ފަލަސްތީނުގެ ގާޒާގައި ހިންގަމުންދާ ލާއިންސާނީ ޖަރީމާތަކުގެ ކުށުގައި، އިޒްރޭލުގެ ބޮޑުވަޒީރު، ބެންޖަމިން ނަތަންޔާހޫ އާއި ކުރީގެ ޑިފެންސް މިނިސްޓަރު، ޔޮއޭވް ގަލަންޓް ހައްޔަރު ކުރަން އިންޓަނޭޝަނަލް ކްރިމިނަލް ކޯޓުން އަމުރެއް ނެރެފި އެވެ.

އެ ކޯޓުން މިއަދު ނެރުނު އަމުރުގައި ބުނީ އެ ދެމީހުން ހައްޔަރު ކުރަން އަމުރު ކުރީ މިދިޔަ އަހަރުގެ އޮކްޓޫބަރުން ފެށިގެން މި އަހަރުގެ މޭ މަހާ ހަމައަށް ހިންގި ލާއިންސާނީ ޖަރީމާތަކުގެ ކުށުގައި ކަމަށެވެ.

"ކާބޯތަކެއްޗާއި ފެނާއި ބޭހާއި ބޭސްފަރުވާގެ އިތުރުން ތެލާއި ކަރަންޓުގެ ހިދުމަތް ފަދަ ދިރިހުރުމަށް ކޮންމެހެން ބޭނުންވާނެ ޒަރޫރީ އެއްޗެހިން ގާޒާގެ ރައްޔިތުން ގަސްދުގައި މަހުރޫމު ކުރުވި ކަމަށް ބެލޭނެ ޖާގަ އެބަ އޮތް،" އެ ދެ މީހުން ހައްޔަރު ކުރަން ނެރުނު އަމުރުގައި ބުނެފައިވެ އެވެ.

މިދިޔަ އަހަރުގެ އޮކްޓޫބަރު 8، އިން ފެށިގެން ގާޒާއަށް ވަދެގަނެ، އިޒްރޭލުން ހިންގަމުންދާ ނަސްލުހޭދު ކުރުމަށް 410 ދުވަސް ވެފައިވާއިރު، މިހައިތަނަށް 41،000 ފަލަސްތީނީން ވަނީ މަރުވެފަ އެވެ. އައިސީސީން ނެރުނު އަމުރުގައި ބުނެފައި ވަނީ އެމީހުންގެ މަރުގެ ޒިންމާ ނަގަން ޖެހޭނީ ނަތަންޔާހޫ އައި ގަލަންޓް ކަމަށެވެ.

އެ ދެ މީހުން ހައްޔަރު ކުރުމަށް ނެރުނު އަމުރަށްފަހު އެ ކޯޓުން ވަނީ ހަމާސްގެ ލީޑަރެއް ކަމަށްވާ، މުހައްމަދު ދިއާބް އިބްރާހިމް އަލް މަސްރީ (ދެއިފް) ހައްޔަރު ކުރަން ވެސް އަމުރެއް ނެރެފަ އެވެ. އޭނާ ހައްޔަރު ކުރުމުގެ އަމުރު އައިސީސީން ނެރުނީ އޮކްޓޫބަރު 7، އިން ފެށިގެން ހިންގަމުންދާ ހަނގުރާމައިގެ ޖަރީމާތަކުގެ ކުށުގައި ކަމަށް ބުނެ އެވެ.

ނަމަވެސް ގާޒާއަށް ދިން ހަމަލާތަކެެއްގައި މިދިޔަ ޖުލައިގައި ދެއިފް މަރާލާފައިވާ ކަމަށް އިޒްރޭލުން ވަނީ ބުނެފަ އެވެ. އޭނާގެ މަރު އަދި މިހައިތަނަށް ކަށަވަރުވެފައެއް ނުވެ އެވެ.

ދެއިފް އަކީ ހަމާސްގެ އަސްކަރީ ފިޔަ، ގައްސާމް ބްރިގޭޑްސްގެ އެއް މޭސްތިރިޔާ އަދި، ލީޑަރު ވެސްމެ އެވެ. އޭނާ އަކީ މިދިޔަ އަހަރުގެ އޮކްޓޫބަރު 7، ގައި ހަމާސްއިން އިޒްރޭލަށް ދިން ކުއްލި ހަމަލާ ރޭވުމުގައި އެންމެ އިސްކޮށް ހަރަކާތްތެރިވި އެކަކެވެ.