ގާނޫނުއަސާސީގައި އެކަށައަޅާފައިވާ ދައުލަތް ހިންގުމުގެ ނިޒާމު ހަރާބުވާ ގޮތަށް ގާނޫނުތައް އިސްލާހު ކުރަނީ ދިގު މުއްދަތެއްގައި ވެރިކަމުގައި ހުންނަން ރައީސް މުއިއްޒު ބޭނުންވާތީ ކަމަށް، އިދިކޮޅު މައި ޕާޓީ އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް މިއަދު ވިދާޅުވެއްޖެ އެވެ.

އިލެކްޝަންސް ކޮމިޝަން އާއި އޭސީސީގެ ރައީސް އާއި ނައިބު ރައީސް ސީދާ ރައީސުލްޖުމްހޫރިއްޔާ އައްޔަން ކުރާ ގޮތަށް ގާނޫނަށް ގެންނަ ބަދަލާ ގުޅޭ ގޮތުން، ނާޒިލް "އަދަދު" ނޫހަށް ވިދާޅުވީ އެ ބަދަލު ގެންނަނީ ކޮމިޝަންތަކަށް ނުފޫޒު ފޯރުވަން ކަމަށާއި އެއީ މިހާރު އޮތް އިތުބާރުގެ މިންވަރު އެއްކޮށް ގެއްލިގެންދާނެ ކަމެއް ކަމަށެވެ.

"އޭރުގައި އޮންނަ އިލެކްޝަންސް ކޮމިޝަނަކާ މެދު ޝައްކު އުފެދިއްޖިއްޔާ އެ ހިސާބުން ރައްޔިތުންގެ ވޯޓުގެ ސައްކަން ގެއްލި ދިޔައީ. އެ ހިސާބަށް ދާންދެން ބަލަން ތިބެންވީތޯ. ބަލަން ތިބެއްޖިއްޔާ އަޅުގަނޑުމެންނަށް އަނބުރާ މިހާރު މި ހުރި ހިސާބަށް ގެންނަން ޒަމާންތަކެއް ނަގާނެ،" ނާޒިލް ވިދާޅުވި އެވެ.

އިންތިހާބުތަކާ ކުޅުމަކީ މިހާރު ވެރިކަމުގައި ތިއްބެވި ބޭފުޅުންގެ މާޒީގައި އޮތް ކަމެއް ކަމަށާއި އަވަސް އަރުވާލައިގެން ކޮމިޝަންތަކުގެ ގާނޫނުތައް ބަދަލު އެ ކުރަނީ އެ މަގަށް ގެންގޮސް ހުދުމުހުތާރުވުމަށް ކަމަށް ނާޒިލް ވިދާޅުވި އެވެ.

"މިހާރު ކަންތައްތައް މި ކުރަނީ ވަރަށް ދެރަވަރުކޮށް. ރައްޔިތުން ނިކުމެ އެކަމާ ދެކޮޅަށް އަޑު އުފުލަން ޖެހޭ،" ނާޒިލް ވިދާޅުވި އެވެ.

މިހާރު ގާނޫނުއަސާސީގައި ލިޔެފައިވާ ގޮތުން އެކަކަށް ރައީސްކަމުގައި ހުންނެވޭނީ ގިނަވެގެން ފަސް އަހަރުގެ ދެ ދައުރެވެ.

އިސްލާހީ ހަރަކާތްތެރީން ދަލާއި ލޭ އޮހޮރުވައިގެން ހޯދި ޑިމޮކްރަސީ އާއި ހައްގުތަކާއި މިިނިވަންކަން ގެއްލޭ ގޮތަށް ބައެއް ގާނޫނުތަކަށް ބަދަލު ގެންނަން ރައީސް މުއިއްޒު ހުށަހެޅުއްވުމުން އެކަމާ ދެކޮޅަށް އަޑު އުފުލަން، އެމްޑީޕީން މިއަދު މަޖިލިސް ކައިރީ މުޒާހަރާ ކުރަން ވަނީ ނިންމައިފަ އެވެ.