މިއުނިކް (ނޮވެމްބަރު 2) - ޖަރުމަނު ލީގުގެ އެންމެ ފަހުގެ ޗެމްޕިއަން، ބަޔާ ލެވަކޫސަނުން ރޭ ކުޅުނު މެޗުން ސްޓުޓްގާޓާ 0-0 އިން އެއްވަރުވެ، މި ފަހަރުގެ ލީގުގައި ފަސް ވަނަ ފަހަރަށް މެޗެއްގައި ޕޮއިންޓް ގެއްލިއްޖެ އެވެ.

ލީގުގެ ތިން ވަނައިގައި މި ވަގުތު އޮތް ލެވަކޫސަން އެއްް މެޗު އިތުރަށް ކުޅެފައިވާއިރު ވެސް އެ ޓީމު އޮތީ ދެ ވަނައިގައި އޮތް ލައިޕްޒިގާއި އެއް ވަނައިގައި އޮތް ބަޔާން މިއުނިކަށް ވުރެ ހަތަރު ޕޮއިންޓް ފަހަތުގަ އެވެ. އެއް ވަނައިގައި އޮތް ބަޔާނާއި ދެ ވަނައިގައި އޮތް ލައިޕްޒިގަށް އަށް މެޗުން 20 ޕޮއިންޓް ލިބިފައިވާއިރު، ތިން ވަނައިގައި އޮތް ލައިޕްޒިގަށް ވަނީ ނުވަ މެޗުން 16 ޕޮއިންޓް ލިބިފަ އެވެ.

ސްޓުޓްގާޓްގެ ކީޕަރު އަލެކްސަންޑަ ނޫބެލް ރޭގެ މެޗުގައި ވަނީ ގިނަ ހަމަލާތަކެއް ހުއްޓުވައިފަ އެެވެ. އެ ގޮތުން، މެޗު ފަށައިގެން ފުރަތަމަ 15 މިނިޓް ތެރޭ ޖެރެމީ ފްރިމްޕޮން އާއި އަލެހަންްދްރޯ ގްރިމާލްޑޯ ފޮނުވާލިި ބާރު ހަމަލާތަކެވެ.

ލެވަކޫސަންގެ ފްރިމްޕޮން ޖެހި ގޯލެއް އޮފްސައިޑްވިއިރު، އެ ޓީމުގެ އެޑްމޯން ޓަޕްސޮބާ ބޮލުން ޖެހި ބޯޅައެއް ވަނީ ހުރަސްދަނޑީގައި ޖެހިފަ އެވެ. އަަދި އެ ޓީމުގެ ފޯވާޑް، ވިކްޓަ ބޮނިފޭސް ޖެހި ބޯޅައެއް ވެސް ދަނޑިއަށް އަމާޒުވިއިރު، އޭނާ ހުސްކޮށް ހުރެ ޖެހި ބޯޅައެއް ކީޕަރު ނޫބެލް ވަނީ ހުއްޓުވަައިފަ އެވެ.