ލެސްޓާ ސިޓީ އަށް ކުޅެމުން އަންނަ މިޑްފީލްޑަރު، ހަމްޒާ ޗޯދުރީ، ބަންގްލަދޭޝް ގައުމީ ޓީމަށް ކުޅެން ފުރިހަމަވާންޖެހޭ ކަންކަން ކުރިއަށްގެންދާއިރު، މި މަހު ރާއްޖެއާ ދެކޮޅަށް ބަންގްލަދޭޝް އިން ކުޅޭ އެކުވެރިކަމުގެ މެޗުތައް ހަމްޒާ އަށް ގެއްލުނީ އެކި ސަބަބުތަކާ ހެދި ކަމަށް ބަންގްލަދޭޝްގެ ފުޓްބޯޅަ ފެޑެރޭޝަނުން ބުނެފި އެެވެ.

މީގެ ދެ އަހަރު ކުރިން ބަންގްލަދޭޝް ފުޓްބޯޅަ ފެޑެރޭޝަނުން ވަނީ ހަމްޒާގެ އާއިލާއާ މަޝްވަރާކޮށްގެން އޭނާ ބަންގްލަދޭޝް ޓީމަށް ކުޅުވަން މަސައްކަތް ފަށައިފަ އެވެ. ގިނަ އަހަރުތަކެއްގެ މަޝްވަރާ އަށް ފަހު، ހަމްޒާ މިހާރު ވަނީ ބަންގްލަދޭޝަށް ކުޅެން ނިންމައިފަ އެެވެ.

ހަމްޒާ، 26، އަކީ ބަންގްލަދޭޝް ދަރިކޮޅަށް ނިސްބަތްވާ ކުޅުންތެރިއެކެވެ. އަދި އޭނާއާ އާއިލީ ގޮތުން އެފްރިކާގެ ގްރެނާޑާއާ ވެސް ގުޅުން އެބައޮތެވެ. ހަމްޒާ، ބަންގްލަދޭޝަށް ކުޅުވަން ކުރާ މަސައްކަތް އަވަސްކުރުމުގެ ގޮތުން، މިދިޔަ ޖޫން މަހު އޭނާ ވަނީ ލަންޑަންގައި ހުންނަ ބަންގްލަދޭޝްގެ އެމްބަސީ އަށް އެ ގައުމުގެ ޕާސްޕޯޓް ހައްދަން ހުށަހަޅައިފަ އެވެ. ބަންގްލަދޭޝްގެ ސިޔާސީ ހަމަނުޖެހުންތަކާ ހެދި އެ ކަންކަން ދިގުލައިދިޔަ ނަަަމަވެސް މިހާރު އެކަން ވަނީ ނިމިފަ އެވެ. އަދި ހަމްޒާ އަށް ބަންގްލަދޭޝްގެ ޕާސްޕޯޓް ވަނީ ހަވާލުކޮށްފަ އެވެ.

މި ވަގުތު އަނިޔާއެއްގައި ހުރި ހަމްޒާ އަށް މި މަހު 13 އާއި 16 ވަނަ ދުވަހު ބަންގްލަދޭޝް އިން ރާއްޖެއާ ކުޅޭ މެޗުތައް ގެއްލޭނެ ކަމަށް ކުރިން ވެސް އޮތީ ބެލެވިފަ އެެވެ. އެކަމަކު، ފިޓްކޮށް ހުރި ނަމަވެސް މި މެޗުތަކުގައި ހަމްޒާ އަށް ކުޅެވުމުގެ ފުރުސަތު ނެތެވެ.

"ފީފާގެ ޕްލޭޔާސް ސްޓެޓިއުޓްސް ކޮމިޓީން އަންނަނީ ހަމްޒާގެ ކަންކަން ބަލަމުން. އަހަރެމެންނަށް އަންގާފައިވަނީ ހަމްޒާ އަށް ބަންގްލަދޭޝް އަށް ކުޅެވޭ ވަރަށް އަދިވެސް ލިޔެކިޔުންތައް ހަމަކުރަން. އަހަރެމެން މި އަންނަނީ ހަމްޒާގެ އާއިލާ އާއި އޭޖެންޓާ މަޝްވަރާކޮށްގެން އެކަން ކުރަމުން،" ބަންގްލަދޭޝް ފުޓްބޯޅަ ފެޑެރޭޝަންގެ ޖެނެރަލް ސެކްރެޓަރީ، އިމްރާން ހުސެއިން ތުޝާރު ވިދާޅުވި އެވެ.

އިނގިރޭސި 21 އަހަރުން ދަށުގެ ގައުމީ ޓީމަށް ހަތް މެޗު ކުޅެފައިވާ ހަމްޒާ، ބަންގްލަދޭޝަށް ކުޅެން ނިންމީ އިނގިރޭސި ސީނިއާ ޓީމުން އޭނާ އަށް ފުރުސަތު ނުލިބޭނެކަން ޔަގީންވުމުންނެވެ.

ބަންގްލަދޭޝް ފުޓްބޯލް ފެޑެރޭޝަނުން މިހާރު ވަނީ، ފީފާގައި ހަމްޒާ، ބަންގްލަދޭޝް ކުޅުންތެރިއެއްގެ ގޮތުގައި ރަޖިސްޓްރީކުރަން ކުރަން ޖެހޭ ކަންކަން ފުރިހަމަ ކުރަން ފަށައިފަ އެވެ. އެ ގޮތުން، އެންމެ ފުރަތަމަ ކަމަކަށް ބަންގްލަދޭޝް އިން ބޭނުންވާނީ، އިނގިރޭސި އެފްއޭގެ ނޯ އޮބްޖެކްޝަން ސެޓްފިކެޓް (އެންއޯސީ) އެވެ. އެންއޯސީގެ ކަންކަން ވެސް އަދި އެއްކޮށް ފުރިހަމަނުވެ އެވެ.