އައްޑޫ ސިޓީގެ ހަންކެޑެ އާއި ގައުކެނޑި ގުޅުވައިދޭ ކޯޒްވޭގައި ޒުވާނަކު ދަންޖެހިފައި ހުއްޓައި ފެނިއްޖެ އެވެ.

އުމުރުން 19 އަހަރުގެ އެ ޒުވާނާ ފެނުނީ މިއަދު ހެނދުނުގެ ވަގުތެއްގައި އެވެ. އޭނާ ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް މައުލޫމާތު ލިބެ އެވެ.

ޒުވާނާ ދަންޖެހިފައި ހުރީ ބްރިޖުގެ ރެއިލިން ދަގަނޑެއްގައި ވާގަނޑެއް އައްސައިގެން ކަމަށް މައުލޫމާތު ލިބެ އެވެ. އެނގިފައިވާ ގޮތުގައި އެއީ މަރަދޫފޭދޫ އަށް ނިސްބަތްވާ ޒުވާނެކެވެ.

އެ މައްސަލައިގައި މިހާތަނަށް ފުލުހުންގެ ބަހެއް ނުލިބެ އެވެ. އެކަމަކު، އެ ކަންތައް ހިނގައިދިޔަ ގޮތް ބެލުމުގެ މަސައްކަތް ފުލުހުން މިހާރު ދަނީ ކުރަމުންނެވެ.

މީގެ ކުރިން 2022 ވަނަ އަހަރު ރާއްޖޭގައި ހެދި ދިރާސާއަކުން ދައްކާ ގޮތުގައި ރާއްޖޭގެ ކޮންމެ ފަސް މީހަކުން އެކަކީ ނަފުސާނީ ބަލީގެ ކޮންމެވެސް އަސަރެއްކޮށްފައިވާ މީހެކެވެ. އޭގެ ތެރެއިން ހަތަރު ޕަސެންޓު މީހުން ނަފުސަށް ގެއްލުން ދިނުމުގެ ވިސްނުން ގެންގުޅެފައި އެބަ ހުއްޓެވެ.