ފިރިހެނުންނަށް އޮންނަ ކޮންމެ ފުރުސަތެއް އަންހެނުންނަށް ވެސް އޮންނަންވާނެ ކަމަށް ބުނެ, ދިވެހި ތާރީހުގައި ފުރަތަމަ ފަހަރަށް މިސް ޔުނިވާސްގައި ވާދަ ކުރާ މަރިޔަމް ޝައިނާ ނަސީމް، 21 އަށް ދަ ޑިމޮކްރެޓްސް އިން ރާއްޖެއިން މަރުހަބާ ކިޔައިފި އެވެ.

މިސް ޔުނިވާސް އަށް ދިވެހިރާއްޖޭގެ ފަރާތުން ޝައިނާ ވާދަކުރާތީ އެކަން ހުއްޓައިލުމަށް ގޮވާލައި ސަރުކާރުން ވަނީ އެކަން ކުށްވެރިކޮށްފަ އެވެ. ޔޫތު މިނިސްޓްރީން ނެރުނު މި ބަޔާނާ ގުޅިގެން ގިނަ ބަޔަކު ދަނީ ސަރުކާރަށް ފާޑުކިޔަމުންނެވެ. އެ މީހުން ފާހަގަ ކުރަނީ މިސް ޔުނިވާސް އެކޭ އެއްގޮތަށް މިސްޓަ މޯލްޑިވްސް ވެސް ރާއްޖޭގައި ބާއްވަމުންދާ ކަމަށެވެ.

މިކަމާ ގުޅިގެން ޑިމޮކްރެޓުން ނެރުނު ބަޔާނެއްގައި ބުނީ، އެންމެ އެވޭލާ ޒަމާނުށްސުރެ ރާއްޖެއަކީ އަންހެނުންނަށް ވަރަށް ބޮޑަށް ބާރުވެރިކަން ލިބިދީފައި އޮތް ގައުމެއް ކަމަށެވެ.

"ސުމުއްވުލް އަމީރު މުހައްމަދު އަމީން އަލުން ދިވެހި އަންހެނުން ކުރިއަށް ނެރުއްވަން ފެއްޓެވި ހިސާބުން ފެށިގެން ދިވެހިރާއްޖޭގައި އަންހެނުން ބާރުވެރިކުރުމުގެ ވަކާލާތު ދަނީ ހިންގެމުން، ފިރިހެނުންނަށް އޮންނަ ކޮންމެ ފުރުސަތެއް އަންހެނުންނަށް ވެސް ލިބިދިނުމަކީ ދެން މި ރާއްޖޭގައި އެއާ އިންކާރުކުރެވި ދެކޮޅުހެދޭނޭ ކަންކަމެއް ނޫން،" ޑިމޮކްރެޓުންގެ ބަޔާނުގައި ބުނެފައިވެ އެވެ.

މިވަގުތު އިދިކޮޅު ޕާޓީއެއްގެ ގޮތުގައި އޮތް ޑިމޮކްރެޓުން ބުނީ ރާއްޖެ އަނބުރާ އައިކޮޅަށް ފަހަތަށް ގެންދިޔުމަކީ އެއްވެސް ވަޒީރަކަށްވެސް، ނުވަތަ ވެރިޔަކަށްވެސް އޮތް ބާރެއް، އޮތް އިހުތިޔާރެއް ވެސް ނޫން ކަމަށެވެ.

ޝައިނާ އަށް ޑިމޮކްރެޓްސް އިން ނުހަނު މަރުހަބާ ކިޔާ ކަމަށާއި އޭނާ އެ ނުކުންނަވަނީ ރާއްޖެއަށް ވަރަށް ފަހުރުވެރި ނަމެއް ހޯދުމަށް ކަމަށާއި އެކަމުގަ ފުރިހަމަ ކާމިޔާބީއަށް އެދޭ ކަމަށެވެ.