ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް މޯލްޑިވްސް މީޑިއާ ކައުންސިލް (އެމްއެމްސީ) ހާޒިރުކުރީ މިދިޔަ މަހު ބޭއްވި 11 ވަނަ ނޫސްވެރިކަމުގެ އިނާމުގައި އަދަދު ނޫހުން ތައްޔާރުކުރި "ސްކީލާން" ޑޮކިއުމެންޓަރީއަށް ލިބުނު އެވޯޑާ ގުޅިގެން ކަމަށް އެ ކޮމިޓީގައި އިންނަވާ އިދިކޮޅު އެމްޑީޕީގެ މެންބަރު މީކާއިލް އަހްމަދު ނަސީމް ވިދާޅުވެއްޖެ އެވެ.

އެމްއެމްސީ ހާޒިރުކޮށް މިއަދު ބޭއްވި އެ ކޮމިޓީގެ ބައްދަލުވުން ސިއްރުކުރުމާ ގުޅިގެން ގަލޮޅު ދެކުނު ދާއިރާގެ މެންބަރު މީކާއިލް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މިއަދުގެ ބައްދަލުވުން ސިއްރުކުރުމަކީ އިންތިހާއަށް ކަންބޮޑުވާ ކަމެއް ކަމަށެވެ.

"ޖީ ސްކީލާން، ޑޮކިއުމެންޓްރީއަށް މީޑިއާ ކައުންސިލުން ދިން އެވޯޑުގެ މައްސަލައިގަ އެމީހުން ހާޒިރުކޮށް، މިނިވަން މުއައްސަސާތަކުގެ ކޮމިޓީ ސިއްރުކޮށްގެން ކުރިއަށްގެންދާކަމީ ނޫސްވެރިކަމަށް އޮތް ބިރެއް،" މީކާއިލް ލިޔުއްވާފައިވެ އެވެ.

މިކަމާ ގުޅިގެން އޭނާއާ ސުވާލުކުރުމުން ވިދާޅުވީ، ހާޒިރުކުރުމުގެ ބޭނުމުގެ ގޮތުގައި މަޖިލީހުން އެކި ބަހަނާ ދެއްކި ނަމަވެސް އެމްއެމްސީ ގެ މެންބަރުން މިއަދު ހާޒިރުކުރީ އެވޯޑާ ގުޅިގެން ކަމަށެވެ. އެ ބައްދަލުވުން މިވަގުތު އެބަ ކުރިއަށްދެ އެވެ.

އެމްއެމްސީ މަޖިލީހަށް ހާޒިރުކޮށް، ސިއްރުން ސުވާލުތަކެއް ކުރަން ނިންމާފައި މިވަނީ "ސްކީލާން" ޑޮކިއުމެންޓަރީއަށް ލިބުނު އެވޯޑު އަތުލުމާމެދު ގޮތެއް ނިންމަން މަސައްކަތް ކުރަމުންދާ ކަމަށް އެ ކައުންސިލުން ބުނެފައިވަނިކޮށެވެ.

ސްކީލާން ޑޮކިއުމެންޓަރީއަށް އެވޯޑު ލިބުމުން ކަން ހިނގި ގޮތް

• ސްކީލާން ޑޮކިއުމެންޓަރީ އަށް އެވޯޑު ލިބުމުން ސަރުކާރުގެ ބައެއް ވެރިންނާއި ސަޕޯޓަރުންގެ ފާޑުކިޔުން
• މީޑިއާ ކައުންސިލްގެ ރައީސްގެ މަގާމުގައި ހުންނެވި، ޕީއެސްއެމްގެ ނިއުސް އޮޕަރޭޝަން މެނޭޖަރު އަހުމަދު މުސްތަފާ އޮކްޓޯބަރު 31, 2024 ގައި ޕީއެސްއެމްއިން ވަކިކުރުން. އޭނާގެ މައްޗަށް ތުހުމަތު ކުރީ، ޕީއެސްއެމްގެ އެޑިޓޯރިއަލް ކޮންޓެންޓާ ހިލާފު ވީޑިއޯއެއް ދެއްކި މައްސަލަ. އެ ބުނާ ކޮންޓެންޓަކީ ސްކީލާން ޑޮކިއުމެންޓްރީގެ ވީޑިއޯ ކްލިޕެއް.
• މީޑިއާ ކައުންސިލުން އެ ވީޑިއޯ ދައްކާފައިވަނީ ރާވާއިގެން ގަސްދުގައި ކަމަށް ބުނެ، އެ ކައުންސިލްގެ މައްސަލަ ޕީއެސްއެމްއިން ރައްޔިތުންގެ މަޖިލީހަށް ހުށަހެޅި.
• ފާޑުކިޔުން އަމާޒުވުމުން ޕީއެސްއެމްގެ ބޯޑުގެ ނިންމުން ބަދަލުކޮށް، މުސްތަފާގެ ވަޒީފާ، ނޮވެމްބަރު 1, 2024 ގައި އިޔާދަކުރި
• ވަޒީފާ އިޔާދަކުރި ފަހުން މުސްތަފާ ސްކީލާން ޑޮކިއުމެންޓަރީއާ ދެކޮޅަށް ބަޔާނެއް ނޮވެމްބަރު 1, 2024 ގައި ނެރުނު.
• އެމްއެމްސީގެ ހަ ފަނޑިޔާރުން ވެސް ނޮވެމްބަރު 1, 2024 ގައި ނެރުނު.
• މީޑިއާ ކައުންސިލްގެ ކުއްލި ބައްދަލުވުމެއް ނޮވެމްބަރު 2, 2024 ގައި ބޭއްވި. އެ ބައްދަލުވުމުން ނިންމީ އެވޯޑާ ގުޅޭ ތުހުމަތުތައް ބަލަން. އަދި ސްކީލާން އަށް ލިބުނު އެވޯޑު އަތުލުމާމެދު ގޮތެއް ނިންމަން.
• ނޫސްވެރިކަމުގެ އެވޯޑު މައްސަލައެއް ތަހުގީގު ކުރަން އޭސީސީން މީޑީއާ ކައުންސިލަށް ވަން. ގެންދިޔައީ މާކްސް ޝީޓުތައް
• ދޮންމަންމާފުޅު ކުރެއްވި ތަރިކައާ ގުޅޭ ތުހުމަތުތަކަށް ރައީސް ޑރ. މުހައްމަދު މުއިއްޒު ފުރަތަމަ ފަހަރަށް ޖަވާބުދާރީވެވަޑައިގެންނެވީ ނޮވެމްބަރު 6, 2024 ގައި.

"ސްކީލާން" އަށް ލިބުމާ ގުޅިގެން ހިނގައި ދިޔަ ކަންކަމަކީ "ބާރުވެރި ބައެއްގެ ނުފޫޒުތަކެއްގެ ސަބަބުން ކުރިމަތިވާ ކަންކަންކަމުގައި ބެލުމުގެ ޖާގަ އޮތް ކަމަށް" މޯލްޑިވްސް ޖާނަލިސްޓު އެސޯސީއޭޝަން (އެމްޖޭއޭ) އިންވެސް ވަނީ ބުނެފަ އެވެ.