ގަވާއިދާ ހިލާފަށް ރާއްޖެ ގެންނަ ދުންފަތުގެ ބާވަތްތަކަށް ޖޫރިމަނާ ދެއްކުން އިސްތިސްނާކޮށް، އެ ތަކެތި ނައްތާލުމުގެ ބާރު ތަންފީޒީ އިދާރާތަކަށް ލިބޭ ގޮތަށް ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާ ބެހޭ ގަވާއިދަށް ހަތަރުވަނަ އިސްލާހު ގެނެސްފި އެވެ.

އާ ގަވާއިދުގެ ދަށުން ޕޯސްޓު މެދުވެރިކޮށް ނުވަތަ ކުރިއާ ސާވިސް މެދުވެރިކޮށް ނުވަތަ އެނޫންވެސް ގޮތަކުން އަމިއްލަ ފަރުދުންގެ ނަމުގައި އަމިއްލަ ބޭނުމަށް ގެންނަ ދުންފަތުގެ ބާވަތްތަކާއި، ރާއްޖެއިން ބޭރުން ދަތުރުކޮށްފައި އަންނަ ދަތުރުވެރިން އަމިއްލަ ނަމުގައި، އަމިއްލަ ބޭނުމަށް، ގަވާއިދާ ހިލާފަށް ގެންނަ ދުންފަތުގެ ބާވަތްތައް ގެނައުމުން ދެން ޖޫރިމަނާ ކުރުމުގެ ބަދަލުގައި އެ ގަންނަ ތަކެތި ނައްތާލުމުގެ ބާރު ތަންފީޒީ އިދާރާތަކަށް ލިބޭނެ އެވެ.

މީގެ ކުރިން ގަވާއިދު އޮތް ގޮތުން އެ ގެނައި ތަކެއްޗަށް ޖޫރިމަނާ ކުރުމަށްފަހު، އެ ތަކެތި ނައްތައިލުމުގެ ބާރު ވެސް ތަންފީޒީ އިދާރާތަކަށް ލިބިގެންވެ އެވެ.

ނަމަވެސް ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާބެހޭ ގަވާއިދުގެ ތިންވަނަ އިސްލާހުގައި ބުނާގޮތުން ގަވާއިދާ ހިލާފަށް ގެންނަ ދުންފަތުގެ ބާވަތްތައް ކަސްޓަމްސްގެ ބެލުމުގެ ހިފެހެއްޓިފައި ހުންނައިރު ހިނގާ ހަރަދާއި، ނައްތާލަން ހިނގާ ހަރަދު ވެސް ދައްކަން ޖެހޭނީ އެ އެއްޗެހި ގެނައި މީހާ އެވެ.

އޭގެއިތުރުން ރާއްޖެއިން ބޭރުން އަންނަ 18 އަހަރު ފުރިފައިވާ ފަތުރުވެރިން ގެންނަ ދުންފަތުގެ ބާވަތްތައް ކަސްޓަމްސްގެ ބެލުމުގެ ދަށަުގައި ބެހެއްޓުމަށްފަހު، އަނބުރާ ގެންދަން ޖެހޭ މުއްދަތުގައި ނުގެންގޮސްފިނަމަ، އެ ތަކެތި ނައްތާލުމުގެ ބާރު ވެސް ކަސްޓަމްސްއަށް ވަނީ ދީފަ އެވެ.