އަވަސް އަރުވާލައިގެން ދެތިން ގަޑިއިރުތެރޭގައި ގާނޫނުއަސާސީ ބަދަލު ކުރަން ބުދަ ދުވަހު ރައްޔިތުންގެ މަޖިލީހުގައި ނެގި ވޯޓަށް ފަހު ސިޔާސީ މަގާމުތަކަކަށް ބަޔަކު އައްޔަން ކުރުމަކީ އިއްތިފާގެއް ކަމަށް ވެރިކަން ކުރާ ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

ބުދަ ދުވަހުގެ ވޯޓަށް ފަހު ގިނަ އަދަދެއްގެ ސިޔާސީ މަގާމުތަކެއް ސަރުކާރުން "ބަހާފައިވާ" ކަމަށް ސޯޝަލް މީޑިއާގައި އަޑުފެތުރުނެވެ. އެ މީހުންނަށް މަރުހަބާ ކިޔާފައިވާ ޕޯސްޓުތަކެއް ވެސް ސޯޝަލް މީޑިއާގައި ދައުރުވި އެވެ.

މި ސިޔާސީ ވަޒީފާތަކާއި ބުދަ ދުވަހުގެ ވޯޓާ ގުޅުމެއް އޮތް ކަމަށް ފެތުރޭ އަޑުތަކާ ގުޅިގެން ނޫސްވެރިޔަކު ރޭ ކުރި ސުވާލަކަށް ޖަވާބުދެއްވަމުން އަބްދުއްރަހީމް ވިދާޅުވީ، އަސާސީ ބަދަލު ކުރަން ވޯޓު ދިނީ މަޖިލީހުގެ މެންބަރުން ކަމަށާއި އެހެން ކަމުން ވޯޓާ ގުޅިގެން އިތުރު ބަޔަކަށް ސިޔާސީ މަގާމެއް ދޭން ޖެހޭނެ ކަމަށް ގަބޫލުނުކުރާ ކަމަށެވެ.

"ސަރުކާރެއް ހިނގަމުންދާއިރު ސަރުކާރުގެ މަގާމުތަކަށް ބޭނުންވާ ބޭފުޅުން އައްޔަންކުރުމާ ވަކިކުރުމާ އެއީ ހަމަ އާންމު އުސޫލުގެ ދަށުން ހިނގަމުންދާނެ ކަންތައްތައް. އިއްތިފާގަކުން ދިމާވެފަ އޮވެދާނެ ތި ވިދާޅުވި ގޮތަށް މިދިޔަ ހަފުތާ ތެރޭގަ ސަރުކާރުގެ ބައެއް މަގާމުތަކަށް ބަދަލުގެނައުން. ނޫނިއްޔާމު އިތުރު ބޭފުޅަކަށް މަގާމެއް ދެއްވުން،" އަބްދުއްރަހީމް ވިދާޅުވި އެވެ.

ގާނޫނުއަސާސީއަށް ބަދަލު ގެނައުމަށް ބަޔަކަށް މަގާމު ދީފައި ނުވާނެ ކަމަށް ތަކުރާރުކޮށް އެމަނިކުފާނު ވަނީ ވިދާޅުވެފަ އެވެ. އިތުރު ތަފުސީލަކަށް ވަޑައެއް ނުގަންނަވަ އެވެ.

ރާއްޖޭގެ އިދާރީ ދާއިރާތަކުގެ ތެރެއިން ވޯޓަށްފަހު އެންމެ ފާހަގަވީ ތިނަދޫ ސިޓީގެ އެކި އިދާރާތަކުގެ ސިޔާސީ މަގާމުތަކެވެ. އެގޮތުން، ޑރ. އަބްދުއްސަމަދު މެމޯރިއަލް ހޮސްޕިޓަލުގެ ޑެޕިއުޓީ ސީއީއޯއަކަށް ހަމަޖެއްސި ހަސަން ރީހާން ރަޝީދު އާއި ފިޝަރީޒް މިނިސްޓްރީގެ ޑެޕިއުޓީ މިނިސްޓަރަކަށް ހަމަޖެއްސި އައްޔާޝް އަބްދުއް ސަމަދު އަށް މަގާމު ދީފައިވަނީ ބުދަ ދުވަހުގެ ވޯޓަށްފަހު އެވެ.

އަނެއްކާވެސް އަލަށް ސިޔާސީ މުވައްޒަފުންތަކެއް އައްޔަންކޮށްފައިވާއިރު، ރައީސް ޑރ. މުހައްމަދު މުއިއްޒުގެ ސަރުކާރުން އައްޔަނުކުރި ސިޔާސީ މުވައްޒަފުންގެ ޖުމުލަ އަދަދު އަދިވެސް ހާމައެއް ނުކުރެ އެވެ. ހަރަދު ކުޑަކުރުމުގެ ގޮތުން 228 ސިޔާސީ މުވައްޒަފުން ވަކިކުރާނެ ކަމަށް އެމަނިކުފާނު އޮކްޓޯބަރު 15، ގައި އިއުލާން ކުރެއްވި އެވެ.

އޭގެ ފަހުން ނޮވެމްބަރު 1، ގައި ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ހަރަދު ކުޑަ ކުރުމަށް އަޅަމުންދާ ފިޔަވަޅު ތަކުގެ ތެރެއިން، އޮކްޓޯބަރު 31، ގެ ނިޔަލަށް 248 މުވައްޒަފުން ވަކި ކޮށްފައިވާ ކަމަށެވެ.

ނަމަވެސް އޭގެ ފަހުން ވެސް ސަރުކާރުގައި ތިބި ސިޔާސީ މުވައްޒަފުންގެ އަދަދެއް އަދި ވަކި ކުރި ސިޔާސީ މުވައްޒަފުންގެ ތަފްސީލެއް ސަރުކާރުން ހާމަކޮށްފައެއް ނުވެ އެވެ.