މެޑްރިޑް (ނޮވެމްބަރު 9) - ސްޕެނިޝް ލީގުގައި މިރޭ ވިނީޝިއުސް ޖޫނިއާގެ ހެޓްރިކާ އެކު، ރެއާލް މެޑްރިޑުން ވަނީ 4-0 އިން އޮސަސޫނާ މޮޅުވެއްޖެ އެވެ.

މި މެޗުގައި، ރެއާލްގެ ވިނީޝިއުސް ހެޓްރިކެއް ހެދިއިރު، މިއީ، ދާދި ފަހުން، އޭނާ އަށް ބެލޮންޑިއޯ އެވޯޑް ނުލިބުމާ އެކު، ސޯޝަލް މީޑިއާ އާއި މީޑިއާގައި ދެކެވުނު ވާހަކަތަކަށް ފަހު އޭނާގެ ފަރާތުން އެންމެ ރަނގަޅު ކުޅުމެއް ފެނިގެންދިޔަ މެޗެވެ. ވިނީޝިއުސް ވަނީ މި މެޗުގައި ރެއާލްގެ އެޓޭކްްގައި ތަފާތު ދައްކައިފަ އެވެ.

ރެއާލަށް މި މެޗުގައި އަނެއް ލަނޑު ޖެހީ، ޖޫޑް ބެލިންހަމް އެވެ. މިއީ، އިނގިރޭސި މިޑްފީލްޑަރު، ބެލިންހަމް މި ސީޒަނުގައި ރެއާލަށް ކުޅެދިން 13 މެޗުން ޖެހި ފުރަތަމަ ގޯލެވެ.

އަނިޔާގެ ގިނަ މައްސަލަތަކެއް ރެއާލަށް ކުރިމަތިވި މި މެޗުގައި، އެ ޓީމުގެ ރޮޑްރީގޯ އާއި އެޑާ މިލިޓާއޯ އަދި ލޫކަސް ވަޒްކޭޒް ބަދަލުކުރަން ޖެހުނީ އަނިޔާއާ ހެދި އެވެ. މީގެ ތެރެއިން، މިލިޓާއޯ ދަނޑުން ބޭލީ ސްޓްރެޗަރުގަ އެވެ.

މެޗުގެ 34 ވަނަ މިނިޓްގައި، ބެލިންހަމް ދިން ބޯޅައަކުން ވިނީޝިއުސް ރެއާލްގެ ފުރަތަމަ ގޯލު ޖެހިއިރު، ބަދަލަކަށް ކުޅެން އެރި ރައުލް އަސެންސިއޯ ނަގައިދިން ބޯޅައަކަށް އަރައި، ބެލިންހަމް ވަނީ ލަނޑު ޖަހައި ފުރަތަމަ ހާފު ނިމުމުގެ ކުރިން ރެއާލްގެ ލީޑުފުޅާކޮށްފަ އެވެ.

ދެ ވަނަ ހާފުގައި އަށް މިނިޓް ތެރޭ ދެ ވަނަ ލަނޑު ޖަހައި، ވީނީޝިއުސް ވަނީ ހެޓްރިކް ފުރިހަމަކޮށްފަ އެވެ. އެ ގޮތުން، މެޗުގެ 61 ވަނަ މިނިޓްގައި ވިނީޝިއުސްގެ ލަނޑަށް ފުރުސަތު ހޯދައިދިނީ ގޯލްކީޕަރު، އަންޑްރީ ލުނިން އެވެ. އަދި ފަހު ގޯލަށް ބޯޅަ ދިނީ، ބްރަހިމް ޑިއާޒް އެވެ.

މި މެޗުގައި އެއްކޮށް، ރެއާލްގެ ފޯވާޑް ކީލިއަން އެމްބާޕޭ ކުޅުނު ނަމަވެސް ގޯލެއް ޖެހޭގޮތެއްނުވި އެވެ.

ސްޕެނިޝް ލީގުގެ އެއް ވަނައިގައި އޮތް ބާސެލޯނާ އަށް 12 މެޗުން 33 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލަށް 12 މެޗުން ވަނީ 27 ޕޮއިންޓް ލިބިފަ އެވެ.