ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭ ގޮތް ބަޔާންކޮށް ގާނޫނުއަސާސީގެ 73 ވަނަ މާއްދާއަށް ގެނައި އިސްލާހުތައް ބާތިލްކުރަން ސުޕްރީމް ކޯޓަށް ހުށަހެޅި ދުސްތޫރީ މައްސަލައަށް ދަ ޑިމޮކްރެޓްސްއިން ތަދައްހުލްވާން ނިންމައި އެ މަސައްކަތް އެ ޕާޓީން މިއަދު ހާމަކޮށްފި އެވެ.

ޑިމޮކްރެޓްސްއިން ނެރުނު ނޫސް ބަޔާނެއްގައި ބުނީ ރައްޔިތުންގެ މަޖިލީހުގެ މެންބަރަކު ޕާޓީ ބަދަލު ކުރުމުން އެ މެންބަރެއްގެ ގޮނޑި ގެއްލުމަށް އެ ޕާޓީން ތާއީދު ކުރާ ކަމަށާއި ނަމަވެސް ސަރުކާރުން ހަތަރު ގަޑިއިރެއްހާއިރު ތެރޭގައި އަވަސް އަރުވާލައިގެން އެ ބަދަލު ގެނައީ ރައްޔިތުންގެ މަޖިލީހުގެ ބާރާއި ބޭނުން ކަނޑުވާލުމަށްފަހު ކަމަށެވެ.

"ގާނޫނު ނަންބަރު 2024/25 (ދިވެހި ޖުމްހޫރިއްޔާގެ ގާނޫނުއަސާސީއަށް 6 ވަނަ އިސްލާހު ގެނައުމުގެ ގާނޫނު) އަކީ ރައްޔިތުންގެ މަޖިލީހުގެ ބާރާއި ބޭނުން ކަނޑުވާލާ، ގާނޫނުއަސާސީގެ ކިތަންމެ ތަސައްވުރަކާ ދެކޮޅަށް އޮތް އަދި ވަކިން ހާއްސަކޮށް ގާނޫނުއަސާސީގެ އަސާސީ ސިފަތަކާއި އޮނިގަނޑު ބަދަލުގެނުވާ ބޭސިކް ސްޓްރަކްޗާ ޑޮކްޓްރިންއާ ހިލާފު ގާނޫނުނެއް،" އެ ޕާޓީން ބުންޏެވެ.

ޑިމޮކްރެޓްސްއިން ބުނީ ރިޔާސީ ނިޒާމެއް ކަމަށް ކަނޑައަޅާ އެ ބީދައިން ގާނޫނުއަސާސީ ފަރުމާކުރެވި ދައުލަތުގެ ތިން ބާރު އެއްބާރު އަނެއް ބާރާއި ސާފުކޮށް ވަކިކުރެވިފައި އޮތްއޮތުން އެ އިސްލާހުގެ ސަބަބުން ނިމުމަކަށް އައިސް ސީދާ ރައީސުލްޖުމްހޫރިއްޔާގެ މުށުތެރެއަށް ރައްޔިތުންގެ މަޖިލިސް ގެނެސްފައިވާ ކަމަށެވެ.

އެ ގޮތުން ގާނޫނުއަސާސީ ތަސައްވުރުކުރާ އެންމެ އަސާސީ އެއް ސިފަ ކަމުގައިވާ ބާރުތައް ވަކިވެފައިވާ ވެރިކަމުގެ ނިޒާމު އުވި އަދި ދައުލަތުގެ އެންމެ ބާރުތައް ރައްޔިތުންގެ ކިބައިން ފެށިގެން އަންނަ އައުމާއި ރައްޔިތުންގެ ކިބައިގައި އެ ބާރުތައް ދެމިއޮންނަން ވާނެކަމަށް ބަޔާންކޮށްފައިވާ ބަޔާންކުރުމާ ހިލާފުވެފައިވާ ކަމަށް ވެސް އެ ޕާޓީން ފާހަގަކުރި އެވެ.

