މި ފަސް އަހަރު ތެރޭގައި ބޯހިޔާވަހި ކަމުގެ މައްސަލައަށް ދާއިމީ ހައްލެއް ގެނައުމާއި، ގެދޮރު އިމާރާތް ކުރަން މާލީ އެހީތެރިކަން ބޭނުންވާ ފަރާތްތަކަށް ކުޑަ އިންޓަރެސްޓު ރޭޓެއްގައި ލޯނު ދިނުމާއި، ބޭނުން ޑިޒައިނަކަށް ގެ އިމާރާތްކޮށްފައި ދިނުމަކީ، ރައީސް ޑރ. މުހައްމަދު މުއިއްޒުގެ ވައުދެކެވެ.

އެ މަނިކުފާނުގެ ވައުދާ އެއްގޮތަށް ފަސް ޕަސެންޓު އިންޓަރެސްޓު ރޭޓުގައި ލޯނު ދޫކުރާ ސްކީމް އިއުލާނުކޮށް އެ ލޯނަށް ހުށަހެޅުމުގެ ފުރުސަތު މި މަހުގެ 8 ގައި ހުޅުވާލާފައި ވާއިރު، ގެދޮރު އިމާރާތްކޮށްފައި ދޭނެ ކަމަށްވީ ވައުދުގެ ވާހަކަ މި ވެރިކަމަށް އަހަރު ވުމަށް ގާތްވެފައި ވާއިރު ވެސް ނުދައްކަ އެވެ.

ރިޔާސީ އިންތިހާބުގެ ފުރަތަމަ ބުރުގެ ކެމްޕޭނު ނިންމުމަށް ސެޕްޓެމްބަރު 8، 2023 ގައި މާލޭގައި ބޭއްވި އެއްވުމުގައި އޭރު ޕީއެންސީގެ ރިޔާސީ ކެންޑިޑޭޓު އަދި މާލޭގެ މޭޔަރު މުއިއްޒު ވިދާޅުވީ ކޮންމެ ރައްޔިތަކު ވެސް ބޭނުންވާ ޑިޒައިނަކަށް ގެ އެޅައިދީ، އެ ގެ މޯގޭޖު ކޮށްގެން ލޯނު ދެއްކޭނެ ގޮތް ހަދައި ދޭނެ ކަމަށެވެ. ގެދޮރު އިމާރާތް ކުރުމަށް ރައީސް މުއިއްޒުގެ ވިސްނުމުގައި ހުރީ ހާއްސަ ފަންޑެއް ހެދުމެވެ.

"އަޅުގަނޑުމެން ސަރުކާރުގެ އެހީތެރިކަމާ އެކީ ގާއިމްކުރާ ހާއްސަ ފަންޑެއްގެ ބޭނުންކޮށްގެން މި ދެންނެވި ގޯތިތަކުގައި އަޅުގަނޑުމެން ގެ އަޅައިދިނުމުގެ ފުރުސަތު ދ،ީ އެ ރައްޔިތަކު އެ ބޭނުންވާ ޑިޒައިންއަކަށް އެތާ ގެ އެޅ،ި އެ ގެ ދެން ގޮސް ބޭންކަށް ލައިގެން ލޯނު ނަގައިގެން ސަރުކާރަށް ދައްކަންޖެހޭ ލޯނު ދައްކާނ.ީ އެ ލޯނަކީ އެ މީހަކަށް އެފޯޑަބްލް އިންޓްރެސްޓް ރޭޓެއްގެ ލޯނެއް. އެއާ ހަވާލުވީމާ ގެވެސް އެޅުނ،ީ ގެއަށް ވެސް ވަދެވުނީ،" ރައީސް މުއިއްޒު ވިދާޅުވި އެވެ.

އެ ތަސައްވުރު ރައީސް މުއިއްޒު އެކަށައެޅީ ހާއްސަކޮށް މާލޭ ސަރަހައްދުގައި ގޯތި އޮތަސް، ފައިސާ ނެތުމުން ގެ އިމާރާތް ނުކުރެވި ދިގު މުއްދަތަކަށް ގޯތި ދޫކޮށްލަންޖެހޭ މައްސަލައަށް ހައްލެއް ހޯދުމަށެވެ.

"އާންމުކޮށް ވާގޮތަކީ ގެއެއް އަޅަންވީމާ ގޮތެއް ނެތުނީމާ ކޮންމެވެސް ވިޔަފާރިވެރިއެއް، ރިއަލް އެސްޓޭޓް މީހެއްގެ ކައިރިއަށް ގޮސްގެން އެ ގެ، 25، 30 އަހަރަށް އެ ގޯތި މި ޖެހެނީ ދޭން. ދިނީމާ އެމީހާއަށް ލިބޭ އެއްޗެއް ނެތް. އެކަން ނިމުމަކަށް އައިސް އަމިއްލަ ގެއެއް އަމިއްލަ ގެދޮރެއް އެއްކަލަ ގޯތީގައި އަޅުގަނޑުމެން އަޅައިދީފައި މި ދެނީ ފުރަތަމަ ވެސް ވަދެވޭ ގޮތް ހަދައިދެނީ،" ރައީސް މުއިއްޒު ވިދާޅުވި އެވެ.

މާލީ ހާލަތު ދަށްވުމުގެ ސަބަބުން މާލޭގައި ވެސް ނުހެދި ހުރި ގޯތި އެބަ ހުއްޓެވެ. ކުރިއަށް އޮތީ، ހުޅުމާލެ، ގުޅިފަޅު އަދި ދިރާވަރުން ދޫކޮށްފައިވާ 9000 އަށް ވުރެ ގިނަ ގޯތި އިމާރާތް ކުރުމެވެ. އެމްޑީޕީގެ ވެރިކަމުގައި ދޫކުރި އެ ގޯތިތައް، ލޯނު ނަގައިގެން އިމާރާތް ނުކުރެވޭނެ މީހުން ތިބޭނެ އެވެ. އެހެންވެ، ރައީސް މުއިއްޒު ވައުދުވެވަޑައިގެންނެވި ގޮތަށް ގެ އިމާރާތްކޮށްފައި ތަޅުގަނޑި ހަވާލުކުރުމުގެ މަޝްރޫއު މުހިއްމެވެ.

އެކަމަކަށް އަންނަ އަހަރުގެ ބަޖެޓުގައި ފައިސާ ހިމަނާފައިވާކަން ސަރުކާރުން ހާމައެއް ނުކުރެ އެވެ. އެހެންވެ ރައީސް މުއިއްޒު ވިދާޅުވި ގެދޮރު އަޅާފައި ދޭނެ ވައުދު ފުއްދަށް ފެށޭނެ ކަމާމެދު ސުވާލު އުފެދެ އެވެ. އަދި އެ ކަމަށް އުފައްދަން ވިދާޅުވި ފަންޑު ވީ ހިސާބެއް ވެސް ނޭނގެ އެވެ.