ބާސެލޯނާ (ޑިސެމްބަރު 16) - ސްޕެނިޝް ލީގުގައި ރޭ ބާސެލޯނާ ކުޅުނު މެޗުން އަމިއްލަ ދަނޑުގައި ލެގާނެސް އަތުން 1-0 އިން ބަލިވެއްޖެ އެވެ.

ބާސެލޯނާ މި ވަނީ އަމިއްލަ ދަނޑުގައި ލީގުގައި ޖެހިޖެހިގެން ދެ މެޗުން ބަލިވެފަ އެވެ. މި ނަތީޖާއާ އެކު، ލީގުގެ އެއް ވަނައިގައި އެ ޓީމު މި ވަގުތު އޮތީ، އޮތީ 18 މެޗުން 38 ޕޮއިންޓާ އެކު އެވެ.

ދެ ވަނައިގައި އޮތް އެތުލެޓިކޯ މެޑްރިޑަށް 17 މެޗުން 38 ޕޮއިންޓް ލިބިފައިވާއިރު، ތިން ވަަނައިގައި އޮތް ރެއާލް މެޑްރިޑަށް ވަނީ 17 މެޗުން 37 ޕޮއިންޓް ލިބިފަ އެވެ. އެތުލެޓިކޯ އިން ވަނީ ރޭ ކުޅުނު މެޗުން ގެޓަފޭ އަތުން 1-0 އިން މޮޅުވެފަ އެވެ.

ލެގާނެސް އިން ރޭގެ މެޗު ފަށައިގެން، ހަތަރު ވަނަ މިިނިޓްގައި ލަނޑު ޖަހައި ލީޑުނެގި އެވެ. މި ގޯލު ޖެހީ، އޮސްކާ ރޮޑްރިގޭޒްގެ ކޯނަރަކުން ސާޖިއޯ ގޮންޒާލޭޒް ބޮލުންނެވެ.

މި މެޗުން މޮޅުވެ، ލެގާނެސް ވަނީ ލީގުގެ 15 ވަނަ އަށް ޖެހިލައިފަ އެވެ. އެއީ، 17 މެޗުން 18 ޕޮއިންޓް ހޯދައިގެންނެވެ.

މި މެޗުގައި ލަނޑެއް ޖެހޭތޯ ބާސެލޯނާ އިން ގިނަ އެޓޭކްތަކެއް ކުރި ނަމަވެސް، ލެގާނެސް އިން ވަނީ ރަނގަޅަށް ޑިފެންސްކޮށް، ބާސެލޯނާ އަތުން ތާރީހީ މޮޅެއް ހޯދައިފަ އެވެ.

ބާސެލޯނާ އަށް ލަނޑެއް ޖަހައިދޭން އެ ޓީމުގެ ރަފީނިއާ ފޮނުވާލި ބޯޅައެއް ވަނީ ގޯލުގެ ދަނޑިއަށް އަމާޒުވެފަ އެވެ.