ހުޅުމާލެ ދެވަނަ ފިޔަވައްސަށް އަރާ ބުރިޖެއް މަތީ އިންދާފައި ހުރި ބޯގަންވިލާ ގަސްތަކެއް ވަގަށް ނަގައިފި އެވެ.

އާންމު ފަރާތަކުން ސޯޝަލް މީޑިއާގައި ކުރި ޕޯސްޓެއްގައި ބުނީ ބުރިޖު މަތީ ހުރި ޕޮޓުތަކެއްގައި އިންދާފައި ހުއްޓައި ވަގަށް ނަގާފައިވަނީ ބޯގަންވިލާ ގަސްތަކެއް ކަމަށެވެ.

ގަސްތައް އެތަނުގައި ހުރިއިރު އަދި ވަގަށް ނެގި ފަހުން ނަގާފައި ހުރި ފޮޓޯތަކެއް އޭނާ ވަނީ ސޯޗަލް މީޑިއާގައި ހިއްސާކޮށްފަ އެވެ. މި ގަސްތައް ވަގަށް ނެގި ކަމަށް ވަނީ ރޭގެ ވަގުތެއްގަ އެވެ.

ވަގަށް ނެގި ގަސްތަކަކީ ހުޅުމާލޭގެ ކަންކަން ބަލަހައްޓާ ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިން ހުޅުމާލޭގެ އެކި ސަރަހައްދުތައް ޒީނަތްތެރިކުރުމަށް އިންދި ގަސްތަކުގެ ތެރެއިން ގަސް ތަކެކެވެ. މިކަމާ ގުޅިގެން އެ ކުންފުނިން އަދި ބަހެއް ނުބުނެ އެވެ.

އާންމު މީހާ ސޯޝަލް މީޑިއާގައި ކުރި ޕޯސްޓު ހިއްސާކޮށް އަދި ރިޕްލައިކޮށް ގިނަ ބަޔަކު ވަނީ މިއީ ލަދުވެތި ކަމެއް ކަމަށް ބުނެ އެވެ. ބޯގަންވިލާ ގަސްތައް ވަގަށް ނެގި މައްސަލަ ފުލުހުން ބަލަމުންދާ ކަމެއް ނޭނގެ އެވެ.

ގަސް ވަގަށް ނެގުމަކީ ރާއްޖޭގައި އާންމުކޮށް ހިނގާ ކަމެކެވެ. މިފަދަ މަންޒަރު ފެންނަ ވީޑިއޯ ދޭތެރެއަކުން ސޯޝަލް މީޑިއާގައި އަބަދުވެސް ދައުރުވެ އެވެ.