ދިވެހިރާއްޖެ އާއި ތުރުކީއާ ދެމެދު މިއަދު ސޮއި ކުރި މިނިވަން ވިޔަފާރީގެ އެއްބަސްވުމުގެ ދަށުން ރާއްޖެއިން އެކްސްޕޯޓް ކުރާ މަހުގެ ގިނަ ބާވަތްތަކުން ނަގާނީ ކުޑަ ޑިއުޓީއެއް ކަމަށް އިކޮނޮމިކް މިނިސްޓްރީން މިއަދު ބުނެފި އެވެ.

އެ މިނިސްޓްރީން މިއަދު ބުނީ އަންނަ އަހަރުގެ ފުރަތަމަ ކުއާޓަރުގައި އެ އެއްބަސްވުމަށް އަމަލު ކުރަން ފަށާއިރު، ރާއްޖެއިން ތުރުކީއަށް އެކްސްޕޯޓު ކުރާ ރީނދޫއުރަހަ ކަންނެލި، ލޯބޮޑު ކަންނެލި އަދި ކަޅުބިލަމަހުން ނަގާނީ ލުއި ޑިއުޓީއެއް ކަމަށެވެ. ރާއްޖެއިން އެކްސްޕޯޓް ކުރާ އެ ބާވަތްތަކުގެ މަހުން މިހާރު ތުރުކީއިން 60 ޕަސެންޓުގެ ޑިއުޓީއެއް ނަގަ އެވެ.

"[މި އެއްބަސްވުމުގެ ދަށުން] ދިވެހިރާއްޖެއިން އެކްސްޕޯޓް ކުރާ މަހުގެ ބާވަތްތައް ސަރަހައްދީ މާކެޓްތަކާ އަޅާބަލާއިރު ރަނގަޅު އަގެއްގައި ތުރުކީ ވިލާތަށް އެކްސްޕޯޓް ކުރުމުގެ ފުރުސަތު ލިބިގެންދާނެ،" މިނިސްޓްރީން ބުންޏެވެ.

ރާއްޖެއިން އެކްސްޕޯޓު ކުރާ މަހުގެ 39 ބާވަތަކުން އެއްވެސް ޑިއުޓީއެއް ނުނަގާނެ ކަމަށް ވެސް ސަރުކާރުން ބުނެ އެވެ. ނަމަވެސް އެއީ ކޮން ބާވްތަތަކެއް ކަމެއް އިކޮނޮމިކް މިނިސްޓްރީން އަދި ހާމައެއް ނުކުރެ އެވެ. ކުޑަ ޑިއުޓީއެއް ނަގާ މަހުގެ 103 ބާވަތް ހިމެނެ އެވެ.

އޭގެ އިތުރުން، ފިޝް ފިލޭ، ސީފުޑް، އަދި ޕްރޮސެސްކޮށްފައި ހުންނަ ހިކި މަސް އަދި ލޮނުމަހަށް ވެސް ތުރުކީއިން ނަގާނީ ކުޑަ ޑިއުޓީއެއް ކަމަށް އިކޮނޮމިކް މިނިސްޓްރީން ބުނެ އެވެ.

އެ އެއްބަސްވުމުގެ ދަށުން ތުރުކީއިން ރާއްޖެއަށް އިމްޕޯޓް ކުރާ ވަރަށް ގިނަ ސާމާނުތަކުން ވެސް ނަގާ ޑިއުޓީ ކުޑަވާނެ އެވެ. އޭގެ ތެރޭގައި ރިސޯޓު އިމާރާތް ކުރަން ގެންނަ ތަކެތި ހިމެނޭނެ ކަމަށް އިކޮނޮމިކް މިނިސްޓްރީން ބުނެ އެވެ. އަދި ޑިއުޓީއަށް ލުއި ލިބޭ ތަކެތީގެ ތެރޭގައި އިންޑަސްޓްރިއަލް އިކުއިޕްމަންޓުތައް ވެސް ހިމެނޭ ކަމަށް ސަރުކާރުުން ބުނެ އެވެ.