ލިޒްބަން (ނޮވެމްބަރު 17) - ފުޓްބޯޅަ ކެރިއަރު ނިންމާލާއިރު 1000 ގޯލު ހަމަކުރުމުގެ ސީދާ ޝައުގުވެރިކަމެއް ނެތް ކަމަށް ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ބުނެފި އެވެ.

ދާދި ފަހުން ޔުއެފާ ނޭޝަންސް ލީގުގައި ޕޯޗުގަލުން ޕޮލަންޑް 5-1 ގެ ނަތީޖާ އަކުން ބަލިކުރި މެޗުގައި ރޮނާލްޑޯ ވަނީ ދެ ގޯލު ޖަހާފަ އެވެ. މިއީ ރޮނާލްޑޯ އޭނާގެ ކެރިއަރުގައި ޖެހި 910 ވަނަ ގޯލެވެ.

އެ މެޗަށް ދިން އިންޓަވިއުއެއްގައި ރޮނާލްޑޯ ވަނީ އޭނާގެ ކުރިމަގާ ބެހޭ ގޮތުން ވާހަކަ ދައްކައިފަ އެވެ. އޭނާ ބުނީ ފުޓްބޯޅަ ކެރިއަރު ނިންމާލާއިރު 1000 ގޯލް ހަމަނުވިޔަސް އެކަމާ ފަރުވާލެއް ނެތް ކަމަށެވެ. އަދި މިހާރު އޭނާގެ ވިސްނުން ހުރީ ފުޓުބޯޅައިގައި އޭނާ ބާކީ ހޭދަކުރާނެ މަދު ދުވަސްކޮޅު, "އެންޖޯއީ" ކުރަން ކަމަށް ރޮނާލްޑޯ ވަނީ ބުނެފަ އެވެ.

"އަހަރެން އަށް މައްސަލަ އެއް ނެތް 1000 ގޯލް ހަމަނުވިޔަސް. އަހަރެން ކެރިޔަރު ނިންމާލާނީ އެންމެ ގިނަ ގޯލް ޖެހި ކުޅުންތެރިޔާގެ ގޮތުގައި. އަހަރެންގެ ވިސްނުން މިހުރީ ފުޓުބޯޅަ ކުޅެން (ދެން) ލިބޭ މަދު ދުވަސްކޮޅު "އެންޖޯއީ" ކުރަން. އަދިވެސް އަހަރެންގެ ފައިގައި އެބަހުރި ހިތްވަރު ފުޓުބޯޅަ އެންމެ މަތީ ފަންތީގަ ކުޅެން" ރޮނާލްޑޯ ބުންޏެވެ.

ރޮނާލްޑޯ ބުނީ އޭނާ ރިޓަޔާ ކުރާނެ ދުވަހެއް ސީދާ ބުނަން ނޭންގޭ ކަމަށާއި، އެކަމަކު ކުރިއަށް އޮތް ދެ އަހަރެއްހާ ދުވަހު ކުޅޭނެ ކަމަށެވެ. އަދި އޭނާގެ ހަށިގަނޑު ދެން ނުކުޅެ ހުއްޓާލަން ބުނަންދެން ފުޓުބޯޅަ އެންމެ މަތީ ފަންތީގައި ކުޅޭނެ ކަމަށް ރޮނާލްޑޯ ބުންޏެވެ.

ރޮނާލްޑޯ 1000 ގޯލް ހަމަ ކުރަން ބޭނުން ކަމަށް މީގެ ކުރިން ވަނީ ބުނެފަ އެވެ. އަދި މީގެ ކުރިން އޭނާގެ އަމިއްލަ ޕޮޑްކާސްޓްގައި ވަނީ ކޮންމެ ގޯލަކީ ވެސް ފެންނަން ހުރި ގޯލް ކަމަށް ބުނެ ޕެލޭގެ ސަޕޯޓަރުންނަށް ބަހުގެ ހަމަލާ އެއް އަމާޒުކޮށްފަ އެވެ.