ލޯބިވެރިޔާގެ ބަރަހަނާ މަންޒަރުތަކެއް ސޯޝަލް މީޑިއާގައި ލީކުކޮށްލާނެ ކަމަށް ބުނެ ބިރު ދެއްކި ފުލުހަކު ހައްޔަރުކޮށްފި އެވެ.

ފުލުހުން މިއަދު ބުނީ މި މައްސަލާގައި ހައްޔަރު ކޮށްފައިވަނީ އއ. މަތިވެރި ޕޮލިސް ސްޓޭޝަންގައި މަސައްކަތްކުރާ ރެކްރޫޓު ފުލުހެއް ކަމަށްވާ އެ ރަށު ފަޒާ، ޒައިދާން މުހައްމަދު، 19، ކަމަށެވެ.

"އޭނާގެ ލޯބިވެރިޔާއަށް ބިރުދައްކާ އޭނާގެ އޮރިޔާން މަންޒަރު ދައްކުވައިދޭ ފޮޓޯ އާއި ވީޑިއޯ ސޯޝަލް މީޑިއާ ގައި ލީކު ކޮށްލާނެ ކަމަށް ބުނެ ބިރުދައްކާ އިންޒާރުދީ، ބްލެކް މެއިލް ކުރި ކަމަށް ތުހުމަތު ކުރެވޭ،" ފުލުހުން މީޑިއާތަކަށް ދިން މައުލޫމާތުގައި ބުނެފައިވެ އެވެ.

ކޯޓު އަމުރެއްގެ ދަށުން ޒައިދާން ހައްޔަރުކުރީ އިއްޔެ ކަމަށްވެސް ފުލުހުން ބުންޏެވެ. އޭނާގެ ބަންދާ މެދު ގޮތެއް ނިންމުމަށް އއ. މަތިވެރި މެޖިސްޓްރޭޓް ކޯޓަށް ހާޒިރުކުރުމުން ތިން ދުވަހުގެ މުއްދަތެއް ޖަހާފައިވެ އެވެ.

އިތުރު މައުލޫމާތެއް ނުދިން ނަމަވެސް ފުލުހުން ބުނީ މައްސަލަ އިތުރަށް ތަހުގީގުކުރަމުންދާ ކަމަށެވެ.