ރޯމް (ނޮވެމްބަރު 11) - ރޯމާގެ ކޯޗަކަށް ހުރި އިވާން ޖުރިޗް، 12 މެޗަށް ފަހު މަގާމުން ވަކިކުރަން އެ ކްލަބުން ނިންމައިފި އެވެ.

ރޯމާ މެނޭޖްމަންޓުން މި ގޮތަށް ނިންމީ ލީގުގައި މިރޭ 3-2 އިން އަމިއްލަ ދަނޑުގައި ރޯމާ އިން ބޮލޯނިއާ އަތުން ބަލިވުމުންނެވެ.

ކްރޮއޭޝިއާ އަށް އުފަން ޖުރިޗް އަށް ރޯމާ ކޯޗުކަން ދިނީ، މިދިޔަ ސެޕްޓެމްބަރު މަހު ޑަނިއޭލޭ ޑި ރޮސީ މަގާމުން ވަކިވުމުންނެވެ. ޑި ރޮސީ، ހަ މަސް ދުވަހު ރޯމާ ކޯޗަކަށް މަސައްކަތްކުރީ، އެ ޓީމުގެ ކޯޗަކަށް ހުރި ހޯސޭ މޮރީނިއޯ އިސްތިއުފާދިނުމުން، ޓީމާ ހަވާލުވެ އެވެ. ބާރަ މެޗަށް ފަހު، ކުރިން ޓޮރިނޯ އާއި ހެޔަސް ވެރޯނާ ކޯޗަކަށް ހުރި ޖުރިޗް ވަކިކުރަން ނިންމީ ކުރިއެރުމެއް ނުފެންނާތީ އެވެ.

"މިދިޔަ ހަފްތާތަކުގައި ޖުރިޗް ކުރި މަސައްކަތަށް ޝުކުރު އަދާކުރަން. އަހަރެމެން ބޭނުންވާ ކޯޗެއް ހޯދުމުގެ މަސައްކަތް ކުރިއަށް އޮތް ދުވަސްތަކުގެ ތެރޭގައި ނިންމާލެވޭނެ،" ރޯމާއާ ހަވާލުވެ ހުރެ ނުކުތް 12 މެޗުގެ ތެރެެއިން ހަތަރު މެޗުން މޮޅުވެ، ފަސް މެޗުން ބަލިވި ކޯޗު، ޖުރިޗް ވަކިކުރުން އިއުލާނުކުރަން ރޯމާ އިން ނެރުނު ބަޔާނުގައިވެ އެވެ.

ރޯމާގެ ކޯޗަކަށް ހަމަޖެއްސޭތޯ މަސައްކަތްކުރަމުން އަންނަނީ ދާދި ފަހުން ސައުދީ އަރަބިއްޔާގެ ކޯޗުކަމުން ވަކިވި އިޓަލީގެ މަޝްހޫރު ކޯޗު، ރޮބާޓޯ މަންޗިނީ އެވެ. މަންޗިނީ، ސައުދީ ޓީމު ދޫކޮށްލީ މެނޭޖްމަންޓާ އުފެދުނު ހިޔާލުތަފާތުވުންތަކެއްގެ ތެރޭގަ އެވެ.

އިޓާލިއަން ލީގުގައި މި ވަގުތު 12 ވަނައިގައި އޮތް ރޯމާ އަންނަނީ ޔޫރޮޕާ ލީގުގައި ވެސް ވާދަކުރަމުންނެވެ. އަދި ޔޫރޮޕާ ލީގުގައި އޮތީ 20 ވަނައިގަ އެވެ.