ޑިމޮކްރެޓްސްއިން ބުނީ ރައްޔިތުންގެ މަޖިލީހުގެ ބާރުތަކުގެ ގޮތުގައި ގާނޫނުއަސާސީގައި ސާފުކޮށް ބަޔާންކޮށް ކަށަވަރުކޮށްދީފައިވާ ހައްގުތައް ނިގުޅައިގަނެ، އިންތިހާބީ މަގާމުތަކުގެ ދެމިއޮތުމާއި ނެތުން ސިޔާސީ ޕާޓީއެއްގެ އައްޔަނުކުރެވޭ ފިޔަވަޅު އަޅާ ކޮމިޓީއެއްގެ ބާރުގެ ދަށަށް ގެނައުުމުން ކަންބޮޑުވާ ކަމަށެވެ.

އެއްވެސް ސަބަބަކާ ހުރެ އެ ޕާޓީއެއްގެ ލީޑަޝިޕަށް ނުވަތަ ފިޔަވަޅު އަޅާ ކޮމިޓީއަށް ފެނި އެ އެންމެ މެމްބަރުން ނުވަތަ މަޖިލީހުގެ ޖަލްސާއެއް ބޭއްވުމަށް ބޭނުންވާ އަދަދު ހަމަނުވާނެ މިންވަރަށް މެމްބަރުން ވަކިކޮށްފި ހާލަތުގައި، މުޅި ނިޒާމު ހުއްޓުމަކަށް އައިސް، ގާނޫނީ ހުސްކަމެއްގެ ތެރެއަށް ގައުމު ވެއްޓި، ވަކި ސިޔާސީ ޕާޓީއެއްގެ އަތްމައްޗަށް ދައުލަތުގެ އެންމެހައި ބާރުތައް ނެގުމުގެ ފުރުސަތު ހޯދާފައިވާ ކަމަށް ވެސް ޑިމޮކްރެޓްސްއިން ބުންޏެވެ.

"މިހާރު އިންތިހާބުކުރެވި ހިނގަމުންދާ ރައްޔިތުންގެ މަޖިލީހުގެ ދައުރަށް މެމްބަރުން އިންތިހާބުކުރެވުނު އިރު ސިޔާސީ ޕާޓީއަކަށް ފެނިއްޖެ ހާލަތުގައި އެ މެމްބަރުގެ ގޮނޑި ގެއްލުވާލުމަކީ ހުޅުވިފައި އޮތް ފުރުސަތަކަށް ނުވޭ. އަދި މި އިސްލާހުގައިވެސް ހިނގަމުންދާ ދައުރުގެ މަޖިލިސް މެމްބަރުންނާ ގުޅޭ ސާފު ބަޔާންކުރުމެއް ނެތި އާންމު މާނަކުރުމަށް ޖާގަ ހުޅުވާލެވިފައިވުމާއި އަދި މިނޫންވެސް ގާނޫނުއަސާސީއާއި، ގާނޫނުއަސާސީގެ އަސާސީ ސިފަތަކާއި އޮނިގަނޑު ބަދަލު ގެނުވާ އަދި ފުށުއަރާ ކިތަންމެ ކަމެއް ފާހަގަކުރެވޭ" އެ ޕާޓީން ބުންޏެވެ.

މި މައްސަލަ ސުޕްރީމް ކޯޓަށް ހުށަހެޅުއްވީ ކެންދޫ ދާއިރާގެ ކުރީގެ މެންބަރު އަލީ ހުސައިނެވެ. އޭނާ ހުށަހެޅުއްވި މައްސަލައިގައި ވަނީ ގާނޫނު އަސާސީއަށް ގެނައި ބަދަލަކީ ދައުލަތުގެ ބާރުތައް ދެމިއޮތުމުގެ އަސާސާއި، ދައުލަތުގެ އެންމެހައި ބާރުތައް އެ އަސާސްގެ ދަށުން ހިނގަން ވާނެ ކަމަށް ބުނާ އަސާސާއި، މިނިވަން ބާރެއްގެ ގޮތުގައި ރައްޔިތުންގެ މަޖިލިސް ދެމި އޮތުމަށް ގާނޫނުއަސާސީގައި ކަނޑައަޅާފައި އޮތް ދުސްތޫރީ ހަމައާ ހިލާފު ކަމެއް ކަމަށެވެ.

މި މައްސަލައިގެ ތެރެއަށް އެމްޑީޕީން ވެސް ވަނީ ތަދައްހުލްވެފަ އެވެ.