އިސްތަންބޫލް (ނޮވެމްބަރު 25) - ސައުދީ ޕްރޯ ލީގުގެ އަލް ނަސްރަށް ކުޅެމުން އަންނަ ޕޯޗުގީސް ތަރި، ކްރިސްޓިއާނޯ ރޮނާލްޑޯ ތުރުކީ އަށް އަށް ގެނެވެން އޮތީ ހަަމައެކަނި "ކެއުމަކަށް" ކަމަށް ފެނަބާޗޭގެ ކޯޗު ހޯސޭ މޮރީނިއޯ ބުނެފި އެވެ.

މޮރީނިއޯ، މިހެން ބުނެފައިވަނީ، މި ސީޒަނަށް ފަހު ރޮނާލްޑޯ، 39، އަލް ނަސްރާ އެކު ހަދާފައިވާ ކޮންޓްރެކްޓް ހަމަވުމުން އޭނާ ފެނަބާޗޭ އަށް ބަދަލުވާން އުޅޭ ކަމުގެ ވާހަކަތަކެއް ތުރުކީ މީޑިއާގައި ދެކެވި، އެކަމާ ގުޅޭގޮތުން ސުވާލުކުރުމުންނެވެ.

"ރޮނާލްޑޯ، ފެނަބާޗޭ އަށް އަންނަން އުޅޭ ކަމަށް ދެކެވޭ ވާހަކަ އަކީ އެއް ވެސް ވަރަކަށް ހަގީގަތެއް ނޫން،" ރޮނާލްޑޯ އަށް ރެއާލް މެޑްރިޑްގައި ކޯޗުކޮށްދިން މޮރީނިއޯ ބުންޏެވެ.

"ކްރިސްޓިއާނޯ (ރޮނާލްޑޯ) އިސްތަންބޫލަށް އައިސްފާނެ ކެއުމަކަށް. އެއީ (ތުރުކީ މި އޮތީ) ސައުދީ އަރަބިއްޔާ އާއި ޕޯޗުގަލްއާ ދާދި ގާތުގައި، ދެން ފަހަރެއްގައި، އޭނަ (ރޮނާލްޑޯ) އަތުވެދާނެ ކުރީގެ އެކުވެރިޔާ ޖޯސޭއާ ބައްދަލުކޮށްލަން، އޭރުން އަހަރެމެން ދެ މީހުންނަށް ވެސް އެކުގައި ކެވޭނެ ހޮޓަލުގައި ތިބެގެން،"

މިދިޔަ އަހަރު އަލް ނަސްރަށް ބަދަލުވި ރޮނާލްޑޯގެ ކޮންޓްރެކްޓް އަންނަ އަހަރު ހަމަވާނެ އެވެ. ސައުދީ ގަދަބާރު އަލް ހިލާލުން ރޮނާލްޑޯ ގެންދަން ވާހަކަ ދައްކާ ކަމަށް ވެސް މީޑިއާގައި ވާހަކަދެކެވޭއިރު، ރޮނާލްޑޯގެ ފުރަތަމަ ކްލަބް ސްޕޯޓިން ލިޒްބަން އިން ވެސް އޭނާ އެ ޓީމަަށް ކުޅުވަން ޝައުގުވެރިކަން ފާޅުކޮށްފައިވެ އެވެ.