ކުވައިތު ލީގުގެ ދެ ވަނަ، އަލް އަރަބި އަތުން 2-0 އިން ބަލިވެ, މާޒިޔާ ސްޕޯޓްސް އެންޑް ރެކްރިއޭޝަނަށް އޭއެފްސީ ޗެލެންޖް ލީގުގެ ދެ ވަނަ ބުރަށް ދިއުމުގައި އަމިއްލަ ބާރު ގެއްލިއްޖެ އެވެ.

މި މެޗު ފަށައިގެން މާޒިޔާ އަށް ރަނގަޅަށް މެޗުގެ ތެރެއަށް ނުވަދެވި އުޅެނިކޮށް އަރަބި ޓީމުން ވަނީ ކައިރި ކައިރީގައި ދެ ގޯލު ޖަހާ ލީޑު ނަގާފަ އެވެ.

މެޗުގެ ހަތްވަނަ މިނެޓުގައި އަލް އަރަބީގެ ފުރަތަމަ ލަނޑު އެޓީމަށް ޖަހާދިނީ ޔޫސުފް މަޖީދެވެ. މިއީ ހަމްޒާ ޚަބާ ނަގާދިން ކޯނަރަކަށް ފުންމައިގެން އަރާ ބޮލުން ގޯލުގެ ތިރީ ކަނަށް އަމާޒުކޮށްލައިގެން މަޖީދު ޖެހި ގޯލެކެވެ.

އޭގެ މިނެޓެއް ފަހުން, އަލީ ޚަލަފް ވަނީ އިތުރު ގޯލެއް ޖަހާ އަރަބީގެ ލީޑު ފުޅާކޮށްދީފަ އެވެ. މިއީ މާޒިޔާގެ އޭރިއާ މެދުގައި ހުރެ, ފޮނުވާލި ބާރު ހަމަލާއަކުން ޚަލަފް ކާމިޔާބުކުރި ގޯލެކެވެ. މާޒިޔާގެ ކުޅުންތެރިން ވަނީ ޚަލަފް ގޯލް ޖެހުމުގެ ކުރިން އަރަބީގެ ކުޅުންތެރިޔަކު, މާޒިޔާގެ ސަމޫހް އަލީ (ސަމުއްޓޭ) އަށް ފައުލްކުރި ކަމަށް ވަރަށް ބޮޑަށް އެޕީލްކޮށްފަ އެވެ.

މި ދެ ލަނޑަށްފަހު މާޒިޔާ އިން ގޭމުގެ ތެރެއަށްވަދެ އަރަބި ޓީމަށް ނުރައްކާކުރި އެވެ. އެގޮތުން މެޗުގެ 31 ވަނަ މިނެޓުގައި މާޒިޔާގެ ބްރެޒިލް ފޯވާޑް ވިލްކްސަން ބޮލުން ފޮނުވާލި ބާރު ހަމަލާ ދިޔައީ ގޯލުގެ އަރިމަތީ ދަނޑިކައިރިން ބޭރަށެވެ. އޭގެ ހަތް މިނެޓު ފަހުން ވެސް ވިލްކްސަން އަށް ވަނީ ގޯލު ޖަހަން ރަނގަޅު ފުރުސަތެއް ލިބި ބޭކާރުވެފަ އެވެ.

ހަމްޒާ މުހައްމަދު (ހަމްޕު) ނަގާދިން ހުރަސް މުޅިން ހުސްކޮށް ވިލްކްސަން އަށް ލިބުނުއިރު, އޭނާ އަށް މި ފުރުސަތުގެ ބޭނުން ނުހިފުނެވެ.

ފުރަތަމަ ހާފު ނިމުމުގެ ކުރިން ހަމްޕު ވަނީ އަރަބީގެ ދެ ކުޅުންތެރިން ކައިރިން ނައްޓާލުމަށްފަހު ގޯލުގެ މަތީ ކަނާ އަމާޒުކޮށް ބާރު ހަމަލާ އެއް ފޮނުވާލާފަ އެވެ. އެކަމަކު އެ ހަމަލާގެ ހުރަހަކަށްވީ އަރަބީގެ ކީޕަރު ސުލައިމާން އަބްދުލް ގަފޫރެވެ.

މެޗުގެ 57 ވަނަ މިނެޓުގައި މާޒިޔާގެ މިޑްފީލްޑަރު އަހުމަދު އައިހަމް އޭރިއާ ބޭރުން ފޮނުވާލި ބާރު ހަމަލާ ދިޔައީ ގޯލުގެ ހުރަސް ދަނޑިމަތިން ބޭރަށެވެ. އޭގެ ފަހުން ބަދަލަކަށް ކުޅެން އެރި އަބްދުالله ލޫތް އަދި ނާއިޒް ހަސަން (ދާދު) އަށް ލިބުނު ފުރުސަތުތަކުގެ ބޭނުންވެސް ނުހިފުނެވެ.

މާޒިޔާ އިން މި މުބާރާތުގައި ކުޅުނު ފުރަތަމަ މެޗުގައި ތުރުކުމެނިސްތާން ޗެމްޕިއަން އަރްކަޑަގް އަތުން ވަނީ 2-1 ގެ ނަތީޖާ އަކުން ބަލިވެފަ އެވެ. އިއްޔެ ކުޅުނު ފުރަތަމަ، އަރްކަޑަގް ކުޅުނު މެޗުން އެ ޓީމު ވަނީ އަބްދޭޝް އަތުން 3-0 ގެ ނަތީޖާ އަކުން މޮޅުވެފަ އެވެ.

ތުރުކުމެނިސްތާންގެ ޗެމްޕިއަން، އަރްކަޑަގް މި ވަގުތު އެއް ވަނައިގައި ހަ ޕޮއިންޓާ އެކު އޮތްއިރު، ދެ ވަނައިގައި އޮތް އަބްދީޝް އާއި ތިން ވަނައިގައި އޮތް އަލް އަރަބި އަށް ތިން ޕޮއިންޓް ވަނީ ލިބިފަ އެވެ. މާޒިޔާ ހަތަރެއްގައި އޮތީ އަދި ޕޮއިންޓެއް ނުލިބި އެވެ.