިން މިރޭ ކުޅޭނީ ގަތަރުގެ އަލް ސާދުއާ އެވެ.

އަލް ނަސްރުން ރޭ ލީޑުނެގީ ދެ ވަަނަ ހާފުގެ ފުރަތަމަ މިނިޓްގައި ރޮނާލްޑޯ ޖެހި ގޯލުންނެވެ. އޭގެ 11 މިނިޓް ފަހުން، އެންޖެލޯ ގަބްރިއޭލް ވަނީ އޮޓާވިއޯ ދިން ބޯޅައަކުން ގޯލު ޖަހައި އަލް ނަސްރުގެ ލީޑުފުޅާކޮށްދީފަ އެވެ. އެންޖެލޯ ދިން ބޯޅައަކުުން ރޮނާލްޑޯ ވަނީ އަލް ނަސްރަށް ތިން ވަނަ ގޯލެއް ޖަހައިދީފަ އެވެ.

އަލް ގަރާފާގެ ހަމައެކަނި ލަނޑު، މެޗުގެ 75 ވަަނަ މިނިޓްގައި ޖެހީ ކުރިން ރެއާލް މެޑްރިޑަށް ކުުޅުނު ސްޕެއިންގެ ފޯވާޑް، ޖޮސޭލޫ އެވެ.

އަލް ގަރާފާ އިން މެޗު ނިންމާލީ ކުޅުންތެރިއަކު މަދުކޮށެވެ. އެއީ، މެޗުގެ 84 ވަަނަ މިނިޓްގައި އެ ޓީމުގެ ޑިފެންޑަރު، ސޭޑޫ ސާނޯ އަށް ރަތް ކާޑެއް ދެއްކުމުންނެވެ. އޭނާ އަށް ރަތް ކާޑު ދެއްކީ ދެ ރީނދޫ ކާޑު ހަމަވުމުންނެވެ.