މެންޗެސްޓާ (އޮކްޓޫބަރު 31) - މެންޗެސްޓާ ޔުނައިޓެޑުން ކުރިއަށް އޮތް ޓްރާންސްފާ މާކެޓްގައި ވިއްކާލާނެ ކުޅުންތެރިންގެ ލިސްޓު ތައްޔާރުކުރިއިރު، އެ ޓީމުން އަގުބޮޑުކޮށް ގަތް ބްރެޒިލްގެ އެންތަނީ ހިމަނައިފި އެވެ.

އަޔަކްސް އިން މީގެ ދެ އަަހަރު ކުރިން ޔުނައިޓެޑުން އެންތަނީގެ ސޮއި ހޯދީ 100 މިލިއަން ޑޮލަރު ދައްކާ ގޮތަށެވެ. މިއީ، ޕައުލް ޕޮގްބާގެ ޓްރާންސްފާ އަށް ފަހު ޔުނައިޓެޑުން ދެ ވަނަ އަށް ކުރި އެންމެ އަގުބޮޑު ޓްރާންސްފާ އެވެ. އެކަމަކު، އެ އަގުގެ ކުޅުންތެރިއަކު ދައްކަން ޖެހޭ ކުޅުމާ ގާތަށް ވެސް އެންތަނީ އަށް އަދި ޔުނައިޓެޑްގައި ނުކުޅެވެ އެވެ. އެހެންވެ، ގިނަ ފާޑުކިޔުންތަކެއް ވަނީ އަމާޒުވެފަ އެވެ.

ޔުނައިޓެޑުން އެންތަނީ ގަތީ އެ ޓީމުން ދާދި ފަހުން ވަކިކުރި ކޯޗު އެރިކް ޓެން ހާގްގެ ލަފާގެ މަތިންނެވެ. ޔުނައިޓެޑްގެ ކޯޗުގެ މަގާމުގައި ޓެން ހާގަށް ކުރިއަށް ނުދެވުނު އެންމެ ބޮޑު ސަބަބަކީ ބޮޑު ހޭދަތަކެއް ކޮށްެގެން ވެސް އެ ކްލަބްގެ އަސްލު ލެވަލާ ހަމައަށް ދެވޭނެ ކަމުގެ މިސްރާބެއް ވެސް ނުފެންނާތީ އެވެ. އޭގެ ތެރޭގައި، އެންތަނީ ފަދަ ކުޅުންތެރިންނަށް ކުރި ހޭދަޔާ އެއްވަރަށް ނުކުޅެވުމުގެ ޕްރެޝަރުތައް ވެސް ޓެން ހާގަށް ކުރިމަތިލާން ޖެހުނެވެ.

ރިޕޯޓްތައް ބުނާގޮތުން، ޔުނައިޓެޑުން ބަލަނީ 50 މިލިއަން ޑޮލަރަށް އެންތަނީ ވިއްކާލެވޭނަމަ އެ ޑީލް ކުރިއަށްގެންދާށެެވެ. އަދި އެ އަގުގައި ގަންނާނެ ޓީމެއް ޖެނުއަރީ ޓްރާންސްފާގައި ނުލިިބިއްޖެނަމަ، އޭނާ ލޯނަކަށް ދޫކޮށްލަން ވެސް ޔުނައިޓެޑުން އޮތީ ތައްޔާރަށެެވެ.

އެންތަނީ ހޯދަން ޕްރިމިއާ ލީގުގެ ބައެއް ކްލަބްތަކާއި އިޓަލީ، ނެދަލެންޑްސް އަދި ސައުދީ އަރަބިއްޔާގެ ޓީމުތަކުން މަސައްކަތްކުރެ އެވެ.