ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭ ގޮތް ބަޔާންކޮށް ގާނޫނުއަސާސީގެ 73 ވަނަ މާއްދާއަށް ގެނައި އިސްލާހުތައް ބާތިލްކުރަން ސުޕްރީމް ކޯޓަށް ހުށަހަޅާފައިވާ މައްސަލައަށް ތަދައްހުލްވާން އިދިކޮޅު އެމްޑީޕީން ނިންމައިފި އެވެ.

ކުއްލި ގޮތަކަށް ރައްޔިތުންގެ މަޖިލީހުން ގާނޫނުއަސާސީގެ 73 ގެނައި ބަދަލު ބާތިލުކުރުމަށް އެދި ސުޕްރީމް ކޯޓަށް މައްސަލަ ހުށަހެޅީ ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަލީ ހުސެއިން އެވެ.

މިކަމާ ގުޅިގެން މިއަދު ނެރުނު ނޫސްބަޔާނެއްގައި އެމްޑީޕީން ބުނީ، ގާނޫނުއަސާސީއަށް ސަރުކާރުން ހުށަހަޅާ މަޖިލީހުން ގެނައި ބަދަލަކީ ގާނޫނު އަސާސީގެ ބާރު ކެނޑިގެންދާގޮތަށް ގެނެސްފައިވާ ބަދަލެއް ކަމަށެވެ. އަދި، މި ބަދަލު ގެނައީ ގާނޫނުއަސާސީ އާއި ދައުލަތް އޭގެ މައްޗަށް ބިނާވެފައިވާ ޑިމޮކްރަސީގެ އަސާސީ ހަމަތަކާއި، މަޖިލީހުން ގާނޫނުތައް ފާސްކުރުމުގައި މީގެކުރިން އަމަލުކުރަމުން ގޮސްފައިވާ އުސޫލުތަކާ ހިލާފަށް ކަމަށްވެސް މައި އިދިކޮޅު ޕާޓީން ބުނެފައިވެ އެވެ.

މި ބަދަލުގެ ސަބަބުން މަޖިލީހުގައި ރައްޔިތުން ތަމްސީލުކުރާނެ މަންދޫބަކު ހިޔާރުކުރުމަށް ރައްޔިތުންނަށް ލިބިފައި އޮތް ހައްގު ނިގުޅާގަނެފައިވާ ކަމަށްވެސް އެ ޕާޓީގެ ބަޔާނުގައިވެ އެވެ. އަދި، މި ސަބަބުތަކަށް ބަލާ އަލީ ހުސެއިން ހުށަހެޅުއްވި މައްސަލައަށް މަރުހަބާ ކިޔުމަށްފަހު އެމްޑީޕީން ވަނީ މި މައްސަލާގައި ރަސްމީކޮށް ތަދައްހުލް ވާނެކަން އިއުލާނުކޮށްފަ އެވެ.

ސުޕްރީމް ކޯޓަށް ހުށަހަޅާފައިވާ މައްސަލާގައި މިދިޔަ ހަފުތާ ގާނޫނުއަސާސީއަށް އިސްލާހަކީ ދުސްތޫރީ ބާރުވެރިކަން ލިބިގެން ނުވާ ބާތިލު އިސްލާހެއް ކަމަށް ކަނޑައަޅައި ދިނުމަށާއި، އެ އިސްލާހަށް އަމަލުކުރެވޭ މުއްދަތުގައި ވެސް، މިހާރު ހިނގަމުންދާ 20 ވަނަ ރައްޔިތުންގެ މަޖިލީހުގެ މެންބަރުންގެ މައްޗަށް ހިނގާނެ އިސްލާހެއް ނޫން ކަމަށް ކަނޑައަޅައި ދިނުމަށް އަލީ ހުސައިން އެދިވަޑައިގެންފައިވެ އެވެ.

ރައްޔިތުންގެ މަޖިލީހުގެ ސުޕަ މެޖޯރިޓީ އޮތް ޕީއެންސީގެ މެންބަރުންގެ ފުރިހަމަ ތާއިދާއެކު ގާނޫނުއަސާސީގެ ފަސް މާއްދާއަކަށް ގެނައި ބަދަލުގެ ތެރޭގައި ގާނޫނުއަސާސީގެ 73 އަށް ގެނައި ބަދަލާއެކު އިންތިހާބުވާ މެންބަރަކު މަޖިލީހުގެ އުމުރުގެ ތެރޭގައި އެހެން ސިޔާސީ ޕާޓީއަކަށް ބަދަލުވުން، ޕާޓީން ވަކިކުރުން ނުވަތަ އަމިއްލަ މެންބަރަކު ސިޔާސީ ޕާޓީއަކަށް ސޮއިކުރުމުން މަޖިލީހުގެ ގޮނޑި ގެއްލޭނެ އެވެ.

ގާނޫނުއަސާސީއަށް ގެނައި ބަދަލާމެދު ގާނޫނީ ވަކީލުންނާއި މަދަނީ ޖަމިއްޔާތަކުން ވަނީ ކަންބޮޑުވުން ފާޅުކޮށްފަ އެވެ.

އެންމެ ދެތިން ގަޑިއިރު ތެރޭގައި ގާނޫނުއަސާސީ ބަަދަލުކުރީ 78 މެންބަރުންގެ ތާއިދާއެކު އެވެ. އެ ބަދަލަށް ފަހު، ޕީއެންސީގެ މެންބަރުންނާ ގުޅުން އޮތް ބައެއް ފަރާތްތަކަށް ވަޒީފާތައް ދަނީ ދެމުންނެވެ. ނަމަވެސް އެ ވޯޓާ ސިޔާސީ މަގާމުތައް ދިނުމާ ދިމާވީ އިއްތިފާގަކުން ކަމަށް ޕީއެންސީގެ ޗެއާޕާސަން އަދި މަޖިލީހުގެ ރައީސް އަބްދުއްރަހީމް އަބްދުﷲ ރޭ ވިދާޅުވި އެވެ.