ޕާޓީ ބަދަލުކޮށްފި ނަމަ ނުވަތަ ޕާޓީއިން ވަކިކޮށްފި ނަމަ މެންބަރުކަމުން ވަކިވާނެކަން ބަޔާންކޮސް ގާނޫނުއަސާސީ އިސްލާހު ކުރަން ރައްޔިތުންގެ މަޖިލީހަށް ހުށަހަޅާފައިވާ އިސްލާހުތަކުގެ މަސައްކަތް މިއަދު ކުރިއަށްގެންދާއިރު، މަޖިލިސް ކުރާ ގެ ކައިރިއަށް ވެރިކަން ހިންގާ ޕީއެންސީ އާއި އިދިކޮޅު އެމްޑީޕީން ވެސް އެއްވުމުން މަސްރަހު ހޫނުވެއްޖެ އެވެ.

އެއްވުމުގެ ތެރެއިން އެ ސަރަހައްދުގައި އަމަން ބަލަހައްޓަމުންދިޔަ ފުލުހަކަށް ވެސް ވަނީ އަނިޔާވެފަ އެވެ. އެ ސަރަހައްދުގައި ހުރި މި ނޫހުގެ ނޫސްވެރިން ބުނީ ފުލުސް މީހާއަށް އަނިޔާވީ މުޒާހަރާގެ ބައިވެރިއެއްގެ ފަރާތުން ކަމަށެވެ.

މަޖިލިސް ކައިރިއަށް އެއްވެފައި ތިބި ޕީއެންސީގެ މެންބަރުން ގޮވަމުންދަނީ ގާނޫނުއަސާސީއަށް ހުށަހަޅާފައިވާ އިސްލާހުތައް ފާސް ކުރުމަށެވެ. އެމްޑީޕީގެ ސަޕޯޓަރުން ގޮވަމުންދަނީ އިސްލާހުތައް ބޭރުކޮށްލުމަށެވެ.

ކުއްލި ގޮތަކަށް ގާނޫނުއަސާސީ އިސްލާހު ކުރަން ޕީއެންސީއިން މަސައްކަތް ކުރަނީ ޕާޓީ ބަދަލު ކުރުމުން ރައްޔިތުންގެ މަޖިލީހުގެ މެންބަރުކަމުން އިސްތިއުފާ ދޭންޖެހޭނެ ކަމަށް ބުނާ މާއްދާތައް އެންޓި ޑިފެކްޝަން ގާނޫނުން ބާތިލް ކުރަން ހައި ކޯޓަށް ހުށަހަޅާފައި އޮއްވަ އެވެ.

ގާނޫނުއަސާސީ ބަދަލު ކުރަން ޕީއެންސީ ތަމްސީލު ކުރާ ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހަޅުއްވަން ހަމަޖެހިފައިވާ ބިލުގައި ބުނެފައި ވަނީ "ސިޔާސީ ޕާޓީގެ މެންބަރަކު ގާނޫނުގައިވާ ގޮތުގެ މަތިން" ވަކިކޮށްފި ނަމަ މެންބަރުކަމުން ވަކިވާނެ ކަމަށެވެ.

މިހާރު އަމަލު ކުރާ އެންޓި ޑިފެކްޝަން ގާނޫނުގައި ބުނަނީ، ސިޔާސީ ޕާޓީއަކުން މެންބަރަކު ވަކިވެއްޖެ ނަމަ ވަކި ކުރީ ރަނގަޅަށްތޯ ކަނޑައަޅަން އެމީހަކަށް ކޯޓަށް ދެވިދާނެ ކަމަށެވެ. އަދި ވަކި ކުރީ ރަނގަޅަށް ކަމަށް ކޯޓުން ނިންމައިފި ނަމަ އޭނާ މަގާމުން އިސްތިއުފާދޭންޖެހޭނެ ކަމަށް ވެސް އެ ގާނޫނުގައި ބުނެ އެވެ.

ނަމަވެސް މާދަމާ ހުށަހަޅާ އިސްލާހުތައް އޮތް ގޮތަށް ފާސްވެއްޖެ ނަމަ ސިޔާސީ ޕާޓީއަކުން އޭނާ ވަކިކޮށްފި ނަމަ މެންބަރު ކަމުން ވެސް ވަގުތުން ވަކިވާނެ އެވެ.

އޭގެ އިތުރުން، ޕާޓީއަކަށް ނިސްބަތްނުވާ މެންބަރަކު ޕާޓީއަކަށް ސޮއިކޮށްފި ނަމަވެސް މަގާމުން ވަކިވާނެ ކަމަށް މާދަމާ ހުށަހަޅާ ބިލުގައި ވަނީ ބުނެފަ އެވެ.

މީގެ ކުރިން މިފަދަ ގޮތަކަށް ފަރުމާކޮށްފައި އޮތް ގާނޫނެއް ކުރީގެ ރައީސް އަބްދުﷲ ޔާމީންގެ ވެރިކަމުގައި ފާސް ކުރި އެވެ. އެ ގާނޫނު ފާސް ކުރީ ރެޓްރޯސްޕެކްޓިވްކޮށް އަމަލު ކުރެވޭ ގޮތަށް، ގާނޫނު ފާސް ކުރުމުގެ ކުރިން ޕާޓީން ވަކިވި ނުވަތަ ވަކިކޮށްފައިވާ މެންބަރުންގެ ވެސް ގޮނޑި ގެއްލޭ ގޮތަށެވެ.

އެ ގާނޫނުގެ ދަށުން އެއިރު ޕީޕީއެމް އިން ވަކިވި 12 މެންބަރެއްގެ ގޮނޑި ގެއްލުނެވެ. އެކަމަކު، ވެރިކަން ބަދަލުވުމުން އެ ގާނޫނު އުވައިލީ އެވެ.

ޕާޓީ ބަދަލު ކުރުމުން ގޮނޑި ގެއްލޭ މާއްދާތައް މިހާރު އަމަލު ކުރާ އެންޓި ޑިފެކްޝަން ގާނޫނުން އުވާލަން ހުށަހެޅީ އިއްޔެ އެވެ. ނަމަވެސް އަދި އެ މައްސަލަ ހައި ކޯޓުގައި ރަޖިސްޓްރީއެއް ނުކުރެ އެވެ. އެ މައްސަލަ ކޯޓަށް ވެއްދީ އެއްވެސް ޕާޓީއަކަށް ނިސްބަތްނުވާ އަމިއްލަ ފަރާތަކުންނެވެ.