އަންނަ އަހަރަށް ލަފާކުރާ ބަޖެޓުގެ ބަހުސް މިރޭ 11 ޖަހަން ދެން ކުރިއަށް ގެންދަން ފާސްކޮށްފި އެވެ.

ބަޖެޓުގެ ބަހުސް ނިންމުމަށްޓަކައި މިއަދުގެ ޖަލްސާގެ ވަގުތު އިތުރު ކުރުމަށް ހުށަހެޅީ ރިޔާސަތުންނެވެ. މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ މިރެއާ ހަމައަށް ވަގުތު ދަންމާލަން ހުށަހެޅީ ހުސް ވަގުތައް ތަންދެމުން ބަޖެޓު ބަހުސްގައި ހުރިހާ މެންބަރުންނަށް ފުރުސަތު ދިނުމުގެ ގޮތުން ކަމަށެވެ.

އެ ހުށަހެޅުން ފާސްވީ ވޯޓުގައި ބައިވެރިވި 52 މެންބަރުންގެ އިއްތިފާގުންނެވެ. ބަޖެޓު ބަހުސް ފަށާފައި ވަނީ އިއްޔެ އެވެ.

އަންނަ އަހަރަށް ހުށަހަޅާފައިވާ 56.6 ބިލިއަން ރުފިޔާގެ ބަޖެޓުގައި އާމްދަނީ އާއި ހިލޭ އެހީގެ ގޮތުގައި ލިބޭނެ ކަމަށް ލަފާކޮށްފައި ވަނީ 39.7 ބިލިއަން ރުފިޔާ އެވެ.

އެހެން އަހަރުތަކާ ހިލާފަށް އަންނަ އަހަރުގެ ބަޖެޓުގެ ތަފްސީލުތައް ހާމަނުކުރެ އެވެ. އެހެންވެ، އެ ތަފްސީލު ހޯދަން އެމްޑީޕީގެ ޕާލިމެންޓަރީ ގްރޫޕުންނާއި އެ ޕާޓީގެ އިސްވެރިން އަދި ކުރީގެ ރައީސް އަބްދުﷲ ޔާމީނު ވެސް ވަނީ ކަންބޮޑުވުން ފާޅުކޮށްފަ އެވެ.