ރައްޔިތުންގެ މަޖިލީހަށް އަންނަ އަހަރަށް ލަފާކޮށް ބަޖެޓު ހުށަހެޅިއިރު، ކުރަން ރާވާފައިވާ މަސައްކަތްތަކުގެ ތަފުސީލާއި ރަށްރަށުގައި ހިންގާ މަޝްރޫއުތަކުގެ ތަފުސީލު ނުހިމަނާ އޮތް މައްސަލައިގައި މީހުން ކަންބޮޑުވުން ފާޅުކުރަން ފަށައިފި އެވެ.

ވޭތުވި އަހަރުގެ ބަޖެޓު ފޮތަށް ބަލާއިރު، ރަށްރަށުގައި ހިންގާ މަޝްރޫއުތަކާއި ސަރުކާރުން އަލަށް ފަށާ ސިޔާސަތުތަކުގެ ތަފުސީލުތައް ހިމަނައި، ވަކިވަކި ކަންކަމަށް ބަޖެޓުކޮށްފައިވާ އަދަދު ވަރަށް ތަފުސީލުކޮށް ހިމަނާފައިވެ އެވެ. ހާއްސަކޮށް ޕަބްލިކް ސެކްޓާ އިންފްރާސްޓްރަކްޗާ ޕްރޮގްރާމް (ޕީއެސްއައިޕީ) ގެ ދަށުން ހިންގާ މަޝްރޫއުތަކާއި އަލަށް ފަށާ ސިޔާސަތުތަކަށް ބަޖެޓު ކުރާ މިންވަރު ހިމަނާފައިވެ އެވެ.

މިހެން ނަމަވެސް މި އަހަރުގެ ބަޖެޓު ފޮތުން މިކަހަލަ އެއްވެސް ތަފުސީލެއް ފެންނާކަށް ނެތެވެ. އަދި ކުރީ އަހަރުގެ ބަޖެޓު ފޮތްތަކުގައި ހިމަނާފައި ހުރި މައުލޫމާތު ގޮޅިތަކެއް ވެސް ފެންނާކަށް ނެތެވެ. ހަމަ އެހެންމެ ދުނިޔޭގެ މާލީ ހާލަތާއި ރާއްޖޭގެ މާލީ ހާލަތު އަންގައިދޭ ލިޔުންތަކާއި ބަޖެޓަށް ހުރި ހިރާސްތައް ފަދަ ކަމެއް ވެސް ބަޖެޓުން ފެންނާކަށް ނެތެވެ.

މިކަމާ ގުޅިގެން ކަންބޮޑުވުން ފާޅުކުރި މީހުންގެ ތެރޭގައި މައި އިދިކޮޅު ޕާޓީ، އެމްޑީޕީގެ ރައްޔިތުންގެ މަޖިލީހުގެ މެމްބަރުންނާއި ކައުންސިލުތަކުގެ މެމްބަރުން ހިމެނެ އެވެ. މި އެންމެންގެ ވެސް މައިގަނޑު ކަންބޮޑުވުމަކީ ތަފުސީލުތައް ހިމަނާފައި ނެތުމުން އަންނަ އަހަރު ރަށްރަށުގައި ހިންގާ ޕްރޮޖެކްޓުތަކުގެ ތަފުސީލުތައް ނޭނގުމެވެ.

މިކަމާ ގުޅޭ ގޮތުން ފިނޭންސް މިނިސްޓްރީގެ ރަސްމީ ޖަވާބެއް ނުލިބުނު ނަމަވެސް ކަމުގެ މައުލޫމާތު އެނގޭ މަސްދަރަކުން ނަން ނުޖަހާ ގޮތަށް "އަދަދު" އާ ވާހަކަ ދައްކަމުން ބުނީ، އެ ތަފުސީލުތަކާ ނުލާ މަޖިލީހަށް ބަޖެޓު ހުށަހެޅީ ގާނޫނުގައި އޮންނަ މުއްދަތުގެ ތެރޭގައި އެކަން ކުރަން ކަމަށެވެ. އަދި ރަސްމީ ބަޖެޓު ފޮތް އާންމުކުރާ އިރު، އެ ހުރިހާ މައުލޫމާތުތަކެއް ހިމަނާފައި ހުންނާނެ ކަމަށް އޭނާ ބުންޏެވެ.

އަންނަ އަހަރަށް ލަފާކޮށް މަޖިލީހަށް ހުށަހަޅާފައި ވަނީ 56 ބިލިއަން ރުފިޔާގެ ބަޖެޓެކެވެ. މި ބަޖެޓުގެ އެންމެ ބޮޑު އިންސައްތައެއް ހަރަދު ކުރަނީ ޕީއެސްއައިޕީގެ ދަށުން ހިންގާ ތަރައްގީގެ މަޝްރޫއުތަކަށެވެ. އަންނަ އަހަރު ލިބޭނެ ކަމަށް ލަފާކުރާ އާމްދަނީ އަކީ 39.8 ބިލިއަން ރުފިޔާ އެވެ.

ކޮންމެ އަހަރެއްގައި ވެސް މަޖިލީހަށް އަންނަ އަހަރަށް ލަފާކުރާ ބަޖެޓު ހުށަހެޅުމަށް ފަހު، ބަޖެޓުގެ މައުލޫމާތު ހާމަކުރަން ފިނޭންސް މިނިސްޓްރީން ތައްޔާރުކޮށްފައިވާ ހާއްސަ ވެބްސައިޓު، ބަޖެޓު.އެމްވީ އެ ހުރިހާ މައުލޫމާތު ގުޅޭ ލިޔުންތައް ލައެވެ. ނަމަވެސް، މިދިޔަ ބުރާސްފަތި ދުވަހު ހުށަހެޅި ބަޖެޓުގެ އެއްވެސް މައުލޫމާތެއް ބަޖެޓު ވެބްސައިޓުގައި ނެތެވެ